洛神花裸麥麵包 Light Roselle Rye Boule

買咗 Grégoire Michaud 本《 Artisan Bread 麵包教室 》咁耐都未跟佢整過，因為裡面大部份嘅麵包都要用到發酵麵種去整，預備麵種都唔係咩咁大不了，最煩係佢嘅麵種係要整足幾日，仲要不停加入新粉，你都咪話唔煩呀！

 

早兩個星期喺圖書館度借到佢本新書《古風歐陸麵包》，今次呢本講明係 “baking at home”，所以食譜簡單好多，一般家庭都可以做得到。睇哂成本書之後，我就揀咗洛神花裸麥麵包呢個食譜，因為咁啱屋企有樽洛神花果醬嘛，難得咁特別嘅食材都會有，唔試整都真係對唔住自己啦！

 

材料：
高筋麵粉      150 克
裸麥粉           75 克
即用酵母       1 克
發酵麵種       50 克
海鹽       6 克
洛神花果醬   50 克
水    約 180 克

- 所有材料放入食物處理器內攪拌混合，逐少加水搓成麵糰。

- 拎出麵糰，放上已灑粉嘅枱上，繼續搓揉及摔打成光滑麵糰。

- 將麵糰滾圓，放入已灑粉嘅兜內，用保鮮紙包好，發酵 2 個鐘。

- 麵糰排氣後再次滾圓，鬆弛 15 分鐘。

- 再次排氣及滾圓，將麵糰倒轉放入已灑粉嘅發酵藤籃內，發酵 90 分鐘。

- 發酵完成後，用刀喺麵糰表面割紋，然後用水噴濕麵糰。

- 放入已預熱至 210 °C 嘅焗爐內焗約 35 分鐘。

- 其間當麵糰開始上色時再噴多一次蒸氣。

食譜出自 Grégoire Michaud 嘅 《古風歐陸麵包》。

今次個紋路做得好滿意，可惜個做形就歪歪哋，
可能因為放個麵糰落藤籃時放得唔夠正中。

唔單只無乜紫紅色睇到，就連食落口都無乜洛神花果醬味，
有少少失望！

Notes：

- 原食譜係用 65 號麵粉

- 發酵麵種可參考燕麥包中嘅老麵製做法。

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

合桃經典朱古力蛋糕 Gâteau classique au chocolat & noix

  今晚整咗個好耐無整嘅蛋糕，就係經典朱古力蛋糕喇！我都幾鍾意食呢款蛋糕，鍾意佢朱古力夠濃、勁 rich，食細細件已經好滿足。

 

    今次呢個經典朱古力蛋糕係一個 cross-over 版，睇唔睇得出佢同邊款蛋糕cross-over 呢？之唔係 brownie囉！

面頭灑滿哂合桃碎，同 brownie 真係有幾分似 o架！

今次個蛋糕除咗灑滿合桃碎之外，仲用咗橄欖油代替牛油 o添，
食落口無咁漏，比較清爽。

蛋糕裡面依舊咁濕潤、咁香濃，正到無朋友呀！！

過往作品：

香蕉經典朱古力蛋糕

橙香經典朱古力蛋糕

經典薄荷朱古力蛋糕

粟米多士 Corn Toast

    以前對食材未係好有認識嘅時候，曾經擺咗個大烏龍！

 

    好耐之前，有次去「山崎」買麵包時，見到有粟米方包賣，於是就好慣性地拎起嚟睇吓個材料成份，睇完之後，發覺所有材料之中唯一同粟米有關嘅就係 “粟米粉”，當時心諗，有冇搵笨啲呀，加咗 “粟粉” 整就叫做粟米包！！因為當時唔知道粟米粉 ( cornmeal / polenta ) 同粟粉 ( corn starch) 嘅分別，誤以為粟米粉等同粟粉。查實 “corn starch” 譯做粟粉真係唔係好夠傳神，正確應該叫做粟米澱粉，咁就唔會同黃色嘅粗粒粟米粉攪亂喇！

 

材料：

高筋麵粉   200 克
粟米粉   50 克
鹽   3 克
糖   25 克
即用酵母   4 克
雞蛋   1 隻
水   約 100 毫升
橄欖油   10 克

