新買食譜3本

    自從發現圖書館原來有好多食譜可以借時，已經好少意欲買書，因為不但可以慳錢，仲可以慳番唔少擺書嘅位置，加上圖書館啲食譜都好新，有啲甚至係喺市面賣咗唔係好耐，所以完全無再諗買新食譜，唯一唔好處就係唔可以即時搵到自己想要嘅 recipes。

    早排喺將軍澳嘅 JUSCO 展銷場度見到有食譜賣，仲全部一律 85折 o添！咁就梗係走埋去八卦吓啦。點知一睇，居然有齊哂 3本我一直都好想擁有嘅食譜，係有 discount 嘅情況下就更加心郁郁啦！不過同自己講，唔好亂洗錢，圖書館遲啲可能有得借，唔好咁衝動呀！於是就打消咗念頭，繼續去學生屋企嘅行程。

    隔咗一個禮拜後，又心思思走去睇吓，點知 ………噢！已經無咗個展銷 counter，擺咗另一樣喺度賣，跟住就同自己講：「可以死心啦，慳番一筆！」之後就再無去睇喇。

    事隔數星期，吉之島又做會員 9折優惠，雖然我唔係會員，但都想八卦吓，所以就走去$10店打個 round，點知仲伸請埋張 AEON 銀聯卡 o添，可以即時用張臨時卡9折買嘢。嘩，咁著數，如果又有番啲書買，咪即係有得折上折，今次真係好吸引噃，於是對腳又不由自主地行上樓上個展銷場度，可惜，都係冇得賣。

    直到上幾個星期，其實已經唔記得咗啲食譜，只不過距離下一個學生上堂仲有一段頗長時間，於是無無聊聊就又行過去吉之島 $10店同展銷場兜個圈打發時間。嗯，個賣書 counter 又出現番啦，仲繼續有85折 o添！今次唔理咁多喇，決定要買果 3本書，於是就拎起咗佢哋去收銀處度排隊俾錢。排到咁上下，突然留意到 cashier 度貼咗張 poster，係提醒顧客可以用 $20 coupon，當時即刻諗起，自己都有申請到 AEON 卡，如果成功批核的話，我都會收到 3張 $20 coupon 噃，於是理智又再一次同自己講：「唔好咁衝動，等吓 o添啦，可能會批呢！」就係咁，又再一次放番低哂啲書。

    等呀等、等呀等，卒之都俾我等到喎！居然真係批張卡俾我噃！ (其實好似我哋呢啲自僱人仕係好難伸請信用卡 o架，只係賺得幾千蚊個月嘅打工仔反而仲易申請，因為有清楚嘅收入証明。可能我不嬲都好自覺地做好月結，有清楚嘅收入証明，所以批俾我啦，如果唔係我自己咁乖，之前銀行都唔會批我上會啦！) 仲咁死好命，吉之島前兩個禮拜又再做 9折優惠 (唔知點解呢輪吉之島成日做9折優惠呢，唔通金融海嘯真係好大影響？) 嘩，呢次不得了喇，我計過，原有嘅 85折，再加上9折優惠，再用埋張 $20 coupon，即係差唔多 7折咋！仲唔即刻買就真係對唔住自己啦！於是幾經 "波折"，卒之都係買咗呢3本食譜喇 ( 唉，如果自己銀紙鬆動啲、收入穩定啲就唔駛咁多顧慮，睇啱就買，俾著係 Winnie 同 Louisa，佢哋真係啋你都傻，無理咁好氣，話買就買 )。

    講咗咁耐，卒之輪到 3位主角出場啦：

    呢 3本食譜分別係 Rachel Yau 嘅《為您做甜品》、獨角仙嘅當紅大熱《天然麵包香》，同埋我已經睇中咗好耐好耐，由萬里出嘅《Artisan Bread 麵包教室 》。3 本食譜都印刷非常精美，啲食譜仲好吸引人 o添！能夠吸引得到我呢個孤寒鬼肯出錢買，肯定有佢哋各自嘅魅力啦。

 

    呢本係《為您做甜品》，睇到啲相都好想即刻郁手整嚟食。之前都借過 Rachel 嘅《 幸福料理 DIY》同《精巧甜品DIY 3》返屋企睇，覺得都唔錯，由果陣開始就有留意佢啲書，加上近排成日都睇佢個 blog，仲間中同佢留言傾謁，請教佢整嘢食嘅心得，所以更加會買佢本書，支持吓佢嘛！

 

    至於仙姐呢本《天然麵包香》就除咗所教嘅麵包好有特色之外，最重要係想學識做17小時中種麵糰，咁就唔駛吓吓都要 spare 成日時間出嚟整麵包，只要整好個中種麵糰，放喺雪櫃度發酵，到第二日，甚至隔日再有時間先拎番出嚟做形同烘焗，慳時間好多！

 

    至於呢本《Artisan Bread 麵包教室 》，其實以我呢個初學阿茂係無可能整到嘅，只不過每次拎上手睇時，頁頁都係我鍾意嘅歐陸麵包，仲要啲相影到鬼死咁靚，勁吸引人，睇到流哂口水，買返嚟當攝影集睇都抵啦！唔好話我話呀，俾 Louisa 同Lily 睇到，肯定都話勁吸引啦！因為佢兩個都係鍾意食歐陸麵包 o架嘛！

    點呀 Louisa，呢 3本食譜有冇興趣睇呀？有就話俾我聽，等我拎過嚟俾妳慢慢 "品嘗" 啦！