初一全素公司治

        呢件公司治係我今日嘅第二餐，平時整的話我會加煎蛋，但因為今日係初一，所以食得更加清，連蛋都唔會食。

 

 

窮人刺身，素食魚生！

        好耐好耐之前，印象中好似係媽咪話俾我知，以前日本啲窮人食唔起刺身，會用牛油果代替，望梅止渴吧，皆因剛好熟透嘅牛油果，口感軟滑豐腴，食落口真係有幾分似食三文魚刺身呀！

 

咖啡西多

        早前睇到電視一個飲食節目介紹一間本地新開嘅創意甜品店，其中有樣食品叫做咖啡西多。傳統整西多都會用奶去開蛋漿，我自己因為唔飲奶，當然就會用小量水去開啦！呢間甜品店仲犀利，用咖啡去開蛋漿，等我又試吓先！。

 

 

素公司治

        平時我都好少出街食，兩餐多數都係自己煮，一來當然係慳錢啦，二來就係一向都唔多鍾意出街食。之但係咁，始終都係有機會要喺街外食嘅，由朝到晚都喺街的話就迫住要出街食喇！

 

        以我嘅生活習慣，出街食的話好彩都夾到 tea time 時間，我都多數只會去快餐店攪掂，因為都仲可以 $2X 醫飽個肚。好多時都會叫公司治，飽肚得嚟又相對比較健康，少肉少油。近日行經某快餐店門口，經過時望到入面個餐牌，一份公司治原來已經加到成 $30 一份，以呢個價錢去食幾塊薄薄麵包同雜菜，真係唔多值，我唔想同食店交租囉！！反正自己整都無難度，應該係零難度先啱呀！

 

 

韓式泡菜煎餅 Kimchijeon ( 김치전 )

        見好耐都無用泡菜嚟整嘢食，今日又試吓用嚟整煎餅。

 

 

焗爐版 Fish & Chips

        炸魚薯條呢樣嘢真係無諗過自己整，因為我由細到大都唔係太好煎炸食物，但最主要原因都係要開鑊油炸，係我至憎做嘅動作！好耐之前已經知道咗薯條可以用焗爐做成免炸少油版，而最近又喺 Masa 個網站度見到連可樂餅都可以用焗爐做到，真係超吸引，一定要試試！

 

        傳統 Fish & chips嘅炸魚應該係用脆漿包住魚柳嚟炸，但係要入爐焗的話就無可能用脆漿喇，所以唯有用吉列做法啦！

 

 

希臘乳酪製作方法 Homemade Greek Yoghurt

        之前整豆漿乳酪時，咪話明白點解有啲食譜會加粟粉，而且絕大部份人都會加工成希臘乳酪，都係因為成品比較稀，質感欠奉，所以我都嘗試將佢製成希臘乳酪。

 

       呢個希臘乳酪製作方法並非只係適合用豆漿整嘅乳酪，傳統用牛奶嚟整嘅乳酪都可以同樣加工㗎！

 

 

豆漿乳酪 Soy Yoghurt

        上網搵 vegan 食譜及奶類製品代替品時，無意中發現原來用豆漿都可自製乳酪，唔一定要用牛奶，咁就又一天大喜訊哦！而且製作方法都好簡單，所以我又趁高興玩吓先。

 

       自家製作乳酪，最重要係控制好溫度，40 - 50 ℃ 之間係最理想，最適合乳酸菌發酵。噚晚煮完飯之後，用溫度計度吓電飯煲個溫度，咁啱餘溫正正就係 40 ℃，咁我就索性放入去發酵過夜。因為呢次係第一次實驗，所以無自己煮豆漿，免得失敗時浪費我啲時間同功夫，買咗盒原味「鈣思寶」嚟做試驗。結果係點？係成功嘅，不過效果唔太理想，都幾稀！可能自己煮豆漿會好啲，商業產品就梗係水份多過黃豆㗎喇！之但係咁，我就從中明白到兩樣嘢：點解好多食譜都會落粟粉去整，同埋好多時整 homemade yoghurt 都會做多重功夫，將佢整成 Greek yoghurt 囉，唔係自己落手落腳整過都唔會知箇中因由！

 

 

蒜香脆麵包粒 Croutons

        前幾日個 “試機包” 因為係用直接法整，所以老化得比較快，變得比較乾嚡。平時有嚫隔夜麵包我都係會整麵包布甸或者煎西多，但係次次都係整呢兩樣，整得多都悶！啱啱學識咗整 croutons，以後啲隔夜麵包又多個出路喇！

 

        上網見到好多網友都各施各法，睇埋 Youtube 就仲多變化，最後我就綜合咗好幾個我認為比較好嘅方法嚟集大成，效果唔錯，真係又香又脆呀！

 

香煎黃豆餅配參巴辣椒醬

        呢個小食係喺 Ernest 媽咪度偷師學番嚟，非常易整，鍾意食香口煎炸嘢嘅朋友不妨一試呀！

 

雞肉沙爹

之前整咗樽沙爹醬，一次過食唔哂，之後就將佢收入 “冷宮”，但因為擺得太耐，對呢位 “佳麗” 完全無咗件事，直到最近摷冰格時先摷番佢出嚟。咁就跟手拎埋塊雞扒出嚟解凍整雞肉沙爹先！

材料：
急凍雞扒
沙爹醬
檸檬汁

 

醃料：
生抽
鹽
糖
紹酒
胡椒粉
黃薑粉
咖喱粉
芫荽粉
五香粉

 

- 雞扒解凍、洗乾淨，用抹手紙索乾水份。

- 將雞扒側邊多餘脂肪切去，之後連皮切成粗條。

- 用醃料醃 2 個鐘或以上至入味。

- 長竹簽浸水，之後將雞肉逐條串好。

- 雞肉串放上烤架上，放入已預熱至 200 ℃ 嘅焗爐內焗10 分鐘。

- 將雞肉串反轉，再焗多 5 – 10 分鐘至雞肉熟透。

- 食前將檸檬汁灑上雞肉串上，之後蘸沙爹醬伴食。

原本將雞肉串放喺烤架上焗係最好嘅，一方面可以上下均勻受熱，多餘油份
又可以滴落架下烤盤，食得健康啲，但係之後洗個架都真係唔易，
所以我都係偷懶放喺搽過油嘅錫紙上算喇！

色、香、味俱全，買相絕對唔差㗎！睇嚟我都可以
推車仔喺街度賣沙爹賺啲外快喎！

Notes：
- 浸過水嘅竹簽可避免於爐內烤焗時烤燶。

- 串雞肉時，竹簽每穿過雞肉一次就將雞肉兜圈繞過竹簽，令雞肉更加牢固於竹簽上，不易移位。

- 沙爹醬做法，請參閱《自家製沙爹醬》。

香蔥香腸班戟

噚日去買菜時，菜檔阿姐又俾咗一大棵蔥我，就算整完蔥花都仲有大把剩，之前啱啱先整完蔥油餅，又唔想咁快再整多次，突然忽發奇想，之前整過鹹蛋糕，不如試吓整鹹 pancake 都好喎！

 

材料：

低筋麵粉 120 克

泡打粉 1/2 茶匙

梳打粉 1/2
茶匙

鹽 1 茶匙

糖 2 茶匙

黑椒粉 少許

雞蛋  1
隻

水 約 100 毫升

香腸 1 條

蔥花 適量

- 所有粉類混合過篩，之後加入鹽、糖同黑椒粉拌勻。

- 雞蛋拂打成蛋液，加水混合好，再加入粉料攪拌成麵糊。

- 香腸切片後連同蔥花一齊加入麵糊內拌勻，

- 麵糊靜置 15 分鐘。

- 燒熱平底鑊，勺入適量麵糊，用慢火煎至出現氣泡。

- 將班戟翻轉，煎至全熟後盛起。

- 餘下麵糊依同樣方法煎熟。

哈哈，估唔到效果都唔錯喎，有啲似中式薄罉風味哦！

Pancake 入口鬆軟，有蔥香亦有香腸嘅鹹香。

Notes：

- 水份用量可依班戟厚度而作出調整，水份越少，麵糊越稠身，可以煎到較厚班戟。

豆渣燕麥條 Soybean Dreg Oat Bar

        整一次豆漿之後，就可以利用佢變化出唔到嘅食法，配蔥油餅食啦，做成 panna cotta，煮完豆漿剩低落嚟嘅豆渣都唔好浪費，營養豐富，用佢嚟整燕麥條就最好不過喇！

        其實燕麥條都已經整過好多次，不過今次又試試另一種方法，用糖膠代替蜜糖之餘，仲加入咗麵粉一齊整，效果都唔錯呢。

玉子燒 Tamagoyaki

仲記得我早前去「JUSCO Living Plaza」度買個貝殼蛋糕模同玉子燒煎 pan 嗎？( 都真係好早前喇，依家人哋都唔再叫做 「JUSCO」，改咗做「AEON」喇！) 個蛋糕模就已經用過啦，而個煎 pan 就今日剪彩喇！

