2011年9月29日星期四

但願如此!!

        前日收到 Ryan 個考琴成績單,不過我無即刻拆開,因為應承咗留番俾佢自己拆。噚晚拎張成績單俾佢自己親手拆開時,見到佢非常緊張,即使信封已經拆開咗,佢都唔係好敢睇,點知後尾發覺原來自己拎到 distinction 時,即時大嗌狂叫之餘,仲立即打電話俾媽咪報喜!我知道佢真係好開心,衝入房之後出番嚟見佢眼濕濕,就知佢自己都喜出望外,梗係啦,佢之前咁懶唔練琴,臨考前幾日先發力,有咁嘅成績真係估唔到!


        今朝一早收到 Ryan 電話,佢話Facebook 度寫嘢俾我,我睇完之後,到我估到估唔到咁細個人仔會寫一段咁長嘅文字多謝我:


關sir :
我很衷心感激你由2005年12月到現今, 一直也用心地教導我, 從來對我不離不棄, 就算我常常沒有認真地上堂, 也常常不聽你的話, 甚至常常激怒你, 你也願意耐心地教導我, 三次的比賽和今次的考試, 你都能選擇適合我的歌曲, 應該留意的地方, 令我每次也能有很好的成績. 我知我真的不聽話, 每次都是臨近比賽和考試, 才肯乖乖努力, 我知如果我肯一早乖乖努力, 成績應該可以更好, 今次考試能夠取得distinction, 你的功勞真的是最大, 三首考試歌能夠有27,28,29分, oral 也能差一分滿分, 如果scales & 我聽你話早一點練習, 也能取得更好的成績.
我希望自己由下星期三開始會用心上堂, 盡量不令你生氣.
Ryan 上



        平時同佢上堂真係勁辛苦,同佢一個上堂就等於上3 個學生咁樣,要勁大聲鬧,仲要拎埋籐條上堂,佢先可以 under control,我都同佢一家人講笑咁講,上下左右鄰居實覺得好出奇,點解逢星期三晚都聽到咁大聲 "狗吠聲" 嘅呢!?


        希望呢次考試成績可以俾到佢一個鼓勵,以後上堂真係可以認真兼俾心機啦!其實佢真係好有天份,平時勁懶練琴,學琴前一晚先練得半個鐘至九個字,到覆琴時當然表現唔好啦,但老實講,比起好多勤力練琴學生還要好呢!!你話死唔死呀!!所以之前我曾經同媽咪講過關於佢嘅學琴情況,媽咪雖然唔識彈琴,但聽完之後就話 Ryan 將會係我嘅 "代表作",但願如此啦!


原味英式烤餅 Basic Scone

        早前睇番有個教整 scone 食譜,原來焗 scone 係有兩種方法,一種係好似我之前整咁樣,麵糰同麵糰之間留有空位,整出嘅成品會比較乾身;而另一種方法係將所有麵糰黐埋一齊咁排放,等佢哋可以互相依靠住而 "攀爬" 升高,成品則會比較濕。


        噚日呢個 scone 就係用咗後者嘅方法,焗出scone 果然比起我以前整嘅濕潤同軟身,有少少似食麵包 feel



材料:
自發粉      185 克
糖              1/2 湯匙
鹽               少許
牛油          15 克
豆漿           約 120
毫升


- 自發粉、糖同鹽混合好,加入牛油,用指尖將牛油捽入麵粉內成麵包糠狀。


- 將豆漿倒入混合物內,用刀切拌,直至成為一濕潤而軟身嘅麵糰。


- 將麵糰放上已灑乾粉枱面,然後輕手及快手搓成不黏手麵糰。


- 用手將麵糰壓扁至約 2 厘米厚,之後用圓模 "吸" 出麵糰。


- 剩低嘅麵糰重覆以上步驟再做,直至所有麵糰 "吸" 完為止。


- 麵糰一個貼一個排放已鋪牛油紙嘅烤盤上,然後喺麵糰表面掃上豆漿。


- 放入已預熱至 220 °C 嘅焗爐內焗約 15 分鐘至熟,出爐之後放上架上攤凍。


以上材料份量可做直徑 5 厘米烤餅 8 個。


食譜出自 Women's Weekly, Breads & Muffins



 



scone 最好嘅地方就係夠快手,而且又唔駛落蛋去整,
所以噚日初一都可以食,我仲落咗橙皮茸
落去整,增加橙香味。


 



scone 搽上自己鍾意嘅果 jam,再加一杯 Earl Grey,
就係最傳統嘅英式下午茶喇!