- 將雞蛋拂打成蛋液。

- 除橄欖油外，所有材料放入食物處理器內攪拌成麵糰，後加入橄欖油搓勻。

- 拎出麵糰，放上已灑粉嘅枱上，繼續搓揉及摔打成光滑麵糰。

- 將麵糰滾圓，放入已灑粉嘅兜內，用保鮮紙包好，發酵 45 分鐘。

- 將麵糰排氣，平均分割成 2 份後再次滾圓，鬆弛 10 分鐘。

- 再次排氣及滾圓，放入多士模內，冚好蓋並預留一罅隙方便觀察發酵情況。

- 當麵糰發酵至多士模嘅九成滿後，將蓋完全合上。

- 放入已預熱至 210 °C 嘅焗爐內焗約 30 - 35 分鐘。

- 出爐後立即脫模，將麵包放上架上略攤凍後即可切件享用。

以上材料份量可做多士 1 條。

查實包肉顏色係好金黃 o架，不過影相出嚟睇唔到。





加咗粟米粉整嘅包會比較紮實同煙韌，配洛神花果醬一齊食，
就係噚日嘅經 lunch！

Notes：

- 如果做普通白麵包的話，用同等份量嘅高筋麵粉代替粟米粉即可。

- 雞蛋可用 50 毫升水代替。

- 麵糰發酵至九成滿約需 1 小時 30 分鐘。 

- 天氣凍嘅時候，可以將麵糰放入電飯煲內，按下保溫掣發酵，加快發酵速度，但要留意
  溫度，當溫度達到約 40 °C 時就要立即關掣，以免酵母因溫度過高而死亡。除此之外，
  亦可將麵糰連同一碗滾水放入焗爐內發酵。

 

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

 

人試人讚嘅杏仁蛋糕

    早前 share咗個杏仁雪芳蛋糕食譜俾 Louisa嘅朋友，Louisa 話番俾我聽佢哋勁讚個蛋糕好好食，咁我就問番Louisa佢自己有冇試，佢話未得閒整，於是我就應承整個俾佢試試啦！

呢個食譜又真係幾得，個個食過都讚好食！





見個形狀好靚，成頂皇冠咁，所以都無掉轉嚟影相呀。

    食譜可參考杏仁豆漿雪芳蛋糕做法。

蘋果甘筍布甸 Apple & Carrot Pudding

    中國嘅傳統曆法計算及廿四節氣真係好犀利，今個禮拜二

“立冬”，氣溫即刻急降，凍到呢 ……… 上街見到男女老幼都即刻著番件褸！

    天氣凍咗之後，連甜品都好自然會想熱食，最簡單不過嘅就係番薯糖水，又熱、又香、又甜、又辣，食完即刻暖笠笠，真係正到無朋友 o架！今晚就先嚟個西式熱食布甸先，之後熱食甜品陸續有嚟喇喂！！

布甸

材料：
低筋麵粉   90 克
泡打粉   1/2 茶匙
梳打粉   1/4 茶匙
肉桂粉   1/2 茶匙
薑粉   1/4 茶匙
鹽   少許
糖   80 克
橄欖油   40 克
雞蛋   1 隻
牛奶   125 毫升
蘋果   90 克
甘筍   90 克
椰絲   10 克

- 所有粉類過篩後加鹽、糖混合；甘筍去皮後刨成絲；蘋果去皮去芯，刨絲，備用。

- 雞蛋拂打成蛋液，與牛奶混合後再加入橄欖油拌勻。 

- 將液體材料倒入粉類材料內，用膠刮拌勻。

- 加入蘋果絲、甘筍絲同椰絲，拌勻後倒入已搽油嘅入爐焗盅內。

- 放入已預熱至 180 °C 嘅焗爐內焗約 40 - 50 分鐘即可。


檸檬醬汁

材料：
檸檬汁   2 湯匙
水   2 湯匙
糖   40 克
檸檬皮茸   1 茶匙
檸檬醬   10 克

- 除檸檬醬外，將其餘材料全部放入煲內，加熱煮至糖完全溶解。

- 加入檸檬醬，攪拌均勻後趁熱倒上布甸表面，即可享用。

以上材料份量可做 18 X 11 X 5 厘米布甸 1 盅。

參考食譜：The Complete Book of Home Baking by Heilie Pienaar.

不但焗到金黃色，面頭仲焗到有少少脆 o添呀！

食一啖熱辣辣布甸，即刻暖在心頭，幸福滿瀉呀！！

 

Notes：

- 食譜中嘅橄欖油可用 50 克牛油代替，先將凍牛油與粉類捽成麵包糠狀，再與液體材料混
  合即可。

- 如果鍾意的話，布甸內可加入適量乾果。 

- 檸檬醬製法請參考《自家製檸檬醬》，或可買現成檸檬醬代替。

- 淋上檸檬糖漿之前，最好先用針喺布甸拮窿，令糖漿可以滲入布甸內，更加好味。

 

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

蘿蔔泡菜

   呢個白蘿蔔泡菜其實係早幾個星期之前做 o架喇，醃好之後，除咗當做前菜食之外，我仲用佢嚟整咗其他嘢 o添。

 

材料：

大白蘿蔔   1 條

粗鹽   1/4 杯
糖     1 湯匙

韭菜   適量

 

