2008年8月24日星期日

Seems so sweet!

        今日喺吉之島超市閒逛時,見到一 pair 疑似 gay couple 嘅物體,本來我都無留意佢地嘅,但係其中一個生得非常之高,真係好高o架,高到我行咗過隔離條 alley 都仲見到佢個頭喺啲的貨架上面凸咗出嚟黎,真係可以去打 NBA 呀,所以咪留意到佢囉!


        我見到佢同埋另外一個男仔一齊,雖然佢地無做啲好親暱嘅行為,但佢地就好似對情侶咁喺度選擇食材、醬料,有傾有講,有商有量,感覺好 sweet,真係好多男女、夫妻都未必會咁。或者可能佢哋兩個只係一對好鍾意煮嘢食,對烹飪好有研究嘅老死嚟啦,只係我少見多怪啫,但如果佢哋真係純粹只係朋友就更加難得,有咁好嘅友情喎,起碼我媽咪同我老豆都無咁樣啦,反而媽咪同我就會咁。


        哎吔,唔知我哋以前行超市時有冇試過同樣俾人誤會係兩公婆呢?你哋唔好以為我喺度攪笑呀,印象中真係有啲咁o既事,事關我媽咪喺未病之前,個樣生得真係好後生o架,好多人都估細咗佢十年,反而我就成日俾人估大咗十年,因為甩髮囉,個 image 自然老咗好多,所以我哋表面上睇嚟年紀就會拉近唔少。我好記得喺十幾年前,我陪媽咪去養和醫院做檢查時,姑娘問佢幾多歲,佢就答四十幾歲 (已經唔記得咗當時佢幾多歲啦),跟住個姑娘死都唔信,一味話:「無呀,無呀,妳記錯咋!三十幾處呀!」跟住直到我媽咪俾張身份証佢睇,佢睇完個出身年份之後,用計數機計一計,見到個答案先至肯相信,跟住就話:「依,真係四十幾喎。」自此之後,我就成日都拎番呢件事出嚟笑佢,佢當然唔嬲啦,人哋讚佢生得後生噃。


        有時無聊得滯,都會諗吓,如果我可以搵到個人一樣鍾意音樂,識玩樂器,又鍾意煮嘢食都幾好噃,得閒傾吓音樂,夾吓琴,整吓野食,都幾 "盞鬼"喎。本來 Winnie 都可以嘅,不過以佢 "咁懶" 嘅性格 (係佢自己咁樣形容自己咋,我無抵毀佢o架 ),佢啋你都傻,佢實會話:「咪玩啦,走去買嚟食好過煮啦!」哈哈!而明仔都可以一齊煮整下嘢食、整吓蛋糕,不過夾琴佢就唔會啦,佢實嫌我彈琴彈得差啦,梗係啦,人哋已經考咗 FTCL 啦噃,成績仲唔錯o添!


好驚!

        今朝未夠 6:00am "天濛光"就突然 "紮醒" o左,又唔知點解無端端會伸隻手去摸o下個頭,當我一摸落去個 "後尾枕" 時,頓時成手濕哂,仲要係濕得好利害,連o訓到 "濛濛鬆鬆" o既我都 feel 到濕,你可知濕得幾離譜!當時我第一個反應就係:有冇攪錯呀,我一o的都唔熱喎,唔開冷氣、唔開風扇、仲要 "妗" 被,點會成頭汗o架!?於是我就諗住將隻手擺近我塊面,feel o下係咪 "標淡汗",點知當我隻手擺近個鼻時就即刻聞到好大陣血腥味,攪到我成個人即刻醒哂,睇真o的隻手果然全手都係血,再望o下個枕頭,真係有血漬,於是立即走去廁所洗手,跟住用廁紙抹頭,果然不停出血!但奇就奇在我搵極都搵唔到個傷口o係邊度,即使我睇唔到我個 "後尾枕",但係流血流得咁犀利,應該唔多唔少都會搵到一個位係痛o架,但真係搵極都搵唔到,搵到o的血都乾埋唔再流,張廁紙都再抹唔到血,都搵唔到,真係好奇怪,於是唯有墊張廁紙o係枕頭上面用o黎 "索" 血,跟住咪繼續o訓囉!

2008年8月22日星期五

杏仁露麥片


        徬晚時分有o的肚餓,又見都就快食飯,所以諗住整包即沖杏仁茶算數,但係又驚唔 "頂肚",未到晚飯已經要再食o野,於是就諗到不如加些少燕麥片落去,應該會飽肚o的。將o的即沖杏仁茶粉溝埋o的麥片,撈均後加熱水,稍稍攪拌,再放入微波爐叮一叮,攪掂,即刻有得食,簡單快趣又好味!


好耐未試過大昏迷啦!