Notes
- 原食譜係用牛奶 90 毫升及水 60 毫升。


- 牛油無需預先室溫放軟,反而最好就係用凍牛油整。


- 剛剛混合好嘅麵糰係非常之濕同黐手,所以要加入適量麵粉搓成不黏手麵糰。


- 有興趣嘅朋友可參考 T&P lemonade scone 製作短片,其製作手法跟呢個食譜大
  致相同。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2011年9月21日星期三

豆渣蝦米煎餅 Soybean Fiber Dried Shrimp Cracker

        之前嗰次用咗成斤黃豆整豆漿,豆漿唔駛一個禮拜就已經飲哂,但係啲豆渣就到依家都仲未用完。


        好耐之前試過跟櫻井老師個食譜整蜜糖豆渣曲奇,今次都係跟番同一本食譜整,不過就係整鹹餅乾,試吓效果又如何。



材料:
豆渣              100 克
低筋麵粉      100 克
雞蛋              1 隻
蝦米              2 湯匙
糖                  1 湯匙
鹽                  1 茶匙


- 蝦米用水快手洗乾淨,之後放白鑊內炒至乾身及香,之後略為樁碎。


- 麵粉過篩 3 次與豆渣混合,加入其餘材料拌勻,之後再加蛋搓成麵糰。


- 用保鮮紙包裹麵糰,然後用擀麵棍將麵糰擀薄成長方形。





- 將麵糰放上已墊入爐紙嘅烤盤上,然後用刀輕輕將麵糰分割


- 放入已預熱至 180 °C 嘅焗爐內焗約 30 分鐘。


- 出爐攤凍後跟住割紋拗斷餅乾即可。


食譜出自櫻井景子嘅《和菓子‧和甘味 — 秋冬篇》。


 



蝦米味非常香濃惹味,不過唔知係因為無油嘅關係,定係麵糰擀得
唔夠薄,中心嗰幾塊始終有少少煙韌,唔及邊邊啲咁脆口。


 



加杯蜂蜜綠茶,享受一個和風下午茶!



Notes

- 原食譜材料中係有 2 湯匙水,但我加入蛋後已經可以搓成糰,且越變濕潤,所以最
  後無落到水。


- 蝦米份量可隨個人口味喜好增減。


- 由於麵糰擀薄後比較軟身,難以搬過烤盤上,所以最好先拎起面頭的一塊保鮮紙,
  然後改以入爐紙鋪喺上面,將之反轉放上烤盤,再拎起埋底嗰張保鮮紙就容易好
  多。


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2011年9月19日星期一

冬菇栗子炆雞

        今日喺街市度見到有栗子賣,即刻諗起整栗子炆雞,於是就走去雞檔買雞,買隻芝麻雞都只不過係 $28,真係抵食!


        星期三嗰日買嚿豬腱同瘦肉煲雪梨,嘩,嗰兩嚿咁嘢,真係貴到喊,嚿豬腱只係得手掌咁大 ( 唔計手指 ),賣 $15;瘦肉就仲離譜,只係得半隻手掌咁大,賣 $11,加埋都已經成 $26 喇,汆完水之後就更加大縮水啦,真係買隻雞食好過囉!以前過時過節先會有雞食,依家,真係隨時隨地都可以食 lu!



今次呢碟栗子炆雞並唔係一般嘅整法,係混合咗無錫排骨
嗰種做法,又加紹酒,又加八角,又加冰糖,所以
味道特別香濃,連老竇都話個味調得好好。


 



材料十足,除咗雞同栗子之外,仲有冬菇同乾蔥頭,香濃惹味。


 



今次醒目喇,留起部份乾蔥頭,煮到一半時先落,
咁就唔會因為炆得太耐而全部溶哂啦!



參考食譜:


乾蔥頭栗子炆雞


無錫排骨


2011年9月16日星期五

雜乾果杏仁磅蛋糕 Assorted Dried Fruit Pound Cake

        對杏仁味嘅食品情有獨鍾,尤其係杏仁蛋糕,真係超愛!上次整俾 Michelle 嗰個橙香杏仁磅蛋糕,由於只係整得一條,所以自己都無份食。睇住都無得食,好慘 o架!! 唔得,"餓" 咗兩個禮拜,今日一於整番條俾自己至得!



