麵豉炆腩肉

        近排突然諗起，已經好耐都無用過麵豉啦喎，咁就喺度諗，有咩餸菜係用麵豉整嘅呢？諗諗吓，就諗到麵豉蚊腩肉，於是咪試吓煮囉！

材料：
有骨腩肉
蒜茸

調味料：
麵豉
老抽
生抽
紹酒
鹽
糖

- 腩肉洗乾淨後，成嚿放入滾水內汆水，盛起後沖水，然後切件。

- 燒熱油，放蒜茸落鑊爆香，之後加入麵豉繼續爆香，灒酒。

- 當麵豉爆至乾身後，就加入腩肉，兜炒一陣後再次灒酒。

- 兜勻麵豉同腩肉後，就加入鹽、糖、生抽及老抽，兜勻後再加入水，炒勻後冚上
  鑊蓋，轉細火慢慢炆。

- 炆約 30 至 45分鐘，腩肉炆腍就得，之後校番大火，煮至收汁就完成。

        好惹味嘅一道家常菜，味道好有親切感，估唔道憑想像煮出嚟嘅餸都 OK 喎！

Notes：
- 將腩肉切件時唔好切得太細，如果唔係，到煮腍之後就會縮到得番好細件。

- 炆嘅時候記得要用細火，同埋記得間唔中要揭開鑊蓋睇吓有冇煮乾水，有
  的話就要加水繼續炆。