木魚花水

 

材料：
木魚花 3 克
水 100 毫升

 

- 將材料放入煲內煮滾，之後轉慢火煲 5 分鐘。

- 熄火後冚蓋焗5 分鐘。

- 攤凍後過篩隔走木魚花即成。

 

 

玉子燒

 

材料：
雞蛋 4 隻
糖 15 克
鹽 1.5 克
味醂 1/2 茶匙
清酒 1/2 茶匙
木魚花水 90 毫升

 

- 除木魚花水之外，將所有材料放入碗內拂打成蛋液。

- 加入木魚花水，再輕輕拂打至完全混合。

- 燒熱煎 pan，用索滿油嘅廚紙薄薄塗上一層油。

- 將適量蛋液倒入煎 pan 內，煎成薄薄一塊半生熟蛋皮。

- 之後用筷子兼配合拋鑊動作，將蛋皮捲成長形，然後推至煎 pan 斜面的一邊。

- 再次用廚紙塗油，倒入適量蛋液，煎至半生熟時就以相同手法將原先煎好的蛋向後捲起。

- 重覆以上步驟直至蛋餅捲到適合厚度即可。

大家明唔明我講咩呢？唔明唔緊要，睇片啦，我都係咁樣學番嚟㗎咋！

呢個係餐廳大師傅示範片段。

而呢個就係靚仔廚師示範家庭式小份量做法。

原來煎玉子燒最難係用筷子將蛋皮捲起，可能呢個方法係有經驗師傅
先會咁做，我呢個新丁都唔識死，照樣跟住做，所以整到個蛋餅
爛爛哋，下次再整時都係用番鑊鏟會比較好啲，
起碼力度可以比較平均。

第一次整兼用隻 cheap cheap 煎 pan 嚟整，都可以整到
呢個樣，我自己覺得收貨㗎喇！

將玉子燒切件後就可以用嚟包壽司喇！

Notes：
- 煎蛋皮時用筷子將氣泡 “篤” 穿，咁就可以煎出平滑蛋皮。

- 第二次及其後再倒入蛋液時，記得將原先煎好嘅蛋餅稍為抬高，等到蛋液可以流入蛋餅
  底部。

關東煮

關東煮都已經整過兩次，不過兩次都係味噌關東煮，今次就參考咗著名料理師傅盧悅基師傅嘅食譜用醬油整關東煮，自己再加加減減啦！

材料：
雞蛋
豆腐
白蘿蔔
黑蒟蒻
竹輪卷

 

湯底材料：

日式木魚湯包
昆布
濃縮雞汁
日本醬油
味醂

- 雞蛋烚熟，剝殼備用；豆腐放滾油內炸至金黃香脆，盛起後再汆水、過冷河。

- 蘿蔔刨皮後切件，用清水煮至腍身；蒟蒻切件，放滾水內煮 2 分鐘。

- 湯包同昆布凍水落煲，大火煲滾後轉中火煮 10 分鐘，然後將湯包及昆布拎出。

- 加入濃縮雞汁、醬油及味醂拌勻，除竹輪卷外，所有材料放入湯底內用中火煮半個鐘。

- 熄火後等到整煲完全攤凍，加入竹輪卷，用中火煮至材料入味即成。

呢包係加入咗海草類食材製成嘅黑蒟蒻。

唔係講笑，真係超好味，個湯底超清甜，連無味無道嘅蒟蒻
都入哂蘿蔔嘅清甜味，食剩嗰啲連埋個湯底
一齊煮烏冬肯定勁正呀！

加埋自家製辣椒油一齊食，唔單只正到無朋友，
簡直係好味到阿媽都唔認得呀！！

 

Notes：
- 原食譜係用木魚花及雞髀骨去煮湯底，其份量為：

木魚花 100 克
   昆布   15 克
   雞髀骨 1 隻
   水 600 毫升
   醬油   30毫升
   味醂   30毫升

雞髀骨同昆布凍水落煲，大火煲滾後將昆布拎出，加入木魚花轉中火煮 10 分鐘，然後將木魚
    花同雞髀骨拎出，然後再加入醬油同味醂。。

- 想方便的話，可買現成炸豆腐。

- 由於竹輪卷比較易煮腍，所以第一次煮時唔會加入一齊煮。

- 熄火攤凍後再煮可令材料更加入味。

鬆軟厚 pancake

Pancake 好多時都會整，尤其係當晏晝嗰餐重未有著落，個人懶起上嚟唔想攪咁多，但屋企一下子又無乜材料存貨時，我就會煎 pancake 嚟食，貪佢簡單方便又快趣嘛，除非屋企連雞蛋麵粉都無啦！

