2009年5月30日星期六

黑麥@Pumpernickel

       無錯,的確又係「Pumpernickel」嘅黑麥包,真係勁鍾意佢囉,介紹嚫俾朋友試,無一不立即愛上它,Lily 如是、Winnie 如是、就連 Louisa 都如是,你話呢個黑麥包係咪真係魅力沒法擋呢!


腐乳京蔥炒肉片



材料:
枚頭瘦肉
京蔥
蒜茸
油爆辣椒


醃料:


生抽
玫瑰露
粟粉
橄欖油


調味料:
腐乳 ( 連腐乳汁 )
玫瑰露


- 豬肉洗淨、切片,用醃料醃 30 分鐘以上。


- 京蔥洗乾淨後,切粗片備用。


- 燒熱油,先放蒜茸落鑊爆香,之後加入豬肉炒至 8成熟,其間灒酒,盛起備用。


- 跟住就爆炒京蔥,落鑊後灒酒,跟住加少少水炒至軟身,盛起。


- 預先將腐乳搓爛,加入糖同腐乳汁一齊拌勻,之後與紅辣椒一齊落鑊,加少少水
  
煮至汁滾。


- 將京蔥同肉片回鑊,兜炒數吓,將肉片煮熟透後就可以上碟。


 


Notes:京蔥最好煮腍啲,因為同洋蔥一樣,如果唔煮到軟身,甜味就唔能夠煮出,同埋如果唔煮熟的話,會有辛辣味道,食咗之後可能會因剌激胃部而引致胃痛。


 


2009年5月29日星期五

新買食譜3本

    自從發現圖書館原來有好多食譜可以借時,已經好少意欲買書,因為不但可以慳錢,仲可以慳番唔少擺書嘅位置,加上圖書館啲食譜都好新,有啲甚至係喺市面賣咗唔係好耐,所以完全無再諗買新食譜,唯一唔好處就係唔可以即時搵到自己想要recipes


    早排喺將軍澳JUSCO 展銷場度見到有食譜賣,仲全部一律 85折 o添!咁就梗係走埋去八卦吓啦。點知一睇,居然有齊哂 3本我一直都好想擁有嘅食譜,係有 discount 嘅情況下就更加心郁郁啦!不過同自己講,唔好亂洗錢,圖書館遲啲可能有得借,唔好咁衝動呀!於是就打消咗念頭,繼續去學生屋企嘅行程。


    咗一個禮拜後,又心思思走去睇吓,點知 ………噢!已經無咗個展銷 counter,擺咗另一樣喺度賣,跟住就同自己講:「可以死心啦,慳番一筆!」之後就再無去睇喇。


    事隔數星期,吉之島又做會員 9折優惠,雖然我唔係會員,但都想八卦吓,所以就走去$10店打個 round,點知仲伸請埋張 AEON 銀聯卡 o添,可以即時用張臨時卡9折買嘢。嘩,咁著數,如果又有番啲書買,咪即係有得折上折,今次真係好吸引噃,於是對腳又不由自主地行上樓上個展銷場度,可惜,都係冇得賣。


    直到上幾個星期,其實已經唔記得啲食譜,只不過距離下一個學生上堂仲有一段頗長時間,於是無無聊聊就又行過去吉之島 $10店同展銷場兜個圈打發時間。嗯,個賣書 counter 又出現番啦,仲繼續有85折 o添!今次唔理咁多喇,決定要買果 3本書,於是就拎起咗佢哋去收銀處度排隊俾錢。排到咁上下,突然留意到 cashier 度貼咗張 poster,係提醒顧客可以用 $20 coupon,當時即刻諗起,自己都有申請到 AEON 卡,如果成功批核的話,我都會收到 3張 $20 coupon 噃,於是理智又再一次同自己講:「唔好咁衝動,等吓 o添啦,可能會批呢!」就係咁,又再一次放番低哂啲書。


