韓式涼拌菜

        印象中好似咁耐都未試過成餐都只係食涼拌菜做餸，韓國菜中涼拌菜就最多款式揀，今次試咗菠菜同大豆芽整嘅涼拌菜。

 

 

涼伴青瓜雞髀菇

        雖然我一向都唔係太喜歡食同飲凍嘢，但天氣咁熱，我都會整冷盤食嘅！呢次就將涼伴雞絲粉皮變成素食，用雞髀菇代替雞肉。

 

 

沙律

        天氣熱就最啱食沙律，唔係因為怕熱，而係感覺上好似唔係太怕生冷寒涼，我整嘅沙律就只係室溫，唔會雪凍㗎！

 

 

素烤鴨沙律

        近排其實無乜動力做嘢，乜都唔想做，連瞓都唔想瞓。但唔煮又無得食，尤其係夜返嘅時候，隔夜餸就變得好珍貴，唔使煮，翻熱就即刻可以食，所以習慣咗一餐煮埋兩餐食，幾唔想整都係要整！

 

        好彩天氣開始熱，買啲生果蔬菜整沙律都可以，只需要洗洗切切，唔使開火煮食已經慳番唔少功夫，連鑊同煲都唔使洗！整緊蔬果嘅同時，放件素烤鴨入焗爐焗到個面脆卜卜，之後再灑上焗香咗嘅花生同椰絲，攪掂，好好醜醜又一餐！

 

 

烤雞三角豆沙律伴檸檬芥末醬

        往年媽咪喺度時，大年初一就一定食齋，年初二就會食番肉，印象中好似會有雞、海參，間中會有 zaak6 年嘅煎釀鯪魚。但係依家自己煮就好少會煮肉喇，前幾日初二貪得意又食肉開年，不過都係簡單一件雞扒啫！

 

        呢個沙律其實係好耐之前睇 Gordon Ramsay 個節目度學番嚟，不過就自己改咗少少嘢，因為原本某啲食材唔易買得到呀！

 

 

韓式青瓜沙律 Oi-muchim (오이무침)

        每年夏天都會狂食青瓜，而且多數都係生食，夠哂清涼、清新兼消暑，好彩我生食青瓜又無事喎！

 

        前兩個禮拜試過跟 Maangchi 姨整韓式青瓜沙律，學佢話齋真係超簡單但又超好食，真係估唔到用豉油撈青瓜味道係咁夾，所以今日要再 encore 兼同大家分享。

 

 

蕎麥雜菜沙律

       禮拜一嗰日係 Charmaine 學校嘅 study leave，所以佢提早咗朝早學琴，之後就可以去補習兼溫書，準備應戰大考。下晝突然間變得好得閒，所以決定去糧倉補給物資，順便買埋沙律菜。

 

        呢期藜麥 (quinoa) 大熱，個個都話要食 super food，但我一直都無試到，一來價錢唔平啦，但其實貴都唔係問題，最怕係唔啱食的話都唔知要唔要好，你知啦，呢啲健康食品唔係個個人都鍾意食㗎嘛，真係送都未必要㗎！！

 

        唔知點解，見到藜麥個樣成日都形住佢係好硬，唔易消化，食到頂心頂肺，呢個亦係我主要無買嚟試嘅原因。早前同 blog 友小月傾開，佢話寧願食蕎麥 (buckwheat) 好過，質地相對比較軟啲，易啲消化，咁啱糧倉都有得賣，而且價錢相對經濟好多，買包試吓整沙律先！

 

 

涼拌腐乳茄子

        聽日係十五，所以今晚過咗十一點食飯就要食齋喇！

 

        呢個腐乳茄子其實由細食到大，媽咪簡中都會整，所以係又一追尋兒時味道之作。做法相當簡單，基本上茄子蒸熟後一撈調味料就食得。

 

 

海鮮粉絲沙律

        呢幾日天氣都好暖，仲有陽光，趁天氣都仲係熱，整沙律食都唔緊要。

 

        呢個粉絲沙律超簡單易做，係切青瓜絲同紅蘿蔔絲比較嘥時間，我就無理咁好氣喇，掟哂入部 food processor 度就攪掂，之後用越南經典魚露汁 nouc nam 撈勻就食得喇！

 

 

醬油麴涼拌青瓜

         醬油麴除咗可以用嚟醃肉之外，仲可以當成涼拌醬料用，呢次我試咗做涼拌青瓜。

 

烤雜菜沙律

        老友 Louisa 送咗隻「Le Creuset」grill pan 俾我咁耐，用過幾多次都真係十隻手指數得出，皆因隻 pan 雖然細細隻，但真係好重，而且因為我少食香口煎炸食物，所以好少用佢嚟煎烤食物，惡性循環之下，到依家隻 pan 都仲未完全 “油潤”，煎嘢食都仲係會黐，之後洗又艱辛、又重、又煩，所以已經好耐不見天日喇！

 

        直到上星期見到 blog 友芹菜整咗個烤茄子沙律，我自己就從來都未試個呢種食法，覺得好吸引，更重要嘅係，原來唔使落油都可以烤到茄子兼唔黐底，真係咁神奇！？一如要拎番隻 pan 出嚟試吓至得。

