紅豆蒸蛋糕 Red Bean Steam Cake

        好耐都無食過蒸蛋糕喇！近排突然好想食，而且聽日我又要帶個蛋糕去探媽咪，所以今日就蒸番次蛋糕。今次試下加入紅豆餡嚟蒸蛋糕，睇吓好唔好食先！

        呢個紅豆蒸蛋糕可以話係集幾家大成呀！點解咁講？首先，紅豆餡係出自櫻井老師手筆；蒸蛋糕材料及做法就跟陳鳳美個食譜；打蛋方法就用咗餅后 Vanlily 個海綿蛋糕做法，如果咁都唔掂，我真係要檢討吓喇！

材料：
雞蛋              6隻 (約300克)
低筋麵粉      315克
泡打粉          4克
糖                  90克
鹽                  3克
橄欖油          45毫升
水                  50毫升
紅豆餡          500克

食譜材料份量係參考自陳鳳美嘅《黑糖糕蒸蛋糕》。

今次整呢個蛋糕係首次用呢隻無鋁泡打粉。

 

- 先將麵粉同泡打粉過篩 3 次。

- 雞蛋加糖，座 43°C 溫水打起：

- 先用高速打 1分鐘，然後將攪拌盆傾斜，打 2 – 3 分鐘至九成企身。

- 將盆放番平，用中速打多 1分鐘度，邊打蛋邊轉盆，打至十成企身。

- 分 3 次加入麵粉，用膠刮以切拌方式拌勻。

- 橄欖油、水及紅豆餡拌勻後，加入少量麵糊拌勻。

- 將混合物倒回麵糊中，輕手拌勻。

- 將紅豆麵糊倒入模內，用中火隔水蒸約 45 分鐘至熟透即成。

你哋睇，蛋糕裡面有好多紅豆哩！Yummy Yummy！！

        由於呢個食譜麵粉用量頗多，比雞蛋還要多哩！所以蛋糕個 texture 比較實淨，加埋紅豆落去，個感覺好似食緊用粘米粉蒸嘅中式紅豆糕咁。唔知有無 blog 友知道點樣整到非常鬆軟嘅蒸蛋糕呢？如果可以整到好似「山崎」果隻咁鬆軟就好喇！

        另外，參考咗櫻井老師另一個紅豆蛋糕食譜而減少用糖量，出嚟個效果相當唔錯，甜度啱啱好，唔會太過甜，又保留番適度嘅紅豆香甜，抵讚！

Notes:
- 將麵粉拌入蛋糊時要盡量輕手及快手，以免消泡。

- 若想蛋糕口感更加滑，可用奶代替水。

- 因為紅豆餡已經夠甜，所以糖可以用好少已足夠。

- 以上材料份量係自行調整過，若根據陳鳳美嘅原食譜材料份量，可做出 8 吋長
  形蛋糕一個，其材料份量如下：

  雞蛋              240克
  低筋麵粉      250克
  泡打粉          3克
  二砂糖          200克
  鹽                  2克
  橄欖油          35毫升
  淡奶              40毫升