社企素食餐廳 - 樂農

噚日晨咁早 9:00am 就要陪伯娘到金鐘高等法院攪伯伯啲遺產，11:30 am 已經攪掂好哂，送埋伯娘去地鐵站之後，中間空成 6 粒鐘先至教琴，周街行都行唔到咁耐，最好就係搵間食肆歇腳。

其實呢個時間已經係人家準備食晏，但因為實在太早五點零六點就要起身，根本就無時間食嘢，所以 "嗱嗱林" 趁 12:00 pm 之前搵地方坐低食我嘅早餐，費事同放食 lunch 嘅人爭位。噚日係十五，我當然係食齋啦，所以我之前其實已經一早鎖定好目標，要幫襯曾志偉喺灣仔間素食餐廳「樂農」。

餐廳係屬於社會企業，店內員工大部份都係聽障人仕，所以對我嚟講，
$45 一份 set lunch 其實唔平，但係本住支持社會弱勢小眾嘅心態
去幫襯，以行動去支持佢哋，況且我又真係要食齋，
一舉兩得，何樂而不為呢！

$45 嘅套餐係包括三餸一湯連紅米飯，南瓜雜豆湯非常清甜，
飲第一啖已經好有住家湯水 feel，完全無落味精，
全靠豆類同蔬菜嘅天然甜味，值得一讚！

套餐其實係有六款菜式任擇三款，呢個係豉汁涼瓜鮮竹球，豉汁味道
唔會太過鹹，啱我口味，鮮腐竹球就最正，因為索哂汁
兼好有豆香味，仲好軟熟呀！

呢個係五香麵筋，其實係軟熟版嘅齋鴨腎，三款之中我覺得
呢個最好味，又香又辣，仲甜甜哋，好惹味。

其實我都幾怕喺街食茄子菜式，因為多數都整得好油，食完之後都一定會痾，
但係呢味黑椒味菜茄子值得一讚，完全唔油膩。不過我覺得黑椒
味唔夠，唔係睇番個 menu 都唔記得咗係用黑椒煮。

紅米飯係免費添加，原本見到佢細細碗都諗住食完要加多碗，但食完都幾飽，
所以無再添喇！可能一來我唔係太習慣咁早就塞碗飯兼一碗湯
落肚啦，二來係紅米比例都相對多，所以比較飽肚。

餐廳內仲有售賣一啲公平交易嘅有機食品，健康有益之餘，
又可以保障到第三世界勞動人口得到應有
合理回報，又要讚哦！



有興趣想知多少少嘅朋友，可以 click 入呢個