2009年9月30日星期三

Le creuset 矽膠勺 & Cobel 不銹鋼 mousse 圈

        Louisa 去完法國返嚟,除marcaron 同蝴蝶麵之外,都有買到其他嘢。



呢隻 Le creuset 矽膠勺同兩個 Cobel mousse 圈就係佢送俾我嘅。


矽膠勺好有用,除咗可以用嚟做攪拌勺,仲可以做長匙羹同膠刮。



一 pack 6 個mousse 圈Louisa 話呢隻牌子係法國名廠大牌
子,而價錢又唔係好貴,抵用!


        mousse 圈原本只係佢買嚟自己用,但當佢 show 俾我睇果陣,我讚 "鋼水" 好靚,仲口快快講咗話如果我早知佢會買呢mousse 圈的話,我就搭佢買。點知佢聽到我咁講,就叫我拎兩個走,本來我都話唔好,因為佢原本無諗過要俾我嘛,但係佢話無所謂,叫我照拎啦,攪到我勁唔好意思!


        下次都要小心啲,講嘢要記得經一經大腦先!


       Louisa,merci beaucoup! 


Gourmet Party @ Louisa's Home II

        星期一果日我同 Winnie 又喺 Louisa 屋企整嘢食啦!今次我哋兩個係主力,因為 Louisa 同 Genevive 啱去完法國返嚟,仲未適應時差,而且晏晝又要去 Towngas 跟 Rachel 學煮餸,所以我哋就肩負呢個重任喇!

        未正式整嘢食之前,先 show Louisa 喺法國買返食品先!



marcaron 好靚呀!係 Louisa 喺法國買返嚟 o架!



間鋪頭係首創呢種杏仁餅嘅師傅開 o架,所以係最正宗marcaron。
不過就好貴囉,3 盒夾埋過千蚊港紙呀,Louisa 都話肉赤!



唔同顏色有唔同味道,仲有埋 catalogue o添!



marcaron,仲有唔同色pasta,呢款係七彩蝴蝶麵。 



墨魚汁蝴蝶麵,Louisa 稱之為 "班馬 pasta" !



意大利三色國旗蝴蝶麵




好喇,到晚餐喇!呢個係 Winnie 整嘅鮮果沙律,Genevive 有份
幫手做 decoration o架!



        海鮮粉絲沙律,係 Louisa 跟 Rachel 學 o架,堂上整好就帶返
俾我哋食。其實仲有學個主菜 "胡椒炒蟹",不過掛住食,唔記得
影相 o添!




        呢個燕麥包係我同 Winnie 一齊整 o架!係跟 Rachel 本《知廚之樂》整嘅。不過因為天氣好濕,我哋兩個又做錯咗小小嘢,所以個麵糰勁濕,好難搓得埋,後尾唔理咁多,狂加粉搓埋就算!不過焗完出嚟又 OK 喎,仲好香噴噴 o添!外脆內軟,好好食,加埋意大利黑醋橄欖油拌食,好正!。Genevive 就好欣賞,噚日我準備走之前,佢話可唔可以喺我走前再食多件包包呀!




Louisa 上完堂返嚟就即刻開包七彩蝴蝶麵煮,加上白汁、火
腿同煎香煙肉,好味!不過啲粉個結就好易鬆開,變成方塊粉。


 



火腿粟米蓉焗西蘭花。Winnie 話要影埋個 Le creuset 煲墊喎!





        最後就梗係要有甜品啦!呢個係我同 Winnie 夾手夾腳整嘅香蕉雪芳蛋糕。香蕉味好香濃,蛋糕好鬆軟,不過又係太濕囉 ( 原來天氣潮濕係唔適宜整蛋糕麵包 o架 ),所以 Louisa 脫模都脫得特別辛苦,表面都爛咗少少。


        嚟緊 10 月尾我哋又會再多一次 party,Louisa 話下次個主題係泰國菜,到時再同大家分享啦!


2009年9月26日星期六

豆腐芒果雲石慕斯 Tofu Mango Marble Mousse

        上次整 mousse 蛋糕失敗咗,趁仲有淡忌廉喺度,反正唔用過多幾日都好快會變壞,所以就再整多次,睇吓成唔成功,不過今次就齋做 mousse,唔整蛋糕喇,一來費事咁多嘢攪,二來如果真係又失敗的話,都唔駛浪費咁多時間、心機嘛,哈哈!