材料:
牛油              160 克
糖                  150 克
雞蛋              4 隻
低筋麵粉      200 克
打粉          2 茶匙
杏仁粉          50 克
雜乾果          適量
罌粟籽          隨意


- 牛油預先室溫放軟;雞蛋拂打成蛋液;粉類過篩 3 次。


- 雜乾果略剪碎,加入適量冧酒浸至軟身,之後瀝乾備用。

- 牛油加糖用打蛋器打至鬆軟發白。


- 蛋液分 4 - 5 次加入牛油霜內,用打蛋器拌勻。


- 粉類分 3 次篩入,用打蛋器拌勻至無粉粒為止。


- 將乾果及罌粟籽加入麵糊內,拌勻後倒入模內。


- 放入已預熱至 170 °C 焗爐內,先焗 10 分鐘。


- 拎出蛋糕模,用刀麵糊表面割開一條約半吋深直紋。


- 之後放番入爐內焗多 30 - 40 分鐘至熟透即可。


以上材料份量可做 21 cm X 11 cm X 6 cm 長方形蛋糕一個。



呢包熱帶雜乾果係 Lily 喺美國帶返嘅,除咗佢,
我仲加杏甫乾同無花果乾 o添!


 



蛋糕又香又甜,真係誘惑難擋呀!



Notes
- 如果唔係用防黏模的話,記得要預先鋪上牛油紙,方便脫模。


- 用冧酒浸乾果,除咗可以令其軟身及濕潤外,更可增添酒香。


- 蛋液必須分多次拌入牛油霜內,否則容易油水分離,完全無法混合。


 


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2011年9月12日星期一

香菌素辣醬

        雖然今日係中秋節,但係中秋正值舊曆十五,所以中秋都係一定食齋。


        每次齋期如果想食辣椒醬的話,都係一件頗有難度嘅事,事關幾乎所有現成辣椒醬都係用蔥蒜去煮,所以齋期時一概唔食得,當然,可以去素食專門店買。但係,一來屋企附近無素食專門店,二來,即使係有,都一定賣得特別貴,間中有食齋習慣嘅朋友都應該知道,食齋係貴過食肉,買材料都一樣,與其係咁,倒不如自己親手煮吧!



材料:
冬菇蒂
牛肝菌
紅辣椒
辣椒乾


調味料:


素蠔油
麻油


- 冬菇蒂洗乾淨,剪去較硬部份,之後用清水浸過夜,瀝乾水後放入攪拌機內打碎。


- 牛肝菌洗乾淨後用清水浸至軟身,然後剪碎備用。


- 紅辣椒同辣椒乾洗淨後去蒂,放入攪拌機內打成辣椒蓉。


- 燒熱油,放入冬菇蒂及牛肝菌爆香,直至乾身為止。


- 加入辣椒蓉,兜炒片刻,加入調味料,拌勻成醬。


- 最後加適量麻油,拌至濃稠即可入樽。



用打碎嘅冬菇蒂嚟代替瑤柱絲。


 



份量預得好,啱一樽裝哂。


 



今晚用咗彩椒、雞髀菇同素黑椒雞扒意粉,可以即刻用呢個辣醬
拌食。自家製辣椒醬果然夠哂真材實料,落少少已經辣到
跳舞!食食吓飯,老竇走出嚟話啲辣醬好辣,我見到佢
成面都紅哂,可能啱噴完火呀!

 


Notes
- 辣椒乾比起新鮮辣椒更加香,所以加入一齊煮可以令煮好辣椒醬更加香。


- 如果無素蠔油的話,可以用鮮醬油代替。


- 想成品比較 "醬" 的話,可以加入少量粟粉水埋芡,但要留意加入水份後會比較易
  變壞。


- 用嚟存儲辣椒醬嘅玻璃樽需事先消毒



        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


冰皮月餅

        各位 blog 友們,中秋節快樂呀!


        今年我同 Winnie 一齊整冰皮月餅,由於係第一次整嘅關係,所以唔係好識預材料,原本諗住整大約四十個月餅,每人分廿個,點知結果整出成八十個有多,有睇我之前幾篇 blog 的話,都應該知道仲剩咗好多餡 o添!所以基本上都係送俾人多過自己食。


        我同 Winnie 兩個都玩得幾開心,最重要係有份食過嘅親友都讚好食,第一次整,都算係咁 o架喇!



