呢個涼拌菜係參照 Jacky Yu 個口水雞食譜，再用自己嘅材料同做法整成。個涼拌醬汁真係唔講得笑，好似 Jacky Yu 咁講，整緊嗰陣時，聞到個味就已經狂口水分秘喇，哈哈！
材料：
雞扒
青瓜
粉皮
炒香花生
炒香芝麻
醃料：
鹽
紹酒
胡椒粉
涼拌汁料：
生抽 2 湯匙
鎮江醋 2 茶匙
紹酒 1 茶匙
白醋 少許
水 1 湯匙
糖 1/2湯匙
花椒粉 適量
薑蓉 適量
蒜蓉 適量
蔥花 適量
麻油 適量
辣椒油 適量
- 雞扒切去皮及多餘脂肪、洗淨，用醃料醃好，隔水蒸熟後切成粗絲。
- 青瓜洗乾淨，略刨皮及切去頭尾，開邊、去瓤，然後放入食物處理器內切片。
- 煲滾水，放入粉皮煮至透明，之後熄火，冚蓋焗至腍身，之後過冷河，瀝乾備用。
- 依序將粉皮、青瓜片及雞絲放入大碗內。
- 將涼拌汁料內全部材料拌勻，淋上材料上面，再灑上少量花生、芝麻及蔥花。
- 食時拌勻所有材料。
搭 Winnie 幫我買咗包水晶粉皮，望落真係好晶瑩通透，應該係外銷到日本賣。
但係我自己就覺得麻麻哋，因為口感太過煙韌有彈性，
都係鍾意食傳統粉皮多啲。
其實我係整嚟當做一味餸，但原來啲粉皮都幾飽肚，
單獨當成北方涼麵嚟食都得呀！
夏天食最啱, 唔該晒
回覆刪除[版主回覆07/04/2013 12:46:35]係呀，食完透心涼！
唔使客氣喎！
請問邊度有粉皮買呀??
回覆刪除[hon amy回覆07/15/2013 02:09:40]OK
[版主回覆07/04/2013 12:47:53]超市同雜貨舖都有賣㗎！不過未必係呢隻牌子。
您呢個餸好吸引呀，特別是汁醬，謝謝您的分享，我也準備試吓整您那自製芝麻醬。
回覆刪除另外，分享一個唔洗抹碗方法，我每洗乾淨Ｄ碗碟後，用Ｄ滚水過下，之後反轉放一陣，就乾哂，唔洗抹就可放番入櫃喇，你可以試吓，睇吓是否好Ｄ。
[版主回覆07/04/2013 12:52:23]個涼拌汁真係好惹味，聞到都已經流口水喇！
試吓整個日式芝麻醬啦，唔難整，係煩少少同要多少少耐性啫，不過起碼自家製作無添加劑，仲可以調校自己鍾意嘅味道。
都係一個好方法喎，考慮一下先！多多謝妳分享呀！
Jenny 呀，妳張相都好吸引啫！！
咦,我好少食粉皮都唔知係乜口感,但我鐘意冷麵粉皮就無打算整喎,但芝麻醬勁有興趣學.咁熱天氣食此食品格外舒服又心涼
回覆刪除[版主回覆07/07/2013 19:40:24]粉皮好食㗎，同冷麵完全唔同食法！妳可以想象成扁而闊嘅粉絲。
夏天食涼菜一流，我都愛傳統粉皮！
回覆刪除[版主回覆07/07/2013 19:38:34]係啦，夏天咁鬼熱！