 

娘惹阿紮 Nyonya Archar

        嗱嗱嗱，你哋唔好問我咩係阿紮呀，我唔識馬拉文，我都唔知點解，淨係知道好好食㗎咋！

 

        好耐之前 Ernest 媽咪整過一次俾我食，味道超正，酸酸辣辣好開胃，最啱天熱無乜胃口時食。最近打開本娘惹食譜搵靈感時，原來有呢個阿紮食譜，即刻整！

 

 

拍黃瓜木耳涼拌粉皮

        其實想整呢個冷盤好耐㗎喇，不過有時又要趁某啲食材未到期之前要先整咗佢，有時就因為餸菜配搭關係就唔到。好喇，時機到喇，買好哂料整，天氣就即刻變得咁清涼，真係俾佢激死！   

        整涼拌青瓜都唔係第一次，但係用木耳整涼菜都真係首次咋！估唔到木耳原來都好容易索味，加埋爽脆口感，超好食喎！

 

涼拌雞絲粉皮

星期五整日式芝麻醬時，留起咗部份焗香芝麻同花生嚟整涼菜。

 

呢個涼拌菜係參照 Jacky Yu 個口水雞食譜，再用自己嘅材料同做法整成。個涼拌醬汁真係唔講得笑，好似 Jacky Yu 咁講，整緊嗰陣時，聞到個味就已經狂口水分秘喇，哈哈！

材料：
雞扒
青瓜
粉皮
炒香花生
炒香芝麻

 

醃料：
鹽
紹酒
胡椒粉

 

涼拌汁料：

生抽 2 湯匙
鎮江醋 2 茶匙
紹酒 1 茶匙
白醋 少許
水 1 湯匙
糖 1/2湯匙
花椒粉 適量
薑蓉 適量
蒜蓉 適量
蔥花 適量

麻油 適量

辣椒油 適量

- 雞扒切去皮及多餘脂肪、洗淨，用醃料醃好，隔水蒸熟後切成粗絲。

- 青瓜洗乾淨，略刨皮及切去頭尾，開邊、去瓤，然後放入食物處理器內切片。

- 煲滾水，放入粉皮煮至透明，之後熄火，冚蓋焗至腍身，之後過冷河，瀝乾備用。

- 依序將粉皮、青瓜片及雞絲放入大碗內。

- 將涼拌汁料內全部材料拌勻，淋上材料上面，再灑上少量花生、芝麻及蔥花。

- 食時拌勻所有材料。

搭 Winnie 幫我買咗包水晶粉皮，望落真係好晶瑩通透，應該係外銷到日本賣。
但係我自己就覺得麻麻哋，因為口感太過煙韌有彈性，
都係鍾意食傳統粉皮多啲。

其實我係整嚟當做一味餸，但原來啲粉皮都幾飽肚，
單獨當成北方涼麵嚟食都得呀！

和風豆腐沙律

又嚟整沙律喇！今次試吓自己攪攪陣，整個日式風味嘅沙律先。

 

材料：

豆腐

青瓜

中華沙律

酸子薑

木魚花

 

沙律汁：

日式柚子醋

日式芝麻醬

浸子薑醋

 

- 豆腐汆水，瀝乾後切粒；青瓜洗乾淨後開邊、去瓤，然後切粒。

- 沙律汁材料全部混合好。

- 將所有材料拌勻，之後再淋上沙律汁。

- 灑上適量木魚花，拌勻後即可享用。

準備好哂所有材料。

加埋沙律汁，一撈就食得！味道夠哂清新，最啱依家天氣咁熱嘅時候食。

Notes：

- 中華沙律即日式醃製海草，於日式超市或大型超市有售。

- 宜用實豆腐製作沙律，避免攪拌時將豆腐整爛。

- 調掣沙律汁時最好邊調邊試味，找出最合自己口味嘅份量比例。

- 如果想自製日式芝麻醬的話，請參考《自家製日式芝麻醬》。

翠玉瓜薯仔蝦沙律

    天氣開始暖番啲，可以整沙律食喇！今次用上翠玉瓜、蘋果、牛油果、薯仔同蝦嚟整沙律，對我嚟講係新嘗試、新配搭。

    呢份就係我前日嘅 lunch，有蔬有果又有肉，夠哂健康吧！

第一次用翠玉瓜做沙律，又爽又甜，好好食，加上
balsamice vinegar dressing 做沙律汁，比起用
mayonnaise 更加清爽健康。
   

一碗沙律，一個裸麥餐包，加一杯咖啡，叉足電就出去教琴喇！

Salad dressing 做法，可參考意大利陳醋沙律汁。

海鮮柚子沙律

        原來入夏咁耐，今次先第一次同大家分享冷盤涼菜食譜！

        今晚呢個沙律又係清存貨嘅製作，用埋放喺冰格啲蜆肉；清埋之前整四川擔擔麵時買落嘅乾蔥頭同磨碎花生；仲有放咗喺雪櫃 N 年嘅青檸！

材料：
魷魚
急凍帶子
急凍蜆肉
泰國金柚
乾蔥頭
紅辣椒
金不換
炒香花生碎

醃料：
鹽
紹酒
胡椒粉

沙律汁：
青檸
魚露
糖

- 魷魚清除內臟及軟骨，撕去表面紫色薄膜，洗乾淨後切圈。

- 帶子、蜆肉解凍後洗乾淨，略為搾乾水份。

- 用醃料將魷魚、帶子同蜆肉醃 15 分鐘，之後分別放滾水內灼熟，盛起瀝乾水份。

- 金柚去皮後拆肉，撕碎成細粒；乾蔥頭去頭尾、去衣，切圈後用凍滾水浸 10 分
  鐘。

- 紅辣椒洗淨後切粒；金不換洗淨後取葉部份。

- 青檸搾汁，加入糖同魚露拌成沙律汁。

- 將所有材料放入大碗內混合，拌入沙律汁即成。

- 食嘅時候再灑上花生碎。

柚子非常清甜又多汁，味道層次豐富，酸、甜、苦、辣、鹹共冶一爐。

 

 

難得 "無牙" 嘅老竇都讚魷魚好腍，夠鮮味，好好食，梗係啦，放落滾水，
一見佢鬈起就立即撈起，前後都唔知有冇一分鐘！
 

Notes：
- 醃海鮮料時只需輕輕落少少鹽，因為海產本身已經有一定鹹味。

- 灼熟海鮮料時無需太長時間，約 1 - 2 分鐘即可，太耐會變得韌之餘，味道亦會全部
  溶於水內。

- 乾蔥頭用凍滾水浸過後可減低辛辣味道。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

印尼沙律配黃薑飯

        每年夏天，都總會至少整一次印尼沙律 Gado-Gado，皆因個花生沙律醬實在好食，非常惹味，喺炎熱天氣之下，原本無乜胃口都即刻變得胃口大增！

        記得第一次食呢個 Gado-Gado 係喺 Gordon 屋企食，因為佢媽咪係印尼華僑，好多時都會煮啲地道印尼菜。當時一食之下就即刻愛上，而且好鍾意佢嘅材料可以自由配搭，想用乜材料都得，最緊要係自己鍾意。
 

        今晚除咗整 Gado-Gado 之外，仲煮埋個黃薑飯伴食㖭！       

 

素菜米紙卷

        早排打開櫃摷嘢時，先至發覺原來仲有啲用剩嘅越南春卷皮，咁今晚用就用佢嚟整素菜米紙卷，攪攪新意思之餘，又唔駛淨食菜咁單調。

越南鮮春卷

        早前喺 Facebook 度見到老表 Tony 去越南旅行嘅相，其中有幅相係影咗越南春卷，心諗，佢喺越南食嘅春卷，應該夠哂正宗，夠哂地道啦，所以我就即刻問吓佢啲餡係咩料，有機會就可以跟住做。查實我好早之前已經買定包越南米紙，諗住有時間又 "興到" 的話就試吓整。

        講開越南米紙，原來都唔易買到，搵咗好多地方都無得賣，連屋企附近商場間「營多東南亞超市」都無得賣，好彩最後卒之俾我喺奧海城間「Taste」度搵到。咁啱最近老豆又喺農場度拎咗啲唐生菜返嚟，所以就 "的" 起心肝去整呢個越南春卷喇！

材料：
越南米紙
免治豬肉
唐生菜
紅蘿蔔
木耳絲
粉絲
金不換

醃料：
鹽
糖
魚露
粟粉
油

調味料：
魚露
紹酒
糖

- 豬肉用醃料醃好；生菜洗乾淨後摘去菜梗；粉絲用清水浸軟後洗乾淨。

- 紅蘿蔔刨皮後切絲；木耳絲用清水浸發後洗淨；金不換洗淨備用。

- 煲滾水，放紅蘿蔔絲及木耳絲入內汆水，之後盛起瀝乾水份。

- 燒熱油，放豬肉入鑊炒至半熟，灒酒，加入紅蘿蔔絲及木耳絲兜炒。

- 加入粉絲及調味料，兜炒至粉絲熟透後就將所有材料盛起。

- 米紙放入熱水內浸透，拎出後用抹手紙或毛巾索乾水份。

- 米紙上放上一塊生菜，再喺上面放上一片金不換及適量炒熟餡料。

- 先將米紙底部摺起，跟住左右摺入，之後再向上捲起收口即成。

啲有機生菜又嫩綠、又爽脆，用嚟做呢個春卷非常之夾，
蘸埋個酸辣魚露汁一齊食，學 Motonako.A 話齋，
真係正到無話可說呀！

 

        本來諗住一半就咁食，一半炸嚟食 o架，但係因為放工返到屋企已經好晏，費事再攪咁多喇，如果唔係十點半都未開得飯呀，留番下次先再試吓炸啦！

Notes：
- 浸米紙時唔好浸得太耐，否則會變得太軟身，易爛之餘仲好難包餡。

- 餡料可依個人口味而更改。

- 唔同牌子嘅魚露，鹹味濃度會有所不同，所以調味時記得試味。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！