香蕉蛋糕 Banana Bread

       Louisa 呢幾日去咗日本玩，所以今日唔駛去教佢，改咗禮拜五，難得今日比較得閒，就郁手整香蕉蛋糕。

        其實之前喺 Louisa 屋企食過呢個香蕉蛋糕，係佢妹妹整俾佢食嘅，咁我一食就已經覺得好正，因為完全係我一直想要做到果種 feel，係果種好似 muffin 咁鬆散嘅 texture，於是我就問 Louisa 攞個食譜，原來佢妹妹就係跟網友為食貓個食譜整嘅。Louisa 自己都己經整咗 5 次，佢都話成功，好好食，於是我先有信心去整，事關我之前無論整嚫咩蛋糕都比較實，所以都有少少驚，怕成日都浪費材料。
 
 

材料：
牛油         125 克
中筋粉      200 克
泡打粉      2 茶匙
梳打粉      1/4 茶匙
鹽             1/4 茶匙
雞蛋          2 隻
黃糖         125 克
香蕉          2 隻 
糖霜          適量
 
- 牛油室溫放至軟身；麵粉、梳打粉、泡打粉同鹽過篩 3 次；雞蛋拂打成蛋液。

- 牛油與黃糖一齊攪拌，之後拌入粉類混合物，做成麵糊。
 
- 香蕉去皮後用叉壓爛成香蕉茸，與蛋液一齊加入拌勻。
 
- 就將麵糊倒入焗盤，放入已預熱至 170°C 嘅焗爐內，焗約 40 分鐘至熟。
 
- 出爐後立即脫模，攤凍後灑上糖霜即成。
 
食譜嚟自為食貓嘅香蕉蛋糕。

我比較鍾意垂直裂紋多過依家咁樣嘅 S 形裂紋。

 
 




 

跟為食貓咁灑啲糖霜先！當堂唔同哂 feel，似嚿麵包

多過似嚿蛋糕。不過因為今次係我第一次灑糖霜，

所以唔係好識掌握個手勢，整得好樣衰！

 

 

 

 

 

 

        睇幅相都睇到好鬆嘅質感啦！不過始終都做唔到果種粗嚡口感，個人認為都仲係有啲滑溜感。唔知關唔關事我係用中筋粉溝泡打粉而唔係用自發粉呢？點解我會咁諗，因為喺我整人生第一個蛋糕時 (果陣時未有焗爐，蛋糕只係蒸嘅 )，我請教過伯娘，問佢係唔係用自發粉方便啲，佢就叫我唔好用自發粉，因為整完個蛋糕會比較嚡，而為食貓個原食譜都係用自發粉，但我屋企無買到自發粉，所以就咁用中筋粉溝泡打粉。下次再整時試吓用番自發粉，睇吓會唔會做到粗嚡口感。





Note：
- 我參考過好多資料，如果用中筋粉同泡打粉代替自發粉，個份量比例為：中筋粉 100
  克：泡打粉 1 茶匙：鹽1/4 茶匙

- 我今次係用電動打蛋器嚟完成所有攪拌工作，因為我睇過有啲網友話用電動打蛋器嚟
  攪拌會鬆軟啲，用手攪拌就無咁鬆，會比較實，而且我睇過香港電台個「美味 DIY」
  網頁裡面教整鬆餅嘅 video，個導師都係用電動打蛋器嚟攪，可能咁樣就可以快啲
  攪得均勻，因為整鬆餅係唔可以攪得太耐，一見到啲材料完全混合好就要停手。