黑椒檸蜜雞脾仔

        前幾日去超市買嘢時，見到有雞翼脾賣，不過就賣得好有 gimmick，$9.9一盒任揀任裝，總之裝滿一盒後要以冚得到盒蓋為準。其實我都唔知咁樣買係抵唔抵，不過貪得意玩吓，睇吓自己可以塞到幾多隻入個盒度！

        我問個阿姐，一盒有幾多隻度，佢話都有 6、7隻 o架，於是我就朝住呢個目標係咁揀、係咁塞、係咁揀、係咁塞，但最終都只係裝到 5隻咋，可能我專揀哂啲又肥又大嘅翼脾啦，所以裝少兩隻。

        係咪隻隻都好肥美呢！

        買完嘢我一路行返屋企，一路諗點樣整啲翼脾，突然諗起上次整完個柚子檸檬蛋糕後，仲有大半個檸檬放咗喺雪櫃都好耐喇，於是就決定用佢嚟整翼脾喇。

 

材料：
雞翼脾
罐頭菠蘿
檸檬
百里香 (Thyme)

醃料：
檸檬汁
蜜糖
老抽
紹酒
鹽
糖
黑椒粉

- 洗乾淨翼脾、瀝乾水後，用抹手紙索乾水份，然後用叉喺比較厚肉嘅地方拮幾
  吓，方便醃入味。

- 菠蘿切幼粒；檸檬切薄片，備用。

- 將所有醃料拌勻後，放入翼脾醃好，最後灑上黑椒粉。

 

- 醃好後，將翼脾夾出，放上錫紙上面，灑上百里香，然後將錫紙包好，連焗盤放
  入已預熱 180°C 嘅焗爐內焗 20分鐘至熟。

- 將剩低嘅醃料同焗出嚟嘅雞汁倒入鑊內煮番滾，煮滾後試一試味，酌量加鹽、糖
  調味，之後加埋檸檬同菠蘿落去，煮到個汁濃稠就可以熄火。

- 翼脾上碟後，淋上煮好嘅醬汁就攪掂。

        酸酸甜甜，好好味呀，仲有好濃嘅蜜糖味 o添！最驚喜嘅就係啲雞肉唔似平時咁乾、咁嚡 ( 雞全翼中，翼脾往往都係最嚡嘅 )，仲好滑、好嫩，可能因為用錫紙包住嚟焗，將雞肉內嘅水份全部保留住，所以唔會焗到好嚡。

        唔係賣花讚花香，真係好正 o架，你哋都試吓整啦！

 

Notes：

1. 因為翼脾部份比較厚肉，所以最好醃過夜，我呢幾隻仲醃咗成 3日 o添！所以好
    入味。

2. 煮汁時要用慢火煮到收汁，唔可以太大火，因為有蜜糖喺裡面，好容易會變咗
    焦糖，所以要留心顏色一轉金黃就即刻熄火。