材料:
豆腐          200克
芒果          1個
淡忌廉      130克
豆漿          100克
糖              40克
魚膠片      4片


- 豆腐先過篩壓爛成豆腐蓉。


- 芒果去皮、去核後,用攪拌機打成芒果茸。


- 魚膠片先用凍水浸軟,之後倒去水份,隔熱水座溶成魚膠溶液。


- 淡忌廉加糖,座冰水打至七成企身,加入豆腐蓉及豆漿拌勻後移離冰水。


- 先加 1 茶匙魚膠溶液落芒果茸度,拌勻。


- 將 1/4 豆腐忌廉加入剩低魚膠溶液內拌勻,然後倒番入豆腐忌廉內快手拌勻。


- 將豆腐忌廉倒入模內,然後用刀逐少將芒果茸放豆腐忌廉上,用刀慢慢輕手畫
  出雲石花紋。


- 放入雪櫃,雪凍個半鐘至凝固,即成。




呢盒係整俾阿馳同阿瑩嘅。


        雖然我仲未試食,但今日就俾Lily試食, 我見到都係唔係好固體狀態,但當然就無之前 "決堤" 咁嚴重啦!始終都唔係好凝固,佢仲食到有一粒粒凝固嘅魚膠 o添!究竟點解會咁呢?係個食譜本身有問題,定係我唔係好識運用魚膠片呢?定係豆腐不停咁化水,攪到無法凝固?真係一個 …… 謎!!


Notes:
- 我用嘅係盒裝豆腐,貪佢比較滑溜同衛生。


- 若果唔想用篩整豆腐蓉咁麻煩,可以用攪拌機打成蓉。


- 淡忌廉打好之後就要即刻移離冰水,如果唔係就會過凍,好似我上次整
  mousse cake 咁,一落魚膠溶液就即刻凝固。雖然今次都仲有少少凝固嘅魚膠
  ,但就比上次少好多喇。


- 如果要整到雲石花紋,芒果茸一定唔可以就咁倒落去忌廉度,因為會立即沉底。


加州桃駁李

        之前食過加州水蜜桃印象都唔錯,所以今次見到同樣嚟自加州嘅桃駁李,都即刻買返嚟試吓。除咗因為同出一系之外,最重要嘅仲係價錢相當吸引




        上次喺「百佳」度見到 $12 / 3個已經覺得平,早前喺街市生果檔見到呢個桃駁李仲抵,$11/ 5個,平均只係 $2.2 一個咋!所以其實好多時候去超市買嘢真係要格過價,因為同樣款式產品,比起街市、藥房及雜貨鋪,最誇張可以貴成七、八成!皆因供應商擺啲貨喺超市賣,係要俾上架費,而且呢個上架費都唔細數目 o架!供應商當然唔會做蝕本生意啦,啲上架費自然就轉嫁俾消費者囉!但喺其他地方賣就無上架費呢樣嘢,所以可以平好多。



        講番呢個桃駁李,我覺得同食水蜜桃分別唔係咁大,差唔多食法,比起水蜜桃更爽口,但就反而無水蜜桃咁香,聽個名仲以為個 texture 會係介乎水蜜桃同李之間嘅質感 o添!


Le creuset 小形長方焗盤

        真係都無諗過,自己會擁有一件 Le creuset 嘅產品,唔好話一件喇,半件都無呀!我依家會有,當然又要多謝 Louisa 啦!


        我第一次接觸 Le creuset 嘅產品,係媽咪介紹俾我知,但當時其實我哋兩個都唔識呢隻牌子,唔知佢有幾好用,淨係知道自己一定唔會買嚟用囉,一來好貴啦,但貴都唔係問題,最攞命就係重到癡線,我成日都喺度諗,無嘢得個吉煲都已經重到咁,煮好哂餸之後我都真係拎唔起囉,就算拎得起,我屋企咁 ~ ~ ~ ~大,未行到出廳都已經重到跌咗落地,成煲餸唔駛食 lu!


