柑桔果醬

    睇番啲舊 blog，發覺原來已經有成年無整過果醬喇，對上一次整果醬都係為咗清年桔而整，今年都唔例外，同樣因為呢個原因而整咗柑桔果醬。

今朝啱啱先整好嘅果醬，依家正在攤凍中。

老竇今年喺農場 friend 個年宵攤檔度拎咗好多龍膽桔返嚟，咪睇佢咁青
BB 咁款，其實果皮非常之清甜，但果肉就比較酸喇！

用咗約 600 克嘅柑桔整咗4 樽果醬，依家都仲剩番
差唔多成千克咁多，應該會再整多一轉。

晏晝等到麵包出爐時，即刻用新鮮即製果醬搽麵包食，正！

   如果大家都想整呢款果醬的話，不妨參考番柑桔橙皮果醬嘅做法啦！

新年糕、糕、糕

    今年初二同初三都得閒喺屋企，不過都係嗰句，放假喺屋企仲忙過返工，何解？咪就係匿喺個廚房度做嘢囉！

 

    今年蒸咗三底糕，有鹹有甜，最開心嘅係每底糕都只用咗 20 分鐘就蒸好，你哋唔好以為我蒸咗迷你版嘅糕呀，所以咁快就蒸好，查實係因為用咗真空煲去蒸，真係勁慳柴火之餘又環保。不過就有辣有唔辣喇，因為個真空煲闊度有限，唔係任何形狀嘅模都放得入，想用個長形模蒸就免問喇，除非係細嘅磅蛋糕模啦！

 

今年蒸咗底素蘿蔔糕，咁就可以用嚟供佛同埋同媽咪分享。

五香臘味芋頭糕就梗要 encore o架喇，因為上年老竇讚好食過街賣嗰啲。

 

甜糕就整咗黑糖薑汁年糕，味道暫時唔知，食完再同大家分享啦！

 

龍年新春大吉

 

恭喜發財！

Kestrel 喺度恭祝各位 blog 友

新年快樂，身體健康，生活愉快！！


今年老竇個friend 用利是封整咗啲賀年吊飾，又靚又有氣氛。

呢盞花燈整得好靚，我好鍾意呀，希望大家都

紅運當頭，福星高照！

呢條金魚仔好cute、好得意，特別係尾部，做得好有神緒呢！祝各位

財源廣進，年年有餘！

大年初一，一如既往，代媽咪燜好南乳齋就上供，之後同老竇食過午飯
就出動拜年喇。希望今年大家都能夠

出入平安，事事順景！

Louisa 的班蘭雪芳蛋糕

好開心 Louisa 最近轉形創業成功，有自己嘅生意之餘，而且成績都唔錯，又一次證明 “塞翁失馬，焉之非福” 係無錯，證明俾佢之前個衰老闆睇，無咗佢份工都唔可惜！

 

    Louisa 依家主要售賣各式食材，代理意大利五層焗爐之餘，仲會接 order 幫客人整蛋糕同曲奇，生意都好好，佢話呢個零月已經整咗超過 40 個班蘭雪芳蛋糕同差唔多成千塊曲奇，做到都無時間預備過年嘅嘢。

 

    佢啱啱送咗個班蘭雪芳蛋糕俾我，叫我試試佢嘅新改良配方。

    蛋糕不單只靚，而且質地鬆軟，口感濕潤，同街買嗰啲真係無得比，難怪有客人試過之後立即追加 order，預訂十幾個要嚟新年送禮啦！

    你哋如果有需要的話，都可以搵 Louisa 幫手 o架！

 

2012 團年飯

    阿馳同阿瑩禮拜一嗰日返嚟食團年飯，由於自己感冒都未完全清得哂，個人仲係覺得 “死吓死吓” 咁，加上今年過年好似好趕咁，覺得時間極唔夠用，所以今餐團年飯整嘅嘢都以簡單為主，反正最重要都係一家人坐低一齊食飯啫！

首先上枱嘅，係我嘅拿手素雜菜湯，咪以為齋湯唔好飲呀，用咗甘荀、
番茄、薯仔、洋蔥、椰菜、紅腰豆、三角豆同栗子煲，樣樣都係
超甜材料，點會唔甜至得o架！加埋茄膏同月桂葉，
前一日預早煲定，夠哂濃味啦！

跟住就係整燒肉，又係前一晚整定、醃好，到時放入爐一焗攪掂，
完全唔駛理佢，仲方便過整叉燒呀！個皮勁脆，”索索聲”，
真係成枱人都聽到，佢哋幾個簡直食到耳仔郁啦！

呢碟係紅咖喱茄子雞，加埋雞髀菇一齊煮，非常好味，估唔到一向
唔食辣嘅阿馳都猛咁食，梗係啦，皆因樽紅咖喱醬所餘無幾，
其實唔係好夠煮咁大碟，所以咪唔會好辣囉！
得閒都要再煮定啲紅咖喱醬至得喇！

我唔係食肉獸，所以一定要有碟菜，呢碟金菇蟹柳扒娃娃菜就夠哂
簡單易整，清清哋，食完濃味咖喱之後食就最啱。

飯後甜品出場，就係自家製無豬油擂沙湯丸。

由於無落到豬油，就連植物油一滴都無落，所以芝麻餡唔會流出嚟，
不過自家炒香芝麻真係勁香濃，再加埋花生醬，想唔香口
都幾難啦！自己食的話，流唔流心都唔緊要啦，
最緊要健康嘛，食得開心又放心。

要休息了……

人又病，部腦又病，都係時候要休養一段時間喇，唉…………

千島火腿麥穗包

        星期五又再整呢個麥穗包嚟做 lunch，不過今次個整法同上次就有啲唔同，無用到芥末醬，改用千島醬；而法包麵糰就加入咗香草一齊搓，所以成品比起一般法包更加香。

紅酒雜菜燴鹹豬手

    首先第一件要做嘅事，就係同大家講聲 2012 新年快樂，Happy New Year！呢篇 blog 係首次要寫兩年呀，wakakaka！！

 

    上個禮拜，老竇有朋友俾咗免費飛佢去會展個美食節，佢都有買咗啲嘢返嚟，其中一樣就係原隻鹹豬手。今晚我就用咗半隻嚟燜雜菜，味道非常好呀！

材料：

鹹豬手
紅蘿蔔
薯仔
青瓜
乾蔥頭
蒜茸
月桂葉 ( bay leaf )

調味料：
茄膏
紅酒
鹽
糖
即磨胡椒粉

- 鹹豬手去骨後切件；紅蘿蔔同薯仔刨皮後切件。

- 青瓜略刨皮，開邊後去瓤，之後切件；乾蔥頭去衣、切細。

- 燒熱油，先爆香乾蔥頭、蒜茸、月桂葉同茄膏，然後加入紅酒。

- 依次加入紅蘿蔔、薯仔、豬手同青瓜，並加入調味料。

- 當紅蘿蔔同薯仔都燜腍的話，校大火將汁煮至濃稠，收汁後就可以上碟。

 紅酒同茄膏味道好夾，有少少酸味，令到整個菜式無咁 “漏”。

青瓜記得唔好太早落，因為會煮得過腍，唔好食！

    你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！