2016年4月26日星期二

素烤鴨沙律

        近排其實無乜動力做嘢,乜都唔想做,連瞓都唔想瞓。但唔煮又無得食,尤其係夜返嘅時候,隔夜餸就變得好珍貴,唔使煮,翻熱就即刻可以食,所以習慣咗一餐煮埋兩餐食,幾唔想整都係要整!
 
        好彩天氣開始熱,買啲生果蔬菜整沙律都可以,只需要洗洗切切,唔使開火煮食已經慳番唔少功夫,連鑊同煲都唔使洗!整緊蔬果嘅同時,放件素烤鴨入焗爐焗到個面脆卜卜,之後再灑上焗香咗嘅花生同椰絲,攪掂,好好醜醜又一餐!
 
 

2016年4月24日星期日

橙汁蜂蜜雪芳蛋糕 Orange Honey Chiffon Cake

         幾個禮拜前上網睇 HKTV 一個清談節目,節目臨完結之前,主持人劉玉翠介紹嘉賓周家怡睇一本書,書名係《愛他也要愛自己》,周家怡當堂即刻喊哂,眼淚完全不受控制。係咪我其實都要搵下呢個世界會唔會有本書叫做《對人好也要對自己好》呢!?睇完之後可能就唔會再俾你哋話我要學識對自己好啲、要錫自己多啲,唔好淨係顧住人感受,我諗我依家會更加清楚知道,當年媽咪話我「只會窮自己而唔會窮人哋」呢句說話嘅真正含意!
 
        無工開,無嘢好做,就自自然然會諗好多嘢,的確,教緊學生、做緊家務、上緊網時係完全無機會俾自己去諗嘢。好啦,就學你哋咁講,得閒就整吓嘢食,唔好俾自己個腦咁 "得閒"!
 
        有日無聊拎起本《我愛和風洋菓子》嚟睇,見到個橘子蜂蜜戚風蛋糕食譜,咁啱早兩日十五又將供過佛嘅橙換咗嚟,咁就索性整呢個蛋糕啦!橘子蜂蜜我就無喇,只係用老竇拎番嚟嘅蜂蜜,係佢個農場 friend 自家出品,同埋部份低筋麵粉我都用咗全麥麵粉代替。
 
 

2016年4月22日星期五

警署

        仲以為呢世人都唔會有可能踏足警署㖭!又唔係俾差佬盤,又唔係領好市民獎,仲要唔見錢,真係越窮就越見鬼,帶埋錢打工!!