2016年2月15日星期一

健脾番茄小米粥

        如果頭腦清晰兼無老人癡呆的話,咁你都應該會知道我家有個習慣,就係人日唔知點解會煲粥煎糕食!?雖然唔多明白點解會咁做,但我依舊年年照做,因為想將媽咪所做嘅嘢一路 keep 落去。
 
        呢個粥係之前睇電視嚴浩導演其中一條方,係一個健脾開胃養生粥,當時我只係抄低咗材料,無記低點整,所以我都係純粹用自己個方法去煲咋!導演條方原本係有落到瘦肉,但我就無喇,只係用香菇粉提味,我仲加埋原片燕麥一齊煲
 
 

2016年2月14日星期日

泡菜蘿蔔海帶湯

        早幾日煮咗個韓式泡菜湯,因為新正頭買餸唔方便,所以最好就係用啲屋企本身已有儲備嘅食材,加上依家買菜貴都阿媽都唔認得,買白蘿蔔就最啱,又平又合時,正所謂冬食蘿蔔夏食薑,中醫角度天冷食白蘿蔔對健康有益㖭!加幾隻韓國生蠔,夠哂美味喇!!
 
        原本一心係買豆腐整嘅,不過初三嗰日街市好多檔口都未開,而且我教完琴都已經夜,有開檔嘅豆腐檔都已經買哂,咁就唯有改用初一煮南乳齋用剩嗰棵津菜代替啦!
 
 

2016年2月12日星期五

物盡其用

        整雪芳蛋糕因為要用多額外一隻蛋白,但我又唔想開多隻蛋,所以我習慣係解凍冷宮嘅蛋白加落去,但因為無整得耐,完全無咗呢回事,所以唯有迫住開多隻蛋!
 
        夾硬開多隻蛋,自然就多咗個蛋黃出嚟,所以就連埋班蘭汁撇出嚟嘅水整咗 pancake;用剩嘅椰漿同整烤雞沙律剩低落嚟嘅金不換就用嚟燜南瓜,一啲都唔浪費㗎!
 
 

烤雞三角豆沙律伴檸檬芥末醬

        往年媽咪喺度時,大年初一就一定食齋,年初二就會食番肉,印象中好似會有雞、海參,間中會有 zaak6 年嘅煎釀鯪魚。但係依家自己煮就好少會煮肉喇,前幾日初二貪得意又食肉開年,不過都係簡單一件雞扒啫!
 
        呢個沙律其實係好耐之前睇 Gordon Ramsay 個節目度學番嚟,不過就自己改咗少少嘢,因為原本某啲食材唔易買得到呀!
 
 

老表的新年禮物

        以往過年玩 "交換禮物",大家都係以長輩為目標去買嘢,但呢幾年老表就改咗買嘢俾我,因為知道我老竇都唔知有無機會享用到,與其係咁,倒不如索性買啲我啱用嘅嘢更加實際。
 
 

新春班蘭雪芳

        其實我自己一向都唔太 buy 雪芳蛋糕,因為覺得太軟身、太濕潤,唔係我杯茶,我始終都係比較鍾意磅蛋糕同 muffin texture,但唔知點解次次整嚫班蘭雪芳蛋糕,啲人都係極之欣賞同讚賞!咁重好,一來易整,二來輕身好多,拎出街都唔使咁重。
 
        所以今年就整嚟拎去老表家團拜。
 
 

2016年2月8日星期一

猴年新春

恭喜發財,新年快樂!!
   各位 blog
 
身體健康
生活愉快
事事順利
心想事成
社會少啲爭拗
世界啲紛爭
 
 

2016年2月7日星期日

老友的新年禮物

        聽日就係農曆大年初一,我諗家家戶戶都會好忙,忙住攪呢樣攪嗰樣,又要忙煮餐團年飯。我自己今年就相對無咁多嘢迫埋一、兩日內做,因為今年多時間量地同拍烏蠅,所以可以將啲嘢分開好幾日去預備,而且又唔使團年,又唔使 "年廿八",噚晚收工返到屋企攪掂哂就浸定少少初一煮齋要準備嘅材料,今日全部洗乾淨哂,聽朝就變相無咁多嘢要做,應該趕得切午時前上供。除此之外,今日仲整定個蛋糕聽日帶過去老表家團拜。
 
        今年收到兩位老友 LouisaErnest 媽咪送嘅新年禮物,全部都係 Louisa烘焙學校嘅出品。
 
 
 

2016年2月2日星期二

天文數字

        見雪櫃仲有啲秋葵同 1/4 個洋蔥喺度,諗住買包四季豆返嚟炒埋一碟,點知貴到唔捨得買,差唔多貴一倍咁滯!其他蔬菜都要起碼二、三十蚊斤,問勻哂成個菜檔所有蔬菜嘅價錢咁滯,都真係幾得人驚,簡直係天文數字,無樣買得落手,好彩同個菜檔阿姐熟,如果唔係問完哂都唔買的話肯定俾佢 bing2 鑊甘兼粗口問候!!