2016 阿茂聚會

        噚日又係同 "兩老" 嘅阿茂聚會，上一次聚會已經係一年多前，大家都各有各忙，好難就到時間呢！

 

        今次多得 Winnie 帶部 V 仔過嚟整窩夫，老表就整咗 ciabatta。因為知道有好多甜嘢食，所以我就一直喺廚房努力咁準備 gado gado。

 

        除此之外，仲要多謝表姐為我哋整咗雜菜薯仔沙律，又要多謝老友送俾我哋嘅雜錦曲奇同 panettone。

 

 

一念素食

        呢兩個禮拜超級忙碌，幾乎每日都要出街，都無乜時間可以坐低寫 blog，依家個 schedule 開始回復正常，可以慢慢寫番之前想同大家分享嘅嘢。

 

        每年嘅中秋我都會食齋，因為係十五嘛，Ernest 媽咪知我中秋要食齋，所以特別請我去咗 HKU 嘅「一念素食」食 lunch。其實自從媽咪走咗之後，咁多年嚟都好似只係試過一次中秋做節食飯，所以我已經對 "團圓" 呢個字變得好陌生，今年中秋有老友一家同我一齊食飯，我當係做節㗎喇！

  

 

素友學做阿茂

        素友 Alice 同我一樣，唔鍾意食牙印包，偏愛歐陸式麵包。最近佢都想加入阿茂行列，試吓自己親手整麵包，所以早幾日佢就過咗嚟我屋企，同佢分享一吓我自己嘅製作經驗之餘，順便又食又傾。

 

 

與素友見面

        同人出街食飯，一定係只會我就人口味，叫佢選擇自己想食嘅嘢，從來都唔使人去就我，因為其實我乜都係咁食，又唔太計較好味與否，總之食得落肚就得㗎喇！我成日都提住喺口唇邊，呢個世界仲有啲人係連飲啖乾淨清水都係一種奢侈，真係唔好食得咁 "招積"！！我唯一唔食嘅嘢就係有臊 / 羶味食物，偏偏呢類食物就涵蓋甚廣，牛肉啦、奶類製品啦、羊啦、鴨啦、鵝啦 ……… 而且我由細到大都唔係食肉獸，飲食習慣都以蔬菜為主，所以攪到成日俾人話我揀飲擇食、偏食，後來喺「素食青年」群組度見到好多素友分享類似經驗，先知道原來其實都係一種對飲食習慣嘅歧視，好多素友都覺得好煩惱，甚至有諗過放棄食素，因為真係受唔住身邊人嘅 "指控"。呢個世界真係好多人唔識得尊重同包容人，永遠都硬係要將自己嗰套加喺人身上，做得到就認同你，做唔到呢？呵呵，咁你就慘囉，注定一世俾人話！！難怪輔導姑娘都同我講話我無錯，只係世人問題。所以我都習慣咗自己就人好過要人就我，如果咁啱嗰日係要食齋的話，我就一定唔會應約，費事煩，人家知道你要食齋，就好自然話會就我，但其實對方係唔鍾意食素的話，食得唔開心、唔暢快咁去就我的話，咁就無謂啦！

 

        最近喺群組度識咗個素友，大家都好啱傾之餘，原來仲住埋同一區，噚日就約咗出嚟見面，素友帶咗我去市中心間「友間齋舖」食 tea 兼傾偈，今次就唔使互相遷就對方口味都可以食得舒服，食得開心，同埋又再一次證明，搵人傾偈真係要搵番同人星球嘅人先好傾，真係舒服好多，可以講到真心嗰句出嚟！

 

 

與兩老短聚

        見到寫住兩老，咪以為係講緊我媽咪同我老竇呀，我邊有咁好福氣呀！！係老友 Winnie 同老表 Lily 至真。

 

        因為老表即將獻出佢嘅第一次，要公開演奏呀，所以咪特邀老友呢位老師過嚟聽吓佢彈成點囉，順便俾佢實習一下面對人彈琴的壓力。

 

 