    等呀等、等呀等,卒之都俾我等到喎!居然真係批張卡俾我(其實好似我哋呢啲自僱人仕係好難伸請信用卡 o架,只係賺得幾千蚊個月嘅打工仔反而仲易申請,因為有清楚收入証明。可能我不嬲都好自覺地做好月結,有清楚嘅收入証明,所以批俾我啦,如果唔係我自己咁乖,之前銀行都唔會批我上會啦!) 仲咁死好命,吉之島前兩個禮拜又再做 9折優惠 (唔知點解呢輪吉之島成日做9折優惠呢,唔通金融海嘯真係好大影響?) 嘩,呢次不得了喇,我計過,原有85折,再加上9折優惠,再用埋張 $20 coupon,即係差唔多 7折咋!仲唔即刻買就真係對唔住自己啦!於是幾經 "波折",卒之都係買咗呢3本食譜喇 ( 唉,如果自己銀紙鬆動啲、收入穩定啲就唔駛咁多顧慮,睇啱就買,俾著係 Winnie 同 Louisa,佢哋真係啋你都傻,無理咁好氣,話買就買 )


    講咗咁耐,卒之輪到 3位主角出場啦:








    呢 3本食譜分別係 Rachel Yau 《為您做甜品》、獨角仙嘅當紅大熱《天然麵包香》,同埋我已經睇中咗好耐好耐,由萬里出嘅《Artisan Bread 麵包教室 》。3 本食譜都印刷非常精美,啲食譜仲好吸引人 o添!能夠吸引得到我呢個孤寒鬼肯出錢買,肯定有佢哋各自嘅魅力啦。


 





    呢本係《為您做甜品》,睇到啲相都好想即刻郁手整嚟食。之前都借過 Rachel 嘅《 幸福料理 DIY》同《精巧甜品DIY 3》返屋企睇,覺得都唔錯,由果陣開始就有留意佢啲書,加上近排成日都睇佢個 blog,仲間中同佢留言傾謁,請教佢整嘢食嘅心得,所以更加會買佢本書,支持吓佢嘛!


 





    至於仙姐呢本《天然麵包香》就除所教麵包好有特色之外,最重要係想學識做17小時中種麵糰,咁就唔駛吓都要 spare 成日時間出嚟整麵包,只要整好個中種麵糰,放喺雪櫃度發酵,到第二日,甚至隔日再有時間先拎番出嚟做形同烘焗,慳時間好多!


 








    至於呢本Artisan Bread 麵包教室 》,其實以我呢個初學阿茂係無可能整到嘅,只不過每次拎上手睇時,頁頁都係我鍾意嘅歐陸麵包,仲要啲相影到鬼死咁靚,勁吸引人,睇到流哂口水,買返嚟當攝影集睇都抵啦!唔好話我話呀,俾 Louisa 同Lily 睇到,肯定都話勁吸引啦!因為佢兩個都係鍾意食歐陸麵包 o架嘛!


    點呀 Louisa,呢 3本食譜有冇興趣睇呀?有就話俾我聽,等我拎過嚟俾妳慢慢 "品嘗" 啦!


合桃無花果莫加布朗尼 Walnuts & Fig Mocha Brownie

        呢次Brownies 完全係為Miss Cheng 而整,因為我同 Winnie咗佢星期一喺又一城見面食 lunch,就當係送俾佢嘅小禮物啦。

        為整呢個 Brownie,果晚我只係瞓得五個零鐘咋,因為星期日晚放工返到屋企,坐都無坐低休息過就即刻入廚房準備夜晚餐飯,一路煮嘢一路開機洗衫,食完飯、洗好碗後就去晾衫,之後就去沖涼,沖完涼出諗住郁手整餅,等第二朝唔駛咁趕趕切,點知睇吓個鐘,原來已經好夜,加上我又唔熟手,手腳好慢,根本唔夠時間當晚整起佢,所以咪淨係量好哂  所有材料份量,第二朝校定鐘 7:00am 起身梳洗完就即刻開工,早餐都係一路整、一路食咋!好彩之前都已經實習過一次,如果唔係可能需要更多時間呀!

        雖然好早就已經焗好出爐,但係因為要完全攤到凍哂先可以入袋 ( 如果唔係涼透入袋會有水氣,整腍件蛋糕 ),所以又阻啲時間,最終都係要遲到,真係唔好意思!Miss 問我點解唔預早整,其實我都好想咁做,不過早排成日落雨,濕度好高,我驚會整到Brownie 受潮變腍,咁到時 Winnie 同 Miss Cheng 就食唔到原本嘅味道同質感,到時就嘥咗我一番心機,所以唯有自己辛苦啲、瞓少啲囉!Miss 仲話我好講究呢!

        不過當見到件製成品做好時,心裡面係非常開心,呢種開心對於果啲未試過整嘢食嘅人嚟講,係完全唔會明白、唔會 feel 到,可能只會覺得你點解咁無聊,攞苦嚟辛!

