2016年6月28日星期二

biscotti 送禮

        好耐都無整 biscotti,如果唔係因為要送俾人的話,我真係唔會整,攪到自己今日咁鬼死忙、咁多嘢做!
 
 

自家製味噌三角豆醬 Homemade Miso Hummus

        第一次試 hummus 係上次 Ernest 媽咪請我食,當時覺得味道比較酸,唔係我杯茶,如果有機會自己整的話一定唔會整到咁酸。
 
        有次 Nigella fans page 度見到個 white miso hummus 食譜,覺得幾特別,係日本同中東 crossover,而且味噌係我雪櫃內嘅台柱,既然有哂基本用料,就即管試吓!正宗嘅 hummus 係會用到 tahini 芝麻醬,我就懶得自己打喇,用日式芝麻醬代替就算,況且本身已經有少少酸味,檸檬汁都可以慳埋,反正我都唔想太酸!
 
 

2016年6月27日星期一

素代葷食

        素友最鍾意用牛油果加醬油同 wasabi 魚生刺生咁食,嘅然係咁,不如就用牛油果嚟整個素魚生飯做第二餐啦!:x
 
       第三餐有乾燒伊麵同綠豆沙,個乾燒伊麵同樣都係素食版,之前一向都係用開蠔油同蝦子煮,今次就改用赤味噌。原本都想用番韭黃嚟整,但行勻成個街市檔檔都係斷紮賣,為咗少少買一大紮,我真係唔會咁做,喺冰格拎啲蔥段嚟用算數!!
 
 

2016年6月25日星期六

醬油漬脆青瓜

        第一眼見到 blog Honney 整脆瓜時,我即刻同自己講呢個一定要試整,又好食又易做,唔整都對唔住自己!點知老人癡呆又發作,之後完全無咗回事。直到見到對方再整櫻花蝦漬青瓜時先再醒番起,於是就即刻買青瓜整,費事又再唔記得!
 
        好喇,放咗入雪櫃醃之後,又試咗件事,成個禮拜後,打開雪櫃拎嘢時,見到有樽類似可樂嘅物體,左諗右諗先醒起係樽脆瓜,你話係咪真係死得呀!!
 
 

2016年6月22日星期三

與素友見面

        同人出街食飯,一定係只會我就人口味,叫佢選擇自己想食嘅嘢,從來都唔使人去就我,因為其實我乜都係咁食,又唔太計較好味與否,總之食得落肚就得㗎喇!我成日都提住喺口唇邊,呢個世界仲有啲人係連飲啖乾淨清水都係一種奢侈,真係唔好食得咁 "招積"!!我唯一唔食嘅嘢就係有臊 / 羶味食物,偏偏呢類食物就涵蓋甚廣,牛肉啦、奶類製品啦、羊啦、鴨啦、鵝啦 ……… 而且我由細到大都唔係食肉獸,飲食習慣都以蔬菜為主,所以攪到成日俾人話我揀飲擇食、偏食,後來喺「素食青年」群組度見到好多素友分享類似經驗,先知道原來其實都係一種對飲食習慣嘅歧視,好多素友都覺得好煩惱,甚至有諗過放棄食素,因為真係受唔住身邊人嘅 "指控"。呢個世界真係好多人唔識得尊重同包容人,永遠都硬係要將自己嗰套加喺人身上,做得到就認同你,做唔到呢?呵呵,咁你就慘囉,注定一世俾人話!!難怪輔導姑娘都同我講話我無錯,只係世人問題。所以我都習慣咗自己就人好過要人就我,如果咁啱嗰日係要食齋的話,我就一定唔會應約,費事煩,人家知道你要食齋,就好自然話會就我,但其實對方係唔鍾意食素的話,食得唔開心、唔暢快咁去就我的話,咁就無謂啦!
 
        最近喺群組度識咗個素友,大家都好啱傾之餘,原來仲住埋同一區,噚日就約咗嚟見面,素友帶咗我去市中心間「友間齋舖」食 tea 兼傾偈,今次就唔使互相遷就對方口味都可以食得舒服,食得開心,同埋又再一次證明,搵人傾偈真係要搵番同人星球嘅人先好傾,真係舒服好多,可以講到真心嗰句出嚟!
 
 

2016年6月20日星期一

是日三餐

        真係唔到你唔信,呢幾日開始食番足一粒份量嘅藥,個人即刻輕鬆得多,今日心情仲幾好,好到有心情做無謂嘢,幫三餐影哂寫真!
 
 

2016年6月14日星期二

罐頭鯖魚

        早排去超市買嘢時無意中俾我見到有罐頭番茄鯖魚賣,一見到罐嘢就即刻諗起 Manngchi camping stew,見罐鯖魚又唔係貴,幾蚊雞買一次試吓再整多次,順便清埋啲泡菜,咁就可以重新再醃過新泡菜喇!
 
 

2016年6月9日星期四

紫米素粽

        學老表話齋,原來唔經唔覺已經九年!!
 
        近呢幾年,無論我去探佢定係同人講起件事,我都已經無再有好傷痛嘅感覺,無再喊,無再流淚,但原來其實自己都仲係未完全放得低,噚日去探佢時,睇睇吓張相,又試不其然咁流淚,證明我呢段時間情緒真係好唔好!
 
        同輔導姑娘傾偈時,呢個話題一定走唔甩,因為呢樣嘢先係主角,為今時今日嘅我正式揭開序幕!同姑娘傾傾吓都可以泣不成聲,完全講唔到落去,真係無諗過自己個反應會咁大,仲以為 "泣不成聲" 只係當年警察及醫護人員正式將佢帶走,真真正正咁離開咗我,知道我倆永遠分隔兩地嗰一刻先會出現!記得姑娘當時都話已經相隔咗咁多年,依家提番起都仲係咁傷痛,仲問咗我一句:「你無事嘛,你得唔得?」不過,姑娘話俾我聽,其實媽咪一直都同我繼續生活緊落去,因為原來我一直都帶住媽咪嗰一份信念去生活,所以先至會對一路不斷遇到唔開心嘅事變得 "麻木"、"理所當然",感覺上唔覺得係一件咩事,但其實始終都係對我有一定影響!
 
        學識包粽之後,以後每年我都會包素粽送俾媽咪,就當係我倆一齊 "做節"
 
 

2016年6月7日星期二

混血 bagel

        今日整咗個混血 bagel,老竇係 bagel,阿媽係 focaccia,你哋明唔明我講乜呢!?!?
 
        其實係將整 focaccia 嘅副材料,包括新鮮迷迭香、橄欖、蒜蓉同黑椒全部擺哂落去個麵糰度一齊搓囉!