rice paper @ 又一城

        嘩，我同 Winnie 約 Miss Cheng 食飯真係約得好辛苦，約咗好耐都未約到，卒之今個禮拜一成事啦！今次係 09 年嘅第一次見面咋！Miss，乜妳咁難約 o架，咁多演出、咁多 talk 講嘅？

        我哋先約好喺九龍塘落腳，因為要就 Miss 之後過對面城大上堂，咁 Winnie 就早到少少睇吓有邊間食肆啱，順便 window shopping 嘛！最後就揀咗去 rice paper 度食越南嘢，因為一來少人，二來我哋 3 個都未試過呢間食肆，咪試吓囉！ 

        環境都 OK o架，Miss 仲指定要揀開揚窗口景位置 o添！( 咁似買樓揀單位嘅 ！？)

        嗱，睇吓  Winnie 幾醒目，揀咗呢個勁大落地玻璃嘅開揚窗口位置，實地現場仲清楚睇到哂「畢架山一號」全貌 o添，Miss 實滿意啦！

        你哋有冇發覺，點解 Miss 個樣冇打到格仔呢？因為我同佢講，佢係公眾人物，個樣一早都 "揚" 哂啦，應該唔介意將張相放上我個 blog 度，佢話唔介意，不過要放張靚啲 o架喎！我覺得呢張曝光過度，Miss 個樣唔係咁靚，所以再 post 多張下