Lunch Meeting

        講番禮拜五個 lunch meeting，我哋一行四人去咗灣仔「Cupping Room」食 lunch，咖啡同食物都唔錯，有賣相、有味道，但環境就唔多舒適，因為地方細人又多，lunch time 時坐滿人之後就非常之嘈，講嘢要好似嗌咁，聽嗰個就好似借咗聾耳陳隻耳咁！！

 

 

AeroPress Coffee Maker

        早幾個月搭巴士時，睇到個節目有位咖啡師教沖咖啡，佢用一個叫做 AeroPress 嘅器具嚟沖，我越睇就越覺得好熟口面，好似 Ernest 媽咪上次送俾我嗰套咖啡套裝，於是返到屋企就即刻要驗證一下，果然真係！！

 

       當初我見到個 coffee maker 時，睇個外形，一直都諗住係一個充滿時尚 design 嘅越南滴漏咖啡壺，因之前有過用越南滴漏咖啡壺嘅經驗，覺得又慢又麻煩，所以就無理到佢，繼續用番濾紙方法去沖套裝內嘅三包咖啡豆。

 

       

老表學整包

         老表都準備加入 “阿茂” 行列喇，因為 Winnie 將部舊麵包機讓咗俾佢。咁今日就順便約埋 Winnie 過嚟一齊整包。

 

 

社企素食餐廳 - 樂農

噚日晨咁早 9:00am 就要陪伯娘到金鐘高等法院攪伯伯啲遺產，11:30 am 已經攪掂好哂，送埋伯娘去地鐵站之後，中間空成 6 粒鐘先至教琴，周街行都行唔到咁耐，最好就係搵間食肆歇腳。

其實呢個時間已經係人家準備食晏，但因為實在太早五點零六點就要起身，根本就無時間食嘢，所以 "嗱嗱林" 趁 12:00 pm 之前搵地方坐低食我嘅早餐，費事同放食 lunch 嘅人爭位。噚日係十五，我當然係食齋啦，所以我之前其實已經一早鎖定好目標，要幫襯曾志偉喺灣仔間素食餐廳「樂農」。

餐廳係屬於社會企業，店內員工大部份都係聽障人仕，所以對我嚟講，
$45 一份 set lunch 其實唔平，但係本住支持社會弱勢小眾嘅心態
去幫襯，以行動去支持佢哋，況且我又真係要食齋，
一舉兩得，何樂而不為呢！

$45 嘅套餐係包括三餸一湯連紅米飯，南瓜雜豆湯非常清甜，
飲第一啖已經好有住家湯水 feel，完全無落味精，
全靠豆類同蔬菜嘅天然甜味，值得一讚！

套餐其實係有六款菜式任擇三款，呢個係豉汁涼瓜鮮竹球，豉汁味道
唔會太過鹹，啱我口味，鮮腐竹球就最正，因為索哂汁
兼好有豆香味，仲好軟熟呀！

呢個係五香麵筋，其實係軟熟版嘅齋鴨腎，三款之中我覺得
呢個最好味，又香又辣，仲甜甜哋，好惹味。

其實我都幾怕喺街食茄子菜式，因為多數都整得好油，食完之後都一定會痾，
但係呢味黑椒味菜茄子值得一讚，完全唔油膩。不過我覺得黑椒
味唔夠，唔係睇番個 menu 都唔記得咗係用黑椒煮。

紅米飯係免費添加，原本見到佢細細碗都諗住食完要加多碗，但食完都幾飽，
所以無再添喇！可能一來我唔係太習慣咁早就塞碗飯兼一碗湯
落肚啦，二來係紅米比例都相對多，所以比較飽肚。