        睇吓張相,個賣相都唔差啫,第一次整都算係咁啦,我自己覺得已經合格喇, 70 - 80 分啦!




2009年5月28日星期四

rice paper @ 又一城

        嘩,我同 Winnie 約 Miss Cheng 食飯真係約得好辛苦,約咗好耐都未約到,卒之今個禮拜一成事啦!今次係 09 年嘅第一次見面咋!Miss,乜妳咁難約 o架,咁多演出、咁多 talk 講

        我哋先約好喺九龍塘落腳,因為要就 Miss 之後過對面城大上堂,咁 Winnie 就早到少少睇吓有邊間食肆啱,順便 window shopping 嘛!最後就揀咗去 rice paper 食越南嘢,因為一來少人,二來我 3 個都未試過呢間食肆,咪試吓囉! 





        環境都 OK o架,Miss 仲指定要揀開揚窗口景位置 o添!( 咁似買樓揀單位 !?)



        嗱,睇吓  Winnie 幾醒目,揀咗呢個勁大落地玻璃嘅開揚窗口位置,實地現場仲清楚睇到哂「畢架山一號」全貌 o添,Miss 實滿意啦!


        你哋有冇發覺,點解 Miss 個樣冇打到格仔呢?因為我同佢講,佢係公眾人物,個樣一早都 "揚" 哂啦,應該唔介意將張相放上我個 blog 度,佢話唔介意,不過要放張靚啲 o架喎!我覺得呢張曝光過度,Miss 個樣唔係咁靚,所以再 post 多張下面嘅相。


 



        呢張相係咪影得 Miss啲呢?不過就唔夠光,同埋 Winnie 做乜 "吼" 人哋 "咪" 埋咗眼先影 o架,激死人呀!!


 



        我哋 order 嘅食物陸續上枱喇。首先係我同 Miss 杯熱青檸薑蜜。


 



        呢杯係 Winnie 嘅凍青檸梳打 (好似係啩,唔記得喇 )


 



        佢兩個要即刻碰杯影相。


 



        越南牛肉湯河,河粉都幾滑,牛肉哩,我當然唔知咩味啦!


 



        呢個係乜乜炒飯,老人癡呆嘅我又發作喇!等 Winnie 遲post 番個名啦!我覺得呢個炒飯無乜特別,但就唔覺得好似佢兩個講到咁唔好食,所以我都話我唔識食 o架啦!到最後當然由我呢個唔鍾意嘅人包底清埋佢啦!


        寫到呢度,先發覺漏咗唔記得同碟炒金邊粉影相 o添!難得佢兩個都讚好食。可能因為咁我哋就好快手食哂,無影到相。


   



        呢個素菜米卷小食都 OK,好清新。


 



        不過呢個柚子沙律就強差人意喇!味道麻麻,買相又唔靚,連搣碎佢都懶,連 Miss 都話 $20 好唔值,我自己整日式豆腐柚子沙律仲靚過佢、好食過佢啦!


 



        食完嘢之後,我哋坐多一陣,繼續傾謁,傾傾吓,有個 waitress 行埋嚟擺低盒嘢,個盒都好靚 o架,你哋估唔估到裡面裝住啲咩呢?




















        其實係牙簽嚟 o架咋!


       


        我覺得今次餐飯無乜驚喜,同集團其下嘅美心 MX 唔相差太遠,可能係因為我order lunch set 比較 cheap o架!


        雖然每次同 Miss "犯罪" ( 唔係,係 "飯聚" 啫! ) 嘅時間都好短,因為佢真係好忙,成日都要趕下場,但係都好開心 o架,所以 Miss 已經約定我哋暑假再聚,仲話會上佢屋企整嘢食 o添! ( 嗯,好似又話去佢屋企樓下 Element 果度啲高級食肆食喎。) Anyway,下次記得要同 Winnie 爭贏俾錢埋單呀,今次我哋就第一次失敗咗喇



P.S.  我留意到 Miss 同我哋講一樣嘢時,佢係特別開心,睇得出係由心笑出嚟,之唔係佢之前喺北京國家大劇院演奏 Beethoven Piano Concerto No.4 囉!佢真係好開心 o架,成副 proud of peforming in the National Centre for Performing Arts 咁嘅樣。我呢世都無可能做到 o架啦,但係我都好戥 Miss 開心呀!