        原本今日係要由朝教到晚,九點幾鐘出門口,一直到夜晚差唔多十點先返到屋企,點知突然間剎出隻 "鸚鵡",仲來勢凶凶咁,咁就無端端放日假,乜都唔駛做,朝早醒一醒時聽電台報告已經改掛o左 8 號風球,於是就疊埋心水繼續去搵我條仔 "周公子",點只一o訓就o訓到晏晝差唔多一點鐘,起o左身梳洗完之後就去煮 "早餐",話就話係早餐,但其實連 brunch 都唔係囉!因為煮得o黎都已經兩點幾啦,好多人o係呢個時間可能已經 plan 定佢o地o既 afternoon tea,所以,嚴格上o黎講我係三餐縮埋一餐食,真係夠哂慳皮!


        自從媽咪走左o既第二日開始,我就無啦啦唔知點解,唔駛鬧鐘都自動自覺六點幾七點起身,仲唔會覺得 [支力] o添喎,真係好奇怪!我仲好記得媽咪臨走前同我講:「你唔好掉o左o的食譜啦,收番埋佢,我走o左之後,無人陪你,得閒你就可以煮o下o野食,打發o下時間,唔駛o係屋企咁悶。唏!不過你成日都o訓到黃朝八晏先起身,一日o既時間都好快過!」媽咪即係媽咪,真係了解我,但佢估都估唔到我會變到咁早起身,所以o的日子都真係幾難捱,而我開始去煮o野食亦都係因為佢呢番話!


        後來個生理時鐘開始校番o岩果陣,我就要校定鬧鐘每朝8:00am起身,或者更做,因為要o係返工前做好家務:洗好衫、煲落湯、預備定夜晚果餐、做好清潔、執好屋、抹乾淨觀音佛壇…………  所以到o左近排就成日都唔夠o訓,做o左三十幾年人,眼肚都未試過咁黑,真係好想有一日真正放o下假,o訓番夠本,果然今日就夢想成真啦!個感覺就好似平時去超市格價時,見到o的唔係咁迫切要用o既o野,都會好忍到手,等到佢真正減價先買,每次都真係俾我等到喎,o係依家通脹高企o既時候,咁就可以慳到唔少啦!


         好啦,繼續做o野lu!


2008年8月14日星期四

Harry Potter !?

        今日o係港島果邊教完琴之後要過去將軍澳繼續教,所以搭地鐵果陣要係北角站轉乘將軍澳線。o係果度轉過車o既朋友都必定會行過呢條通道:

 

 

        其實我都唔係第一次行呢條通道,但係唔知點解,今日行o既時候,望住呢條通道o既拱形天花,突然間俾到我一種好特別o既感覺,我覺得當我穿過這條通道後,所搭o既列車係會載我去見我媽咪,咁咪即係去到西方極樂世界?如果係真就好啦!!到我 "清醒" 番之後,心想:乜咁似 Harry Potter o係station platform 度撞入其中一個柱位,就可以到達通往魔法學校的列車月台o既。


        之後o係東港城間美心MX度食 tea (其實係我餐晏至真,我慣o左2:30pm之後先食lunch),咁好彩有個卡位無人坐,於是我就坐埋去,當然,呢個時間都唔會有人搭枱,所以我就對住 "空氣" 坐同食o野。突然間,我 feel 到媽咪坐o係我對面陪我一齊食o野,仲好開心o添!個情景就好似我有一次o係 Spaghetti House 度偷影我媽咪o既相一樣,因為同樣係坐o係卡位,而媽咪就正正坐我對面,擺出一副 "無你咁好氣" o既樣:http://hk.myblog.yahoo.com/kestrelkwan/photo?pid=25&fid=8


個感覺真係好真實,而且仲同我傾謁o添!之後再一次 "清醒" 過來,知道根本係無可能,一向眼淺o既我,梗係又眼濕濕啦。


        唉,始終都係媽咪比我幸福,如果掉轉係我走先,佢傷心o既程度一定會比我更甚,所以,雖然媽咪離開o左我係非常之傷心同心痛,但係我成日都同自己講:「咁都好呀,起碼等我自己傷心好過要佢為我傷心呀!」我成日都話,o係呢方面我會好自私,我希望自己走先過其他人,等自己唔駛傷心,剩低o既人傷心總好過自己傷心嘛!


2008年8月12日星期二

雙冬肉粒湯


        一個既簡單、又易煮o既湯:


材料:
冬瓜
冬菇
瘦肉
薑片


醃料:


生抽
粟粉


        首先將瘦肉洗淨,切粒,然後用醃料醃好,今次我無加到油落去,係因為o的瘦肉唔係落鑊炒,所以唔駛驚黏鑊,同埋唔想滾出o黎o既湯好肥膩。冬菇預先用凍水浸軟,記得唔好貪快用熱水浸呀,媽咪話咁樣會令到o的冬菇變韌,想快o的浸軟o既話,就記得加o的砂糖落去o的凍水度,咁就 OK 啦。浸軟之後洗淨、揸乾水同去蒂,跟住切粒。冬瓜去皮、去瓤,切粒。


        煲滾水,先落冬菇、薑片、瘦肉,等佢地可以滾耐o的,比較出味,之後就落埋o的冬瓜粒,等到o的冬瓜粒都煲腍身就完成,最後加鹽調味,咁就大功告成,


        係咪好 easy 呢!