        前排 Le creuset 開倉大特價,聽講真係日日排長龍,Louisa 都排咗成 7 粒鐘先至入到去會場,連俾錢都話要排成個鐘喎,真係人都癲呀!!


        見到好多 blog 友都大出血呀,好得人驚!本來我都搭 Louisa 幫我買個 mini grill pan o架,可惜果度無得賣,咁所以我都無嘢買到。之後佢仲去多幾轉呀,所以佢個床下底依家勁爆囉! 




        呢個小形長方焗盤就係佢送俾我 o架啦!好靚呀,我好鍾意呀!因為一來 size 細細,好骨子,啱哂我一人份量用;而且我不嬲都好鍾意杏色系列,呢個顏色官方稱之為 "country cream",我諗淨係日本版先至有呢隻顏色,平時見嚫都係橙色、紅色、藍色果幾隻經典顏色,所以有呢個顏色我好鍾意。 


        呢個焗盤可以整到好多嘢喎,焗豬扒飯啦、焗肉醬意粉啦、麵包布甸啦、焗雜莓 crumble 啦 、焗蘋果批啦 、仲有乜乜啦,物物啦 …………………………


芒果布甸 Mango Pudding

        呢個芒果布甸一直我個 To Do List 度好耐 o架啦!一係就無時間整;到想整時又未買到芒果或淡忌廉,所以拖咗好耐都無整到

        上星期卒之買咗淡忌廉喇,所以今個禮拜就可以整呢個布甸。



材料:
豆漿          200毫升
芒果肉      200克
魚膠粉      7克
淡忌廉      150克
糖              10克
紅酒          5毫升
甜忌廉      200克


以上材料份量可做約 4 - 5 杯布甸。


食譜出自 Albert Tsui 嘅《 曲奇蛋糕 Cook得起 3 》



- 將芒果肉放入攪拌機內打成芒果茸,備用。


- 將豆漿、糖同淡忌廉放入煲內,微微加熱,煮到糖溶為止,熄火,備用。


- 將魚膠粉加入溶液內不停攪拌,避免結塊。


- 當所有魚膠粉完全溶解後,將整煲溶液座冰水中冷卻,用電動打蛋器打成芒果茸
  質地。


- 之後將芒果茸加入,拌勻後備用。


- 加入紅酒,拌勻。


- 將布甸溶液倒入模內,放入雪櫃雪凍兩個鐘。


- 用電動打蛋器將甜忌廉打至 6 成企身。


- 將打起嘅甜忌廉加喺布甸上面一齊進食。



唔知點解顏色好淺,唔夠深黃色呢?


 



甜度適中,好香、好滑,非常之好味。



Notes:
- 原食譜係用牛奶而唔係豆漿。


- 甜忌廉唔可以唔加,因為原食譜糖嘅份量只得10克,若果真係唔想加甜忌廉,
  咁
嘅份量就要相當地增加。



P.S.  根據食譜,啲甜忌廉應該用唧花袋唧喺布甸上面,但係我套唧花工具完全未用過,懶得去洗,所以就咁將佢 "畢" 上布甸上,之後仲貪得意整啲花款 o添。 


2009年9月25日星期五

甜忌廉

        早前同 blog 幸福蠍傾開關於甜忌廉嘅嘢,佢話俾我聽佢係用愛護牌甜忌廉,而且未用果啲又可以放番上冰箱度,到用之前先拎番落下格解凍,聽落都幾方便好用,於是就走去「二德惠」睇睇,問清楚哂啲職員,原來真係淨係得呢隻牌子先可以開封後仲可以放番上冰箱儲存,佢仲教埋我點樣處理會方便啲,所以就扑鎚買呢隻喇!



        買咗返屋企之後,第一時間將佢放上冰箱,因為喺返嚟嘅途中已經開始溶喇!到我要用的前一晚,我就放落下格解凍,打開紙盒後,第一時間將佢切成一份份,之後用保鮮紙將每份忌廉獨立包好,用膠盒裝好後再放番上冰箱度,攪掂。



        真係好方便喎!



Notes:
- 開封後最多都只係放到 1個月左右。

- 放上冰箱時,記得喺個盒面貼上寫有開封日期嘅 label,咁就唔會過咗期都唔知
  啦!