醃料：

辣椒粉     1/2 杯

蝦醬   1 湯匙

蒜頭   1 粒

薑     1 大片

糖     1 湯匙

鹽     1 湯匙

 

- 蘿蔔刨皮後沖洗乾淨，之後切粗粒。

- 加入粗鹽及糖拌勻，移至筲箕內醃 1 個鐘，之後用清水沖洗多餘鹽份，瀝乾備用。

- 韭菜洗乾淨，切段；醃料中嘅薑同蒜頭分別切成薑蓉及蒜蓉。

- 將所有醃料材料拌勻成泡菜醃醬，備用。

- 蘿蔔粒同韭菜加入醃醬內，拌勻，之後倒入一個密氣容器內。

- 喺之前用嚟處理醃醬嘅兜內加入少量清水，再加入 1 茶匙糖及鹽，拌勻成醬汁。

- 將醬汁倒入材料內，冚好蓋，放入雪櫃內醃一日即可食用。

今次買咗包新嘅辣椒粉嚟整泡菜，味道勁辣，
食完之後只得四個字評語：辣到跳舞！！

用蘿蔔泡菜嚟拌麵食，正呀！

之後就用嚟整壽司。

仲用嚟炒粒粒 o添！
 

 

Notes：

- 除韭菜之外，亦可加入蔥及芹菜一齊醃漬。

- 想蘿蔔顏色更加鮮豔的話，可以喺加入醃醬前預先用少量辣椒粉將蘿蔔染紅。

- 醃蘿蔔時間越長就越入味。

 

 

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

洛神花

    因為身體狀況關係，老竇已經好耐無去佢個農場 friend 度幫手喇！上星期個農場 friend 約咗佢見面，拎咗個大冬瓜同幾個佛手瓜俾我哋，除此之外，仲送咗啲自己種嘅洛神花 o添！

有咁多洛神花，自己又唔係太好酸，應該送咁啲俾 “酸精” 就最啱喇，
點知佢話洛神花係好涼，上次飲完即刻 “累” 低，無福消受咁話喎！

新鮮嘅洛神花都係第一次見，顏色好靚呀！

呢啲就係曬乾嘅，直接用滾水沖就飲得！

仲有自家製洛神花果醬 o添，甜甜酸酸，幾好味，搽餅乾食一流！

無花果燕麥杏仁曲奇 Fig & Oat Almond Cookie

    呢排都唔知做乜咁鬼忙，唔好話去巡 blog，連自己寫 blog 都無時間，仲有幾篇都仲未 post 呀！真係要加把勁至得喇！

 

    首先補番上個禮拜五整嘅曲奇先。我一向都好少整曲奇，因為覺得好麻煩，好嘥時間，而且油份又高，所以每次整嚫多數都係送俾人。今次呢個曲奇就係送俾喺加拿大返港嘅老友葉生同葉太。

 

    整咁多次曲奇，最穩陣都係燕麥曲奇，一定夠鬆脆！

 

材料：

低筋麵粉   120 克
杏仁粉     40 克

泡打粉     1/2茶匙

梳打粉     1/4茶匙

雞蛋  1 隻

砂糖   30 克

黃糖   30 克

牛油   45 克
固體菜油   45 克

燕麥片     40 克

無花果乾   40 克

- 所有粉類混合過篩 3 次；牛油室溫放軟；雞蛋拂打成蛋液；無花果乾切碎。

- 牛油、固體菜油、砂糖同黃糖放入兜內，用電動打蛋器將材料混合，並打至軟身。

- 蛋液逐少加入牛油霜內，以低速拌勻。

- 將粉類混合物過篩到牛油霜內，加入燕麥及無花果乾，用膠刮拌勻成麵糊。

- 用湯匙勺出少量麵糊，搓成球體，放上已墊入爐紙嘅烤盤上，然後用手輕輕壓扁。

- 放入已預熱至 180 °C 嘅焗爐內焗約 15 分鐘至金黃。

- 出爐後等到曲奇略為放涼先好移到架上攤凍。

 

以上材料份量可做直徑 1 吋半曲奇 30 塊。

雖然杏仁粉用量唔多，但都聞到好香杏仁味。

買埋個靚靚紙盒嚟裝住啲曲奇送俾人，絕對唔失禮 o架！

 

 

Notes：
- 加入固體菜油可令成品至加鬆脆。

- 燕麥片最好選用原片燕麥 ( rolled oat )，可避免加熱時完全溶入麵糰內。

- 剛出爐嘅曲奇會比較軟身，所以要等到曲奇定形後先至好移至架上攤凍。

 

    你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

參蜜杞子蒸蛋糕

    今朝整咗個蛋糕，準備聽日要嚟送俾伯伯做生日蛋糕。

 