Winnie 話要影番張 "曬冷" 照!


 



首先亮相係奶皇冰皮,Winnie 煮咗兩款奶皇餡,一款係跟 T&P
嘅原裝正版,另一款係為我而整嘅無牛油無奶版。


 



呢個就係我負責煮嘅豆蓉餡加鹹蛋黃,個人非常鍾意呢個味道。


 



跟住呢個係綠茶味,綠色玫瑰係咁多個配搭之中最靚嘅。


 



Mocha 冰皮,係朱古力皮加咖啡餡。


 



最後出場嘅係淨豆蓉餡。


 



我仲專登買啲禮盒要嚟送禮 o添。


 



第一次整月餅,梗係要同媽咪一齊分享啦!



        小弟喺度祝各位一家團圓,開開心心,中秋節快樂


2011年9月10日星期六

豆羹

        整冰皮月餅個豆蓉餡,我係跟一本食譜整喺同一本食譜裡面有教整台式豆羹,都係同樣用綠豆蓉整成,咁就啱哂喇!因為係第一次整冰皮嘅關係,唔單只 Winnie 個奶皇餡做多咗,就連我負責嘅豆蓉餡都多出一倍咁滯,咁嘅情況下,梗係要幫佢哋搵出路啦!咁啱見到豆羹個食譜寫住,呢個甜品同一個出名嘅宮廷小食豌豆黃相似,咁我就更加要整啦,事關媽咪係好鍾意食呢個甜品,成日都間唔中就提起,所以我就決定咗整佢喇,因為今日係媽咪嘅生日呀!


        不過,最後我都無跟到呢本食譜去整呢個豆羹,原因係佢個材料份量係以未煮熟嘅開邊綠豆計算,但係我剩低啲係已經煮好嘅綠豆蓉。後來我參考另一本以白豆蓉為基本材料嘅和菓子食譜而整成呢個豆羹。



材料:
綠豆蓉      600 克
糖              150 - 180 克
大菜          6 克
水              200 毫升


- 煲滾水,放大菜入內煮溶,之後加入糖煮溶。


- 將豆蓉逐少加入大菜溶液內攪拌,一邊以慢火加熱,煮至濃稠。


- 將混合物倒入模內,刮平表面,然後放入雪櫃內雪至凝固後,即可切件享用。


 



成日都聽到 Winnie啲羊羹好甜、好難食,所以我已經大刀闊斧咁一次過減
50 克糖,但最後成品都仲係甜啲,咁你話如果跟足食譜份量
去落糖的話,我諗真係入唔到口!


 



咗整呢個 "A 貨豌豆黃" 俾媽咪之外,我仲煮啲齋 o添!
 


Notes
- 煮豆蓉時必需不斷攪拌,以免黐底。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2011年9月8日星期四

無蛋香橙藍莓鬆餅 No Egg Orange & Blueberry Muffin

        今次試吓整個無蛋 muffin,皆因整好之後聽日要帶過去送俾媽咪做生日禮物呀!



材料:
低筋麵粉      90 克
全麥粉          30 克
肉桂粉          1 茶匙

泡打粉          1 1/2 茶匙
鹽                  少許
油                  25 毫升
蜜糖              40 克
乳酪              50 克
鮮橙汁          50 毫升
橙皮茸          1 個橙份量
藍莓              適量


- 將所有粉類先過篩 3 次,之後加入鹽均勻混合。


- 除藍莓外,將其餘材料全部拌勻,之後倒入粉料內,用膠刮輕手拌勻。


- 最後拌入藍莓,然後將麵糊倒入模內。


- 放入已預熱至 180 °C 嘅焗爐內焗 20 分鐘即成。


以上材料份量可做中 size 鬆餅 6 個。



估唔到無蛋都可以焗到咁靚嘅色水喎!呢個 muffin 好香橙味。


 



聽日 Winnie 照舊同我一齊去探媽咪,呢個最靚仔就預咗俾佢。

 


Notes
- 藍莓做好預先洗乾淨,放入冰格雪硬,以防入爐加熱時會爆破。


- 橙汁可用其他飲料代替,如蘋果汁、豆漿或牛奶。


- 要做到鬆散質地,麵糊切勿攪拌過度,一但乾、濕料拌勻就即刻停止攪拌。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans