獅峰龍井

        一睇到呢啲高檔茶葉，就知道唔係我買 o架啦，當然又係好學生兼好友 Louisa 送 o架啦！淨係睇個包裝盒已經夠勁喇，用咗皇帝嘅 "龍" 圖案同代表皇帝嘅 "黃色"，夠氣派未？

        真係唔好講笑，Louisa 話一套兩盒嘅禮盒裝已經要千幾蚊 o架啦！係個客送俾佢嘅，其實往年都有送俾佢，不過佢話當時唔識貨，擺埋一邊無理佢，嘥料！因為佢個客話俾佢聽，一年裡面只得一造，而且產量唔多，好矜貴。所以 Louisa 提我：「呢啲唔係普洱呀，唔係越舊越好 o架，所以唔好擺埋唔飲！」

        所以我今日就專登開嚟試吓。

        靚嘢即係靚嘢，一剪開個錫紙包裝袋，果陣龍井嘅清香味即刻撲鼻而來，就連啲茶葉嘅顏色都好靚、好青綠，唔似平時啲茶葉咁 "黑掹掹"。

 

        沖埋水就更加唔得掂囉，香到 "欲仙欲死"，飲落口好甘甜、好清香，你睇，浸泡過嘅茶葉好靚，成個形態出番哂嚟，名符其實水滾茶靚，簡直係視覺、嗅覺同味覺嘅享受！

        沖到淡哂唔再沖水時，本來諗住將啲茶葉倒咗去，但係見到佢咁嫩綠，仲好吸引，放是就試吓食茶葉。點知原來好好食 o架，非常之嫩滑，好食過好多菜呀！最衰我唔識整龍井蝦仁啦，如果唔係用佢嚟炒河蝦肯定正到暈！

 

        咁靚嘅茶，梗係第一時間沖番杯孝敬媽咪啦！我之所以專登揀今日先開封呢盒靚茶，係因為今日對我嚟講係一個好特別嘅日子，當然唔係端午節咁簡單啦，而係喺兩年前嘅今日 ( 我指嘅係農曆 )，同樣都係端午節，就喺呢一日，媽咪就離開咗我，我到依家都仲好記得當時嘅情況，好傷心、好心痛，但係我唔可以喺佢面前喊，因為咁樣就會令到佢之前辛苦極都唔入醫院嘅日子白捱，我好記得，當我睇住佢走嘅情況，係我呢世仔有史以來遇到最震撼嘅事，我諗我依世都唔會忘記果日嘅情景，但我當時仲好清醒，當眼淚一出時我即刻離開佢身邊，衝咗入廚房度狂喊，喊完喊夠之後仲要即刻通知阿馳同其他親友，到心情平伏番之後再入番房陪佢，繼續做嚟緊果 12 個鐘頭內要做嘅事。

        夠了，我唔想再多提，其實我依家個腦已經不斷湧現番當日情景，好難受，眼淚都已經流緊出嚟 ……

 

P.S.  咁啱我早前喺報紙度睇到有篇關於獅峰龍井嘅文章，順便 upload 埋上嚟俾大家睇吓。其實我已經用 Photoshop 將佢放大過好多次，但唔知點解一 upload 到個 blog 就得番咁細張，希望大家唔好介意，將就吓啦！