餐廳內仲有售賣一啲公平交易嘅有機食品，健康有益之餘，
又可以保障到第三世界勞動人口得到應有
合理回報，又要讚哦！



有興趣想知多少少嘅朋友，可以 click 入呢個

三人下午茶

三條友仔走埋又做阿茂玩 afternoon tea，傾吓、講吓、食吓咁就渡過一個周末。

話明係 afternoon tea，當然有 tea & scone 啦！
但美中不足嘅係，獨欠一個三層架！

今次整咗無花果合桃 muffin，老表成日話 muffin 整唔成功，
所以今次要由佢親自操刀，睇吓佢衰邊辦。

Scone 就用咗冧酒提子乾、薑粉同檸檬皮茸去整，所以味道特別香！

有 scone 又點少得果醬呢！自家製檸檬醬出場。

意粉沙律用上日式醬汁，有日本蛋黃醬、日式芝麻醬同 wasabi。

三個阿茂整包餅

今日同老表上完堂之後，叫埋 Winnie 過嚟，三條友一齊做阿茂，整包又整餅，開開心心渡過周日。

Wow，好豐富哦！不過代價就係要佢哋兩個陪埋我一樣
好晏先食 lunch，因為要等個包發酵嘛！

等緊麵糰發酵時，當然唔會浪費時間啦，老表 Lily 繼續整佢嘅至愛 biscotti。

每塊 biscotti 都焗到金黃色，而且仲有香濃橙味。

整好 pumpernickel 之後，夾入青瓜、煙三文魚
及芥末蛋沙律，超正嘅三文治啊！

又到老表玩打奶泡，今次用咗燕麥鈣思寶嚟打，超易打起之餘，
燕麥味仲為咖啡提升香濃味道哦！

我噚日整定嘅咖啡 mousse cake。

想糕餅有香濃咖啡味道，真係要用 espresso 至得，今次個咖啡味
好出，兩位女仕一食就食得出喇！

奶皇月餅

        每年中秋，奶皇月餅都成為搶手貨，酒店出品閒閒哋都幾百蚊一盒，好食嗎？值嗎？真係見人見智喇！

        老友 Louisa 早年跟名師傅學整奶皇月餅，食過佢嘅自家改良月餅，真係無得彈，奶皇餡香濃，且軟而不實，餅皮夠鬆酥又唔會有過重牛油臊味，比起嗰間開賣時要出動到警察嘅酒店出品，好食千萬倍！！唔係淨係我咁講，有試過的朋友都係咁話㗎！

        真係好佩服 Louisa，一個人、一雙手，今年就整咗差唔多六百個月餅，仲接到台灣訂單㖭！既然呢個奶皇月餅咁正，我就問咗佢拎個私房食譜，約埋 Winnie 一齊上去 Ernest 媽咪屋企一齊做阿茂喇！！

新年糕、糕、糕

    今年初二同初三都得閒喺屋企，不過都係嗰句，放假喺屋企仲忙過返工，何解？咪就係匿喺個廚房度做嘢囉！

 

    今年蒸咗三底糕，有鹹有甜，最開心嘅係每底糕都只用咗 20 分鐘就蒸好，你哋唔好以為我蒸咗迷你版嘅糕呀，所以咁快就蒸好，查實係因為用咗真空煲去蒸，真係勁慳柴火之餘又環保。不過就有辣有唔辣喇，因為個真空煲闊度有限，唔係任何形狀嘅模都放得入，想用個長形模蒸就免問喇，除非係細嘅磅蛋糕模啦！

 

今年蒸咗底素蘿蔔糕，咁就可以用嚟供佛同埋同媽咪分享。

五香臘味芋頭糕就梗要 encore o架喇，因為上年老竇讚好食過街賣嗰啲。

 

甜糕就整咗黑糖薑汁年糕，味道暫時唔知，食完再同大家分享啦！

 

2012 團年飯

    阿馳同阿瑩禮拜一嗰日返嚟食團年飯，由於自己感冒都未完全清得哂，個人仲係覺得 “死吓死吓” 咁，加上今年過年好似好趕咁，覺得時間極唔夠用，所以今餐團年飯整嘅嘢都以簡單為主，反正最重要都係一家人坐低一齊食飯啫！

首先上枱嘅，係我嘅拿手素雜菜湯，咪以為齋湯唔好飲呀，用咗甘荀、
番茄、薯仔、洋蔥、椰菜、紅腰豆、三角豆同栗子煲，樣樣都係
超甜材料，點會唔甜至得o架！加埋茄膏同月桂葉，
前一日預早煲定，夠哂濃味啦！