蒸蛋糕

        自從有咗焗爐之後就好少蒸蛋糕,所以今次就返僕歸真,整番次蒸蛋糕先。不過今次其實係有目的嘅,係專登整嚟帶去探媽咪嘅,而且亦都係一個實驗嚟 o架,點解咁講呢?因為我係用西式海綿蛋糕嘅整法,唔入爐焗而用水蒸,睇吓得唔得囉。





        個樣都 OK,都發得幾靚呀,仲同西式海綿蛋糕一樣咁軟熟 o添!不過食落口就比較嚡,唔知點解呢?用水蒸應該仲濕潤先啱 o架! 可能真係要跟番我喺圖書館借番嚟果本《黑糖糕蒸蛋糕》個食譜嚟整先得喇!


 



        呢個 muffin 模係 Louisa 借俾我用嘅,因為佢話睇過我個 blog 知道我會成日整 muffin,而佢又少整,所以暫時擺住喺我度俾我用。今次用佢嚟蒸蛋糕真係方便好多,之前我係要將啲軟錫紙逐個放入個硬錫紙撻模度焗或蒸,麻煩好多呀!


        我同 Louisa 依家會各自買唔同嘅蛋糕模交換嚟用,咁就可以慳番啲錢同存放位置啦,一舉兩得,幾好!


獅峰龍井



        一睇到呢啲高檔茶葉,就知道唔係我買 o架啦,當然又係好學生兼好友 Louisa 送 o架啦!淨係睇個包裝盒已經夠勁喇,用咗皇帝嘅 "龍" 圖案同代表皇帝嘅 "黃色",夠氣派未?


        真係唔好講笑,Louisa 話一套兩盒嘅禮盒裝已經要千幾蚊 o架啦!係個客送俾佢嘅,其實往年都有送俾佢,不過佢話當時唔識貨,擺埋一邊無理佢,嘥料!因為佢個客話俾佢聽,一年裡面只得一造,而且產量唔多,好矜貴。所以 Louisa 提我:「呢啲唔係普洱呀,唔係越舊越好 o架,所以唔好擺埋唔飲!」


        所以我今日就專登開嚟試吓。



        靚嘢即係靚嘢,一剪開個錫紙包裝袋,果陣龍井清香味即刻撲鼻而來,就連啲茶葉嘅顏色都好靚、好青綠,唔似平時啲茶葉咁 "黑掹"。


 



        沖埋水就更加唔得掂囉,香到 "欲仙欲死",飲落口好甘甜、好清香,你睇,浸泡過嘅茶葉好靚,成個形態出番哂嚟,名符其實水滾茶靚,簡直係視覺、嗅覺同味覺嘅享受!


        沖到淡哂唔再沖水時,本來諗住將啲茶葉倒咗去,但係見到佢咁嫩綠,仲好吸引,放是就試吓食茶葉。點知原來好好食 o架,非常之嫩滑,好食過好多菜呀!最衰我唔識整龍井蝦仁啦,如果唔係用佢嚟炒河蝦肯定正到暈!


 



        咁靚嘅茶,梗係第一時間沖番杯孝敬媽咪啦!我之所以專登揀今日先開封呢盒靚茶,係因為今日對我嚟講係一個好特別嘅日子,當然唔係端午節咁簡單啦,而係喺兩年前嘅今日 ( 我指嘅係農曆 ),同樣都係端午節,就喺呢一日,媽咪就離開咗我,我到依家都仲好記得當時嘅情況,好傷心、好心痛,但係我唔可以喺佢面前喊,因為咁樣就會令到佢之前辛苦極都唔入醫院嘅日子白捱,我好記得,當我睇住佢走嘅情況,係我呢世仔有史以來遇到最震撼嘅事,我諗我依世都唔會忘記果日嘅情景,但我當時仲好清醒,當眼淚一出時我即刻離開佢身邊,衝入廚房度狂喊,喊完喊夠之後仲要即刻通知阿馳同其他親友,到心情平伏番之後再入番房陪佢,繼續做嚟緊果 12 個鐘頭內要做嘅事。


        夠了,我唔想再多提,其實我依家個腦已經不斷湧現番當日情景,好難受,眼淚都已經流緊出嚟 ……


 



P.S.  咁啱我早前喺報紙度睇到有篇關於獅峰龍井嘅文章,順便 upload 埋上嚟俾大家睇吓。其實我已經用 Photoshop 將佢放大過好多次,但唔知點解一 upload 到個 blog 就得番咁細張,希望大家唔好介意,將就吓啦!