- 只需有少少軟化已經要立即開封切開分裝,如果唔係,根本無可能可以完完整整
  咁成嚿用保鮮紙包住,。


2009年9月24日星期四

親子丼 Oyadon (Dedicated to my dearest Mother)

       第一次食親子丼係好耐好耐之前喇,應該係十幾年前喇,果陣時仲係喺琴行教緊琴,同埋其他 Miss 一齊去商場內一間日式食肆度食嘅。

        點解十幾年後嘅今日會想自己整嚟食呢?睇篇 blog 個 title 都知啦,係送俾媽咪嘛!呢個飯點解會叫做親子丼呢?原因係因為呢個飯係用雞肉 (親) 同雞蛋 (子) 做囉!所以亦都話俾你聽,點解我會喺呢個時候煮呢個飯囉!



大豆芽蜆肉豆腐麵豉湯

        麵豉湯一向都係我嘅至愛,所以間中都會煮嚟飲,今次我就用咗赤味噌嚟煮,所以色澤比較深。



失敗咗喇!!!

        噚日朝早整咗個 mousse cake,諗住夜晚教完 Arthur 返嚟繼續完成埋啲後期工作,影埋相就食得。點知當我喺雪櫃度拎出嚟脫模時,覺得有啲唔係好對路。


        平時睇書都話用風筒吹一吹個模或用熱毛巾敷一陣間會易啲脫模,但我就嘗試輕手郁一郁個模,發覺 mousse 都已經可以離模,咁就唔理咁多啦,照樣拎起個模,點知………… 


        嘩,決堤呀 ~ ~ 呀 ~ ~ 呀 ~ ~ 呀,快啲走呀!!!!! mousse 即刻湧哂出嚟,流到周圍都係,好彩範圍唔係太大,如果唔係就真係有排抹!!


        嗚…嗚…嗚…嗚…嗚………… 好想死呀!!!!嘥哂我啲心機同時間喇!以我呢個慢手慢腳嘅初哥,整餅底、整蛋糕、整 mousse 都咗幾粒鐘去整 o架!不過我都唔理咁多喇,照樣 "畢" 食, 起碼個餅底同件蛋糕都完整無缺嘛!攪到我同我老豆食完飯之後要即刻食哂成個蛋糕,飽死咗!!


        我諗我應該知道邊個 step 做錯咗,應該係我將魚膠溶液加入cream 時,唔記得將個兜移離啲冰水 ( 因為之前係座住冰水打 cream ),所以一落魚膠就有部份凍到即刻凝固,導致魚膠唔可以均勻咁同cream 混合,咪攪到cream 唔凝固囉!


        "失敗乃成功之母",今次知道失敗原因,下次就可以避免,就當係上咗寶貴嘅一堂課喇!好,趁仲有 cream 剩,再整多次,唔會又出事喇啩!


2009年9月23日星期三

一番汁

        一番汁係一個好基本嘅日本清湯底,煮好多嘢都會用到,而且材料非常簡單,亦都好容易做。



2009年9月22日星期二

芭蕾舞劇「天鵝湖」

        都唔知幾耐無買 "飛" 聽 concert 同睇 performance 喇,星期日晚我同 Winnie 就去咗屯門大會堂度睇經典芭蕾舞劇「天鵝湖」。今次呢套芭蕾舞劇係有享負盛名,堪稱全球最 top 嘅芭蕾舞蹈團「烏克蘭基輔芭蕾舞團」( Kiev Ballet - Ukraine ) 演出,咁難得有咁嘅機會,梗係要好好把握啦!而且「天鵝湖」仲只係喺屯門演出一場,沙田大會堂就演出另一劇目。嘩,咁正,連演出地點都就埋我,我當然即刻 call Winnie 買飛啦!



        真係好掂,果 3 個主角都跳得好出色,好有表達力。男主角每個動作都好 smooth,而且仲好溫文爾雅,以表達王子嘅高貴;女主角舞姿好優美,我同 Winnie 都覺得佢好勁,佢對手做動作扮天鵝拍翼時,柔軟到不得了,簡直郁都好似波浪咁,真係靚到嚇死人!!至於個巫師就跳得好有勁度,完全表達到反派果種「邪」勁!