    記得上次整咗條香蕉蛋糕，伯娘同工人姐姐都好鍾意食，但伯伯就好似唔多鍾意，可能佢都係比較鍾意傳統蒸蛋糕啦，所以我今次都專登蒸蛋糕，仲加入咗杞子、人參粉同蜂蜜 o添！好食之餘又夠健康。

 

材料：

低筋麵粉   250 克

泡打粉     3 克

人參粉     10 克

鹽     2 克

杞子   40 克

雞蛋  5 隻

糖     160 克

蜂蜜   40 克

 

- 所有粉類過篩 3 次，之後加入鹽混合好。

- 杞子沖洗乾淨，用清水浸至軟身，瀝乾備用，浸杞子水留用。

- 雞蛋同糖放入兜內，用電動打蛋器打至 9 成企身。

- 將粉類加入蛋糊內，用膠刮以切拌方式均勻混合。

- 蜂蜜與 35 毫升浸杞子水拌勻，加入少量麵糊混合，之後倒回麵糊內拌勻。

- 拌入杞子後將麵糊倒入模內，隔水蒸約 45 分鐘至熟。

 

原本我係預留定少量杞子灑喺面 o架，點知都未得嚟蒸就已經沉哂底！

甜度啱啱好，又唔會太重人參粉嘅苦味，蛋糕又夠鬆軟，
希望伯伯會鍾意啦！

 

 

Notes：

- 人參粉同杞子份量可依個人口味增減。

- 要成功將蛋糊打至企身，可參考紅豆蒸蛋糕做法。

- 將粉類拌入蛋糊時，務必盡量輕手及快手，以免消泡，令蛋糕唔夠鬆軟。

 

 

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

星洲炒米

    福建無福建炒飯；海南島無海南雞飯；星加坡無星洲炒米，真係佩服啲大廚嘅創意！！

 

    星洲炒米喺酒樓就食得多，但係自己整都係第一次。一直都唔係太敢煮炒米粉，一來自己本身唔係太好米粉啦，但最重要係怕炒到 “碎濕濕” 之餘仲要黐哂鑊，預兩個人份量最後得番一個人份量，咁就真係搵嚟攪喇！上網睇過其他 blog 友嘅煮法，原來都唔駛點炒嘅，主要都係落水煮熟煮腍，之後加入其他配料兜勻就攪掂，咁就好好多喇！

 

    除咗知到煮法唔係想像中麻煩之外，促成今次呢頭 “好事” 就真係要多得「惠康」，因為早排見到我食開嗰隻米減價，咁啱米缸又就快 “無貨”，咁就梗係走去買啦，點知原來買米仲可以以優惠價換購兩大包星洲炒米粉，雖然我未食過呢隻牌子嘅米粉，但我知道好多人都會專買佢嚟整炒米粉，而且喺度執緊貨嗰位職員叔叔都話俾我聽呢隻米粉好食，叫我試吓咁話，咁我咪換兩包返嚟試試囉，難怪另外嗰款烏冬無人換，剩番哂喺度啦！

 

材料：

青椒
紅椒
急凍蝦仁

韭黃

洋蔥

叉燒

雞蛋

米粉

清雞湯

 

調味料：

咖喱粉

咖喱醬

鹽

糖
生抽

- 青、紅椒洗淨後去蒂去瓤，然後切條；蝦仁解凍後洗乾淨，挑去蝦腸，之後切雙飛。

- 韭黃洗淨切段；洋蔥去衣後切條；叉燒切絲；雞蛋拂打成蛋液，備用。

- 米粉用清水浸 10 分鐘至軟身，之後就盛起瀝乾水份，待用。

- 燒熱油，將蛋液煎成蛋皮，盛起後切成蛋絲。

- 之後逐一將青椒、紅椒、洋蔥、叉燒同蝦仁落鑊爆炒，之後盛起。

- 跟住爆香咖喱粉同咖喱醬，加入適量清雞湯煮開後，放入米粉。

- 用中慢火煮至米粉完全吸收哂水份後，就將其餘材料回鑊，加入鹽、糖同生抽調味。

- 最後加入韭黃，兜炒均勻後即可上碟。

就係呢隻炒米粉喇！同東莞米粉好唔同，入口無咁粗嚡之餘，仲好爽口。

好成功呀，啲米粉無炒到碎哂！






自己煮嘅好處係可以勁減油，清爽得嚟又健康。

Notes：

- 唔同牌子嘅米粉，煮法會有所不同，請參考包裝袋指示。

- 咖喱粉香但味淡；而咖喱醬則味濃但香味稍遜，兩者同用互補不足。

- 唔用清雞湯的話，可用清水代替。

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！