橙香經典朱古力蛋糕 Gâteau classique au chocolat & orange

        今日係 Arthur 嘅生日，喺度同佢講聲 Happy birthday!! ，其實前日都已經同佢講咗一次 Happy birthday o架喇，仲親手整咗個生日蛋糕俾佢 o添！

        其實自從媽咪離開咗之後，我就決定唔再提生日呢樣嘢，唔會慶祝生日 ( 雖則我不嬲都唔興呢樣嘢 )，唔會再同人慶祝生日，even「生日快樂」都唔會講，呢點我身邊所有較熟嘅朋友都知道，點解？自己慢慢參透個中玄機吧！

        但今次就好破例，不但 say「Happy Birthday」，仲整埋生日蛋糕 o添，又問點解？原因好簡單，完全係因為 Louisa嘅面子囉！有睇開我個blog嘅朋友都知道，Louisa份人有幾好，大家都好清楚，雖然我哋都只係識咗好短時間，但係佢對我都一樣好好，所以我都好開心、都會對佢好好、好尊重佢。咁今次其實又唔係完全因為佢嘅，Arthur 同 Genevive 係近排我識咁多 “細路仔” 之中，算係好乖、好聽話、好有禮貌、好有家教嘅小朋友，所以我都好鍾意佢哋、好錫佢哋。加上Arthur 自從知道已經報咗 2級考試後，近排都勤力咗練琴，無之前咁懶，啲考試歌都彈得唔差，我好開心 o架，所以咪專登做個生日蛋糕氹吓佢開心囉！

        Arthur 係一個勁鍾意食朱古力嘅小朋友，加上佢又唔鍾意食果仁，所以我搵咗 recipe 好耐，最後決定整呢個簡單又好味嘅經典朱古力蛋糕，貪佢朱古力味夠濃又無 nuts 呀。

材料：
苦甜朱古力     60克
牛油                 40克
蛋黃                 40克 (約兩個蛋黃)
蛋白                 80克(約兩個半蛋白)
砂糖                 80克
中筋麵粉         8克
粟粉                 2克
可可粉             30克
淡忌廉             30克
糖漬橙皮粒     2湯匙
糖霜                 適量

 

- 先用180°C將焗爐預熱。

- 牛油同朱古力放入微波爐內，以每次 "叮" 15秒嚟溶解牛油同朱古力，之後拌  勻，並

  重覆步驟直至所有牛油同朱古力完全溶化為止。

- 忌廉喺雪櫃拎出嚟之後，需放入微波爐加熱至人體體溫，大約 "叮" 30秒。

- 蛋黃加入40克糖，坐熱水打至發白。

- 將朱古力牛油溶液同忌廉加入打發好嘅蛋糊度拌勻，之後再篩入麵粉、可可粉同橙皮

  粒拌勻。

- 另外準備蛋白霜，先將蛋白打至起泡，然後分 3次加入糖繼續打發，直至蛋白打至企

  身為至。

- 打至企身嘅蛋白分3次加入麵糊中，必須輕手拌勻，否則蛋白就會好易消泡。

- 將麵糊放入焗爐焗 25-30分鐘。

- 出爐後脫模，蛋糕冷卻後若中間部份下陷屬正常現象。

- 最後灑上糖霜就完成。

 

以上材料份量可做一個 7吋蛋糕。

食譜參考自Vanlily 嘅 Banana Classic Chocolate Gateau

        啱啱焗完出爐時個蛋糕仲係漲卜卜，到攤凍咗之後就慢慢凹落去，睇吓個細嘅 "剩餘物資" 就知道。我老豆食咗個 "剩餘物資" 之後，猛咁話好滑、好好食。原本啲橙皮粒係撈得好均勻 o架，到切開之後一睇，發覺同其他網友所講一樣，全部沉哂落底，因為成個蛋糕大部份都係充滿空氣嘅蛋白，麵粉所佔嘅比例非常之少，所以唔夠承托力！真係好佩服 Vanlily，佢整果個蛋糕啲香蕉完全喺面見得到，無沉到落底。

        壽星仔一家梗要影番張全家福大合照留念啦！依，
原來我唔記得咗同壽星仔影番張相㖭！

         

        Louisa話雖然 Arthur 表面上無乜嘢咁，但其實睇得出佢心裡面係好開心，真係知子莫若母！Arthur 食完之後就 "Lem Lem 脷"，走埋嚟話要食多少少，Louisa 就大讚好味，一邊整緊個香蕉蛋糕，一邊話遲啲都試吓整，就連工人 Jovi 都話好食，Louisa 話等我俾咗個  recipe 佢之後就叫 Jovi 整，跟住佢就可以星期日拎埋去同朋友一齊分享 ( 唔知 Jovi 係咪會拎去皇后像廣場度呢 )。

        我走嘅時候，Jovi 同我 say bye & thank you for my cake，我同佢講：「Next time you make a big one and let me try it!」Jovi 就勁笑住咁話：「 OK，OK！」

        鍾意整嘢食嘅人，最開心就梗係成功整到一啲自己鍾意食嘅嘢出嚟慢慢品嘗，但係見到人哋食自己整嘅嘢覺得好好食、食得好開心時，自己就更加開心！

Notes:

- 我用嘅苦甜朱古力係 55%。

- 若有低筋麵粉的話，可直接用10克低筋麵粉而唔駛加 2克粟粉。

- 喺溶解牛油同朱古力時千祈唔好心急，一定要逐次 10秒慢慢將佢攪拌溶化，因
  為朱古力好易燶，而用微波爐加熱油脂係好易會 "爆"，我試過一次用微波爐溶
  牛油時，臨開爐開前突然聽到 "卜" 一聲巨響， 原本啲牛油喺爐內爆到七彩，成
  個爐都爆到係哂油，攪到我要抹餐死！

- 由於呢個朱古力蛋糕嘅口感係應該比較濕潤，唔係焗到完全乾身，所以當用牙
  籤插入蛋糕後，如果仲有少少蛋糕麵糊黐住的話，其實就已經 OK 喇！

- Gâteau classique au chocolat & orange (Fr.) = Orange Classic Chocolate Cake