參巴辣椒醬 Sambal Tumis

           之前喺 Ernest 屋企食過佢媽咪嘅自家出品，勁好味，非常吸引，而且《經典娘惹菜》入面又有呢個辣醬嘅食譜，所以一直想試整好耐，但因為所用材料都唔係咁易買得到，買得到一樣又買唔到另一樣，而且又唔係度度都有得賣，直到搵到上次喺《泰式酸辣雜菜湯》裡面同大家講嘅灣仔街市檔口，先至可以買齊哂所有材料咋！ 

        既然買齊哂材料，又有食譜喺手，再請教埋 Ernest 媽咪嘅心得同秘技，可以開工喇喂！

材料：
馬拉盞 25 克
蝦米 20 克
糖 2 湯匙
鹽 適量
青檸 1 個
油 適量 

香料：
乾蔥頭 約 300 克
紅辣椒 4 – 5 隻
指天椒 3 隻
辣椒乾 5 隻
香茅 2 枝
黃薑 30 克
南薑 20 克
石栗 6 粒

- 馬拉盞切薄片，放入焗爐內用 140” ℃ 焗至香味出，之後用叉壓碎備用。

- 蝦米洗淨後用水浸至軟身，瀝乾水後切碎。

- 乾蔥頭去衣；紅辣椒及指天椒洗淨後去蒂、去籽；辣椒乾用水浸軟後去籽。

- 香茅除去最外一層，將白色部份略拍鬆，之後切細。

- 黃薑同南薑去皮、切細；石栗略拍碎。

- 將所有香料材料放入攪拌機內打碎至細末狀。

- 燒熱少量油，將馬拉盞同蝦米放入爆香，其後加入打碎香料及適量油，不斷兜炒至油
  份滲出。

- 加鹽、糖調味，繼續兜炒成辣醬狀，最後灑入青檸汁，兜炒均勻即成。

- 將辣醬入樽，攤凍後放入雪櫃儲存。

雖然用料頗多，但其實一啲都唔難整，係煩啲囉！不過煮完出嚟
好食都值得嘅，不單之可以當成一般辣醬作佐料用之外，
仲可以用嚟煮東南亞餸菜㖭呀！

原來紅辣椒都唔易買得到，起碼我屋企附近個街市就無呢款紅辣椒買，淨係得
大大條、”鬆泡泡” 嗰款有得賣，但 Ernest 媽咪話嗰款唔夠香又唔夠辣，
建議最好買呢款相對幼長結實的一種會比較好。其實喺兩大
連鎖超市都有得賣，$6.9 / 60g，以一斤 600 克計算，
咁即係要 $69 斤，癲㗎！！！依家呢度呢幾隻
都係喺灣仔街市檔口買，比超市賣嘅大隻
好多，事頭婆都係收我 $5 咋！

跟 Ernest 媽咪習慣，食之前撈埋啲炸香魚乾仔同焗香脆嘅花生，呢碟
平凡不過嘅青瓜雞柳黃薑飯，頓時生色不少，即刻變得惹味開胃！
因為我都係第一次用呢款紅辣椒，唔知佢辣成點，唔敢
用得太多，所以顏色唔夠紅之餘又唔夠辣，
下次再整時就要大手加碼至得喇！

Notes：
- 馬拉盞亦可放白鑊烘香。

- 油嘅用量以足夠被所有材料完全吸收為準。

- 用上三種不同辣椒，取其不同特性：要紅辣椒嘅色，指天椒嘅辣，以及辣椒乾嘅香。

- 所有材料份量僅供參考，可依個人口味喜好增減。