2008年8月10日星期日

改良魚香茄子


        我點解會叫佢做 "改良" 呢?係因為以前聽媽咪講過,正宗o既魚香茄子係利用獨特的汁料去做出一種 "魚香" o既味道,跟本係無魚係裡面;而一般食肆的魚香茄子都會加o左好多其他材料,如:免治豬肉、鹹魚等,同原本正宗的有所出入,所以我會叫呢類菜式做 "改良"菜式。而我今次o既魚香茄子就加入o左免治豬肉,因為多o的料,可分兩餐,咁就可以煮少餐啦!


材料:
茄子
免治豬肉
薑茸
蒜茸
蔥花


芡汁:
老抽


鎮江醋
豆瓣醬


        首先將o的免治豬肉用鹽、糖、魚露、粟粉醃好,今次我無用生抽而改用魚露,係因為想做到有 "真" 魚味,明乎其實的 "改良"。之後我會將o的茄子白鑊炒一炒,蒸發部分的濕氣後盛起,跟住就爆香蒜茸,落豬肉炒至七成熟,盛起。落薑茸爆一爆,將o的茄子回鑊加些小水煮至腍身,之後就將o的獻汁倒埋落去,兜兩兜,最後灑上蔥花,加小小麻油,搞掂,上碟啦!


2008年8月8日星期五

香蕉西多士 & 香脆玉桂多士條




        西多士都算係我細個果陣媽咪好多時都會整o既西點,因為呢個係一個好好處理隔夜麵飽o既方法,又好味、又吸引,所以我間中都有整o黎食呀!


材料:


香蕉
白方飽
雞蛋 


        首先將o的方飽切皮,香蕉用叉搓成茸,然後搽在方飽上,再疊上另一塊方飽,記得要用少少力按一按麵飽,係煎o既時候兩塊麵飽就無咁易分開。跟住就將雞蛋打成蛋汁,再將之前準備好的麵飽均勻地蘸滿蛋汁,之後就可以放落平底鑊度煎香。因為我用的方飽係"嘉頓生命麵飽",本身都幾油膩下,所以我無落油煎,就咁白鑊煎就算,所以你會見到有一塊西多士係比較深色,因為有少許"濃",所以之後煎另一塊時就用最慢火去煎,顏色即刻靚好多,完全係金黃色。另外,因為o的香蕉好夠熟、好甜,所以我無煮到糖漿,到食o既時候果然已經夠哂甜味。


        一向孤寒慳家,唔鍾意浪費食物o既我,當然唔會就咁"拋棄"左o的麵飽皮啦!我將o的麵飽皮蘸埋剩下o既蛋汁,同樣放o係平底鑊度,不過今次就唔係煎,而係白鑊將佢烘脆,當見到o的麵飽皮已經烘到轉色,就即係話差唔多OK啦,跟住就試下o岩唔o岩自己口味o既鬆脆度,適合的話就可以上碟,再o係上面灑上玉桂粉,味道果然唔同哂,不但香口鬆脆,仲有淡淡o既玉桂香味添,正!



        呢個就係香脆玉桂多士條啦。


2008年8月5日星期二

柚子沙律


材料:
泰國金柚
馬蹄
紅蔥頭
烘椰絲
炸蝦米
炒花生


沙律汁:
檸檬汁
檸檬皮茸
魚露
辣椒汁
砂糖


        今次算係我第一次跟食譜整嘢食,平時都係靠自己諗番食過嘅味道去估計材料同煮法,又或者係媽咪教我嘅方法去煮番出嚟。呢次就跟住 Jacky Yu 個食譜整嘅。


        先將泰國金柚拆肉、撕碎;馬蹄去皮、切粒;紅蔥頭去衣,洗淨切圈,然後浸一浸凍水,可以減少紅蔥頭嘅辛辣味;椰絲原本就放焗爐度烘至焦黃色,但係我就賴得搬個焗爐出嚟,所以就咁放喺個鑊度炒至變色;蝦米就預先洗淨、浸熱水至軟身,用抹手紙抹乾水後,放落油鑊度炸脆;花生去衣後放白鑊炒香,攤凍後就可以壓碎佢。之後就將所有材料拌勻 (椰絲、蝦米、花生後下),再將已經調好味嘅沙律汁倒埋落去,最後灑上椰絲、蝦米同花生,咁就食得啦!


        我覺到呢個沙律好好食,好清新,不過 Lily 試過就話個金柚唔夠甜同唔夠多汁,所以 "掙啲" ,而我就覺得最美中不足嘅就係無新鮮九層塔 (金不換) ,可能個味道已經掙咗好遠都唔定。