 

我一直都好想整到厚厚 pancake，試過好幾個食譜都唔係好得。一次上 Youtube 睇嘢時無意中發現有個教整 pancake 嘅 video，原來係 Ricky Cheung 教整無花果熱香餅，見到佢嘅成品都幾厚身，抱著即管一試嘅心態去整，點知真係做到心目中嘅厚 pancake，而且質感都唔錯，好鬆軟㗎，所以想同大家分享一下個食譜。

 

材料：
自發粉  70 克
泡打粉  1 克
糖  20 克
菜油  10 克
蛋液  60 克
水  20 毫升

- 先將粉類、糖同油拌勻，之後加入蛋液同水，攪拌成軟滑麵糊。

- 燒熱平底鑊，將適量麵糊勺入鑊內，用匙羹背喺麵糊上輕手打圈，將麵糊推開。

- 當麵糊表面產生氣泡後就將佢翻轉，煎至另一面都金黃、熟透，即可上碟。

 

食譜出自 Ricky Cheung嘅無花果熱香餅。

咁樣整嘅 pancake 除咗鬆軟之外，蛋香味亦比一般做法香濃好多，
真係值得推介呀！

 

Notes：
- 原食譜係用軟牛油及奶，我自己就改為菜油同水；無自發粉的話，可用 70 克低筋麵粉加 3/4
  茶匙泡打粉代替。

- 一隻雞蛋一般都會係約 50 克重，如果唔想為咗 10 克蛋液又去打多隻蛋，可以加入同等份量
  清水代替。

- Ricky Cheung 建議麵糊唔好攪太耐，否則麵糊起筋就唔可以做到鬆軟效果。

- 煎麵糊時最好用中慢火去煎，如果火力太猛的話，會容易煎燶，成品亦較為乾身。

泡菜薄罉

今日雖然 day-off，但我都校咗鬧鐘十點起身，諗住可以做吓嘢，唔好浪費時間。

 

鬧鐘響咗，撳熄，繼續瞓；瞓到十一點零鐘醒咗，同自己講，再瞓多陣㖭啦，反正又唔使教琴；到十二點零鐘再醒，都仲係唔願起身；卒之瞓到點零鐘又醒，唔起身都唔得喇，已經嘥咗成三個鐘喇！但查實都仲係唔多願起身囉！！

 

起身梳洗過後，做完早課 (其實已經係晏課)，攪掂埋其他嘢已經兩點零鐘，”嗱嗱林” 落街買餸，返到屋企都差唔多三點鐘喇，咁就已經無咗半日喇，唉！！

 

原本諗住今日得閒，可以整辣椒油同糖漬橙皮嘅，依家個人都仲係好攰，又無乜時間同 mood，都係唔整喇，快手整個
brunch 食罷啦！

 

材料：

泡菜
適量

韭菜 適量

蔥    適量

高筋麵粉 100 克

低筋麵粉 100 克

糯米粉   50 克

鹽    3
克

糖   
10 克

水   
約 170 毫升 (連適量泡菜醃汁在內)

韓國辣醬 1 湯匙

 

- 泡菜切細；韭菜同蔥洗淨後切細段，備用。

- 所有粉類、鹽同糖用打蛋器攪拌混合，之後逐少加入泡菜醃汁及水開成麵糊。

- 加入辣椒醬，繼續用打蛋器攪拌至辣醬完全溶於麵糊內。

- 將泡菜、韭菜同蔥加入麵糊內，攪拌均勻。

- 燒熱油，將適量麵糊放入平底鑊內，用中慢火煎熟。

- 當麵糊邊緣煎至乾身及離鑊時就可以翻面。

- 繼續煎至完全離鑊即可，切件上碟。

當麵糊煎到咁樣，邊緣離哂鑊就可以翻轉煎另一面喇！

味道調得啱啱好，唔會太辣，食到泡菜同韭菜嘅爽口，仲有淡淡嘅
韓國辣醬風味㖭！不過我就覺得質地略為黏口，
下次要減少糯米粉至得。

Notes：

- 如果有中筋麵粉的話，可直接取代高、低筋麵粉使用。

- 鹽、糖、辣椒醬嘅用量可依個人口味調整。

- 依呢個粉類比例做出嚟嘅薄罉，質地會略為軟糯黏口，如果唔鍾意的話，可減少糯米粉用
  量，以麵粉代替即可。

- 製作泡菜方法，可參考《自家醃製韓式泡菜》。