        除3 位獨當一面嘅舞蹈員之外,其實都仲有幾個都幾出色,不過大部份嘅群舞者都比較遜色,有點失望。不但只動作唔夠一致整齊,好多時 timming 同 rhythm 都捉得唔係太好,硬係音樂完咗之後先完成全套動作。


        另外值得一讚嘅係全劇constume,真係靚到想死,Winnie 都好同意,個 constume designer 應記一功!


        我同 Winnie 都身為音樂人,當然都會留意埋音樂部份啦!



柴可夫斯基嘅作品,有一定信心保証!



        不過今次個 performance 居然唔係由 live orchestra 演奏,而只係播 recording,都有少少失望!好彩個 violin 拉得好出色、勁好聽,加番唔少分數。

        一直以來,我都覺得個 main theme 好抒情、好動人,但唔知點解,噚晚當聽到第一次出現個 main theme 時,我反而覺得好傷感、好淒涼,個心好唔舒服,仲即時喊咗出嚟。到第三幕時王子揀選咗黑天鵝,但突然諗番起對白天鵝嘅承諾,覺得好懊悔時,main theme 再次出現,可能呢次個 orchestration 唔同咗之前,而且寫得比較豐厚同盪氣迴腸,所以我又再喊多一次!一直以來,我都好欣賞柴可夫斯基喺最後一幕用 parallel major key 去表達皇子打贏巫師果種勝利同喜悅,音樂發揮得恰到好處。


        好多時都聽到人講,係唔同嘅人生階段,思想係會唔同,但估唔到對音樂嘅理解同感受都會好唔同,可能人生經歷多咗,遇到唔開心嘅事都相應增加,所以對音樂所表達嘅情感都有不同感受!這正正就是流行音樂與古典音樂嘅最大分別之處!


「國慶銀花耀屯門」

        身為屯門人嘅你星期六果晚有冇去到蝴蝶灣果邊睇煙火匯演呀?我就梗係有啦,我住蝴蝶灣 o架嘛!而且我新屋果邊個景就正正對住發放煙火躉船停泊位置,坐喺窗台已經可以舒舒服服睇到,又唔駛同人迫餐死。Winnie 新墟都專登搭車過三聖果邊睇啦,我咁近城堭廟,點會唔去求番之好簽呢!我都同阿馳講,我哋真諗都無諗過自己會住啲有煙花海景嘅樓!住半山豪宅就話望到維港煙花景啫,估唔到自己住嘅樓都會有 "蝴蝶灣煙火" 景。


        煙火同煙花真係差好遠,矮好多,如果唔係因為我哋住喺較低層數,我諗都唔可以睇得好清楚。同埋當晚無乜風,所以啲煙唔咪好散得走,攪到中途濛到幾乎睇唔到呀!好彩無幾耐啲煙就散得七七八八,咁就可以繼續清楚睇哂整場煙火匯演。

        果晚我當然有帶相機過去影相啦!雖然我嘅攝影技術極之不濟,但我都 upload咗十零張相上嚟同大家分享。










呢段係 video 嚟 o架,不過唔知大家睇唔睇到呢?



呢隻係香港小輪嘅觀光船,應該係有人專登租嚟睇煙火。



        睇完之後就梗係返屋企食飯啦!行緊嘅途中,望番落下面馬路,點之發現 ……



嘩,勁多人呀!個個都起程返屋企。


        碼頭區從來都未試過咁人山人海 o架,唔好話夜晚呀,就算朝早都唔會啦!我聽到有個途人仲話,好似遊行示威咁多人。


        返到屋企,已經食完一碗飯,入廚房裝飯時,望出街見到個奇景:



差唔多成粒鐘後,樓下個輕鐵站都仲有勁多人排隊等上月台!



         無錯,唔係等上車,係等上月台咋!多人到要分批上月台等車,真係誇張,好彩我唔駛學佢咁迫車啫,如果唔係就慘囉!


        坦白講,其實我一向對煙花都興趣不大,但今次就例外,除咗因為自己佔盡地理優勢之外,喺我心目中,呢次嘅煙火匯演唔單只係慶祝祖國建國 60周年,其實係仲有另外一個重大目的。


        係咩目的?自己慢慢參透一下啦,唔係太 「禪」 o架咋。有睇開我個 blog blog 友同埋我嘅  best friends 都應該會知道。