2009年5月24日星期日

黑椒檸蜜雞脾仔


        前幾日去超市買嘢時,見到有雞翼脾賣,不過就賣得好有 gimmick,$9.9一盒任揀任裝,總之裝滿一盒後要以冚得到盒蓋為準。其實我都唔知咁樣買係抵唔抵,不過貪得意玩吓,睇吓自己可以塞到幾多隻入個盒度!

        我問個阿姐,一盒有幾多隻度,佢話都有 6、7隻 o架,於是我就朝住呢個目標係咁揀、係咁塞、係咁揀、係咁塞,但最終都只係裝到 5隻咋,可能我專揀哂啲又肥又大嘅翼脾啦,所以裝少兩隻。




        係咪隻隻都好肥美呢!


        買完我一路行返屋企,一路諗點樣整啲翼脾,突然諗起上次整完個柚子檸檬蛋糕後,仲有大半個檸檬放喺雪櫃都好耐喇,於是就決定用佢嚟整翼脾喇。


 


材料:
雞翼脾
罐頭菠蘿
檸檬
百里香 (Thyme)


醃料:
檸檬汁
蜜糖
老抽
紹酒


黑椒粉


- 洗乾淨翼脾、瀝乾水後,用抹手紙索乾水份,然後用叉喺比較厚肉嘅地方拮幾
 
吓,方便醃入味


- 菠蘿切幼粒;檸檬切薄片,備用。



- 將所有醃料拌勻後,放入翼脾醃好,最後灑上黑椒粉。


 



- 醃好後,將翼脾夾出,放上錫紙上面,灑上百里香,然後將錫紙包好,連焗盤放
 
入已預熱 180°C 嘅焗爐內焗 20分鐘至熟。


- 將剩低嘅醃料同焗出嘅雞汁倒入鑊內煮番滾,煮滾後試一試味,酌量加鹽、糖
  調味,之後加埋檸檬同菠蘿落去,煮到個汁濃稠就可以熄火。


- 翼脾上碟後,淋上煮好醬汁就攪掂。


        酸酸甜甜,好好味呀,仲有好濃蜜糖味 o添!最驚喜嘅就係啲雞肉唔似平時咁乾、咁( 雞全翼中,翼脾往往都係最),仲好滑、好嫩,可能因為用錫紙包住嚟焗,將雞肉內嘅水份全部保留住,所以唔會焗到好嚡。


        唔係賣花讚花香,真係好正 o架,哋都試吓整啦!


 


Notes:


1. 因為翼脾部份比較厚肉,所以最好醃過夜,我呢幾隻仲醃咗成 3日 o添!所以好
    入味。


2. 煮汁時要用慢火煮到收汁,唔可以太大火,因為有蜜糖喺裡面,好容易會變
    焦糖,所以要留心顏色一轉金黃就即刻熄火。


2009年5月23日星期六

簡易咕嚕豆腐

        前幾日煮咖喱吞拿魚意粉時用剩啲菠蘿,今日就用佢嚟煮咕嚕豆腐。



材料:
實豆腐
番茄
罐頭菠蘿


調味料:
茄汁
白醋


粟粉


- 番茄洗淨、去蒂,然後切件。


- 菠蘿瀝乾糖水、切丁備用。

- 豆腐沖一沖洗,之後灑上少少鹽,再用抹手紙將整嚿豆腐包住,然後用重物壓
  豆腐上面,迫出多餘水份。



- 之後將豆腐切件,薄薄咁撲上粟粉,放入已燒熱油鑊內,用中慢火煎香兩面,盛
  起備用。


- 加調味料同水落鑊,煮成咕嚕汁。


- 煮滾汁後,加埋菠蘿同番茄落鑊一齊煮,唔駛煮太耐,煮熱就 OK,否則番茄易
  煮爛。


- 最後用粟粉水埋薄芡,然後將咕嚕汁同菠蘿、番茄一齊淋喺豆腐面,食得!




P.S. 最衰上次唔記得留番起啲菠蘿糖水,如果唔係用佢嚟埋芡仲好味!


