新春班蘭雪芳

        其實我自己一向都唔太 buy 雪芳蛋糕，因為覺得太軟身、太濕潤，唔係我杯茶，我始終都係比較鍾意磅蛋糕同 muffin 個 texture，但唔知點解次次整嚫班蘭雪芳蛋糕，啲人都係極之欣賞同讚賞！咁重好，一來易整，二來輕身好多，拎出街都唔使咁重。

 

        所以今年就整嚟拎去老表家團拜。

 

 

材料：
班蘭葉                 6 – 8 片
低筋麵粉             80 克
蛋黃                     3 個
糖                        70 克
橄欖油                 30 毫升
班蘭汁及椰漿      合共 70 毫升
蛋白                     4 個

- 班蘭葉洗乾淨後剪碎，放入攪拌機內，加少量水攪打成班蘭汁。

- 將班蘭汁同葉碎過篩入容器內，放入雪櫃沉澱過夜。

- 用匙羹將面層較為清的水份撇走，留低下層比較深色嘅班蘭汁，待用。

- 麵粉過篩 2 次；蛋黃打散，加入 20 克糖拌勻，之後拌入橄欖油。

- 加入班蘭汁，之後倒入椰漿補至 70 毫升，拌勻；篩入粉類，均勻攪拌成麵糊。

- 蛋白用電動打蛋器打至起泡，之後將剩餘嘅糖分 3 次加入，打成八成企身嘅蛋白霜。

- 先將 1/3 份蛋白霜加入麵糊內，徹底拌勻，然後將剩低嘅蛋白霜分次輕手拌入。

- 將麵糊倒入模內，然後喺枱面輕敲數下，釋出較大氣泡。

- 放入已預熱至 180 °C 嘅焗爐內焗約 30 分鐘，出爐後立即倒扣攤凍，之後脫模。

以上材料份量可做直徑 17 厘米蛋糕 1 個。

班蘭葉唔好打得太過碎，經驗話俾我知太細碎的話，

班蘭汁會好難沉澱分層，應該係因為葉嘅

組織微粒太輕身，好難沉底。

用比較闊口嘅容器裝班蘭汁，會容易啲將面層水份撇走。

因為老表家係個大家族，人多世眾，所以我無好似平時

咁將個底切平到靚靚，怕唔夠咁多人分呢！

連兩位老人家都大讚好食，話夠軟熟，又唔會

鋪滿哂 cream，食落無咁膩。