樹記腐竹

        見好耐都無約伯伯同伯娘飲茶，所以就約咗佢哋星期二喺商場間茶樓飲茶，順便拎埋個柚子檸檬蛋糕上去俾佢哋試吓。出開去深水埗，就去埋樹記度買腐竹。

        每次去嚫樹記，我都一定會買鮮腐皮，因為好好食，又易煮易熟，有時煮麵果陣落一兩塊落去一齊煮，索咗啲湯汁就好好食，仲好嫩滑、好香豆味。

 

        呢包乾腐皮碎先至係我今次嘅主打。有次喺 Louisa 屋企食完飯，佢話突然間好想食腐竹糖水，就即刻去煲嚟食，我問佢：「吓，咁夜先煲？煲得切咩？」Louisa：「唓，好快咋嘛，個零鐘就得啦！」之後真係個零鐘就有得食，仲好濃、好滑 o添！於是就問佢用邊種腐竹整，可以整得咁快手、咁好食，原來就係用呢種腐皮碎。

        於是我就靈機一觸，諗到點用喇！因為我係唔飲奶，但整蛋糕西餅好多時都會用到牛奶，所以我會用豆漿代替。但每次整餅都只係用好少份量就夠，勞師動眾咁煮豆漿好似比較麻煩，所以我就諗到用佢嚟整豆漿，因為佢係頭頭尾尾嘅碎料，要整好少份量都得，用幾多先至整幾多，十分方便。

        我同 Louisa講，我買完之後喺條街度聽到有兩條 "佬" 喺度講：「都唔知點解咁多人買，日日都排哂長龍。」

跟住之後 Frankie 就問我：「咁你排咗幾多間舖？」

我：「吓，咩意思呀？」

Frankie：「我意思係條龍排咗幾長？我哋每次買果陣條龍都有幾間舖咁長 o架！」

我：「吓，咁誇張！我今日排第二咋嘛！」

Frankie：「咁你好彩啦！」

        嘩，乜原來真係咁誇張 o架！以前我同媽咪去買時不嬲都唔駛排隊 o架啦！

 

P.S. 因為唔係好清楚間舖頭個全名，所以諗住喺個網度睇吓 search 唔 search 到，點知意外咁俾我睇到幾張相：

1. 網友車厘厘影嘅相

2. 網友 post 喺 「Gain No Pain Photo Gallery」 嘅相

3. 網友 post 喺 「fotop.net」 嘅相

4. 網友閒人乙影嘅相

        張張都影到顧客排隊買嘢嘅相片，尤其係閒人乙影果張，條龍真係排幾間舖 o架！所以大家真係唔好睇少阿蘇 (蘇施黃) 嘅威力，經佢介紹過嘅店舖都攪到鬼死咁旺場，唔怪得之之前睇有線電視個「六十分鐘真人蘇」裡面嘅「踢竇」環節有咁多食肆自己寫信去邀請阿蘇去佢哋舖頭試菜，搏被阿蘇讚完之後就生意大賺。不過好攪笑，有啲老闆完全無自知之明，明知阿蘇把口咁寸仲夠膽叫佢去試菜，阿蘇食過之後當然大彈特彈啦，仲俾阿蘇寸：「你哋以為叫嚫我嚟試完菜之後間舖就一定好生意 o架喇，啲嘢難食到咁都夠膽叫我嚟食，"盞" 俾我彈啫！」有啲老闆就唯有死撐兼駁嘴，跟住就俾阿蘇鬧多幾錢重，勁攪笑！！