2009年5月20日星期三

法式焦糖燉蛋 Crème brûlée

        好耐都無試過大昏迷喇!因為噚日dayoff,知道唔駛出去教琴,屋企又無乜特別嘢要做,所以好放心咁盡情去瞓,前一晚因為喺 Louisa 屋企食完飯之後,除咗食生日蛋糕之外,仲有幫 Louisa 整香蕉蛋糕,所以好夜先走,返到屋企沖完涼,睇一陣書,點 零兩 點先瞓,第二朝12 點半先起身,所以噚日好夠精神。


        夜晚就好求其咁煮咗個咖喱菠蘿吞拿魚意粉食 ( 間中偷吓懶先 ),食完哂洗埋碗都仲好早,所以就郁手整甜品食,呢個Crème brûlée 都想整好耐 o架喇,不過一直都無買到淡忌廉,所以一路都無整,直到最近荃灣間二德惠買嘢有雙倍積分,加上 200ml 嘅淡忌廉又做緊特價,$45 / 3 (依家 $44 / 3 o添咋 )所以就起心買,咁依家咪整到 Crème brûlée 囉!



        材料同做法都好簡單。


材料:
蛋黃        2隻
淡忌廉    125克
豆漿        125克
砂糖        20克


以上材料可做 2 - 3杯燉蛋


- 先用 180°C預熱焗爐。

- 蛋黃同淡忌廉用蛋拂拌勻,然後加入少量豆漿再拌勻。


- 將剩低嘅豆漿煲滾,加入砂糖煮溶。


- 將熱豆漿逐少逐少拌入忌廉蛋液裡,之後再倒回煲內加熱。


- 加熱後嘅忌廉蛋液過篩倒入疏乎厘盅內,然後放上焗盤上,再倒凍水入焗盤內,
  水嘅高度約半 cm1cm


- 放入焗爐,焗 25分鐘後取出放涼,之後放入雪櫃雪10分鐘。


- 喺雪凍咗嘅燉蛋面灑上少少砂糖 (份量以外),用火槍將砂糖燒焦,做成焦糖,咁
  就食得啦!


食譜參考:香港電台美食DIY 網頁 (仲有導師整個製作過程嘅 video睇 o添呀!)


 



        啱啱出爐時果樣,可能因為個焗爐太勁,未做焦糖都已經焦咗少少。


 



        本來星期一果日係想問 Louisa 借定支火槍嚟燒焦糖,不過一來佢無 gas;二來我其實又驚驚哋用火槍,因為見到個火噴得咁猛,覺得好恐怖、好危險;三來佢又話俾我聽可以用焗爐焗啲砂糖,所以我就試吓入焗爐,淨用脆烤功能果三枝石英管嚟焗脆個表面,睇吓得唔得,但其實係唔得囉!焗咗好耐都只係得少少燶,而且我隔住爐門望入去時,見到啲燉蛋猛咁喺度郁,滾吓滾吓咁,好驚會焗過龍,焗到啲燉蛋老哂兼嚡口,最後都係放棄罷!所以喺燉蛋面會見到啲白色未溶嘅砂糖結晶。


 

Notes

1. 原食譜係用牛奶而唔係豆漿只係因為小弟唔飲奶


2. 將煲滾豆漿 /牛奶倒入忌廉蛋液時,一定要慢慢逐少逐少拌入,如果唔係啲蛋
    液就會被煮熟。


3. 忌廉蛋液心須過篩倒入疏乎厘盅內,因為可以隔咗啲被煮熟咗嘅蛋液固體,令
    到啲燉蛋更幼滑。


4. 焗好出爐嘅燉蛋一定完全攤凍或雪涼,否則當灑上砂糖製作焦糖時,熱力會將
    砂糖溶化入燉蛋內,咁就最唔成焦糖喇。


 

P.S. 


1. Louisa 話枝火槍無 gas時,我就問佢係用咩 gas,佢話用打邊爐果gas
    咁就再問佢,咁打邊爐gas喺邊度買得到,佢竟然同我講:「打邊爐gas
    
喺 賣打邊爐gas嘅地方買囉!」跟住我哋兩條友就喺度勁笑,真係俾佢吹
   
漲!


2. 用上次買返嚟嘅腐皮碎整豆漿真係好方便,十零廿分鐘啲腐皮已經煲溶哂,做
    成好濃嘅豆漿,我將食譜用剩嘅豆漿俾咗老豆飲,佢話好濃好甘香喎!