跟住就係整燒肉，又係前一晚整定、醃好，到時放入爐一焗攪掂，
完全唔駛理佢，仲方便過整叉燒呀！個皮勁脆，”索索聲”，
真係成枱人都聽到，佢哋幾個簡直食到耳仔郁啦！

呢碟係紅咖喱茄子雞，加埋雞髀菇一齊煮，非常好味，估唔到一向
唔食辣嘅阿馳都猛咁食，梗係啦，皆因樽紅咖喱醬所餘無幾，
其實唔係好夠煮咁大碟，所以咪唔會好辣囉！
得閒都要再煮定啲紅咖喱醬至得喇！

我唔係食肉獸，所以一定要有碟菜，呢碟金菇蟹柳扒娃娃菜就夠哂
簡單易整，清清哋，食完濃味咖喱之後食就最啱。

飯後甜品出場，就係自家製無豬油擂沙湯丸。

由於無落到豬油，就連植物油一滴都無落，所以芝麻餡唔會流出嚟，
不過自家炒香芝麻真係勁香濃，再加埋花生醬，想唔香口
都幾難啦！自己食的話，流唔流心都唔緊要啦，
最緊要健康嘛，食得開心又放心。

冰皮月餅

        各位 blog 友們，中秋節快樂呀！

        今年我同 Winnie 一齊整冰皮月餅，由於係第一次整嘅關係，所以唔係好識預材料，原本諗住整大約四十個月餅，每人分廿個，點知結果整出成八十個有多，有睇我之前幾篇 blog 的話，都應該知道仲剩咗好多餡 o添！所以基本上都係送俾人多過自己食。

        我同 Winnie 兩個都玩得幾開心，最重要係有份食過嘅親友都讚好食，第一次整，都算係咁 o架喇！

Winnie 話要影番張 "曬冷" 照！

 

首先亮相嘅係奶皇冰皮，Winnie 煮咗兩款奶皇餡，一款係跟 T&P
整嘅原裝正版，另一款係為我而整嘅無牛油無奶版。

 

呢個就係我負責煮嘅豆蓉餡加鹹蛋黃，個人非常鍾意呢個味道。

 

跟住呢個係綠茶味，綠色玫瑰係咁多個配搭之中最靚嘅。

 

Mocha 冰皮，係朱古力皮加咖啡餡。

 

最後出場嘅係淨豆蓉餡。

 

我仲專登買咗啲禮盒要嚟送禮 o添。

 

第一次整月餅，梗係要同媽咪一齊分享啦！

        小弟喺度祝各位一家團圓，開開心心，中秋節快樂！

六月阿茂聚會

        幾個阿茂噚日又試約埋一齊整餅喇！

上個禮拜二家姐整過一次四川担担麵俾我哋食，真係食過番尋味，
Winnie 聽見都流哂口水，所以噚日 lunch 就整多次俾佢試吓！

 

煮好麵，加入担担麵醬同其他材料，一撈就食得。

 

明仔 request 要整嘅 doughnut，炸好之後就即刻蘸上肉桂糖，
熱辣辣即食，勁好味，又唔會好似街賣果啲咁油，正！

 

Louisa 負責炸，對佢嚟講簡直係手板眼見功夫啦！

 

呢串貌似炸魚蛋嘅物體，其實係將 doughnut 麵糰中間 "吸"
出嚟嘅小麵糰炸埋，之後串埋一串。

 

晚飯時間到喇，呢煲係 Louisa 整嘅香濃南瓜湯，非常清甜。

 

爽脆沙律菜。

 

估唔到 Louisa 勁鍾意食無錫排骨，噚晚都有整，不過就交哂俾
工人 Jovy 負責，咁就弊喇，唔單只煮燶咗，仲鹹到唔食得！！
學 Winnie 話齋，真係唔可以假手於人呀，唉！

 

呢煲係海鮮 risotto，原本都係 Louisa 負責煮，但係佢噚日實在太攰，
加上非常腳痛，唔可以再企落去，所以就由我接手去煮，
好彩味道都唔差啫！

 

煙肉薯蓉。

 

呢個就係我無份整嘅 rapsberry mousse cake，顏色真係好靚，
不過食味太酸，只有酸精 Winnie 鍾意食！

 

切件後更加吸引人呢！