星洲炒米

    福建無福建炒飯；海南島無海南雞飯；星加坡無星洲炒米，真係佩服啲大廚嘅創意！！

 

    星洲炒米喺酒樓就食得多，但係自己整都係第一次。一直都唔係太敢煮炒米粉，一來自己本身唔係太好米粉啦，但最重要係怕炒到 “碎濕濕” 之餘仲要黐哂鑊，預兩個人份量最後得番一個人份量，咁就真係搵嚟攪喇！上網睇過其他 blog 友嘅煮法，原來都唔駛點炒嘅，主要都係落水煮熟煮腍，之後加入其他配料兜勻就攪掂，咁就好好多喇！

 

    除咗知到煮法唔係想像中麻煩之外，促成今次呢頭 “好事” 就真係要多得「惠康」，因為早排見到我食開嗰隻米減價，咁啱米缸又就快 “無貨”，咁就梗係走去買啦，點知原來買米仲可以以優惠價換購兩大包星洲炒米粉，雖然我未食過呢隻牌子嘅米粉，但我知道好多人都會專買佢嚟整炒米粉，而且喺度執緊貨嗰位職員叔叔都話俾我聽呢隻米粉好食，叫我試吓咁話，咁我咪換兩包返嚟試試囉，難怪另外嗰款烏冬無人換，剩番哂喺度啦！

 

材料：

青椒
紅椒
急凍蝦仁

韭黃

洋蔥

叉燒

雞蛋

米粉

清雞湯

 

調味料：

咖喱粉

咖喱醬

鹽

糖
生抽

- 青、紅椒洗淨後去蒂去瓤，然後切條；蝦仁解凍後洗乾淨，挑去蝦腸，之後切雙飛。

- 韭黃洗淨切段；洋蔥去衣後切條；叉燒切絲；雞蛋拂打成蛋液，備用。

- 米粉用清水浸 10 分鐘至軟身，之後就盛起瀝乾水份，待用。

- 燒熱油，將蛋液煎成蛋皮，盛起後切成蛋絲。

- 之後逐一將青椒、紅椒、洋蔥、叉燒同蝦仁落鑊爆炒，之後盛起。

- 跟住爆香咖喱粉同咖喱醬，加入適量清雞湯煮開後，放入米粉。

- 用中慢火煮至米粉完全吸收哂水份後，就將其餘材料回鑊，加入鹽、糖同生抽調味。

- 最後加入韭黃，兜炒均勻後即可上碟。

就係呢隻炒米粉喇！同東莞米粉好唔同，入口無咁粗嚡之餘，仲好爽口。

好成功呀，啲米粉無炒到碎哂！






自己煮嘅好處係可以勁減油，清爽得嚟又健康。

Notes：

- 唔同牌子嘅米粉，煮法會有所不同，請參考包裝袋指示。

- 咖喱粉香但味淡；而咖喱醬則味濃但香味稍遜，兩者同用互補不足。

- 唔用清雞湯的話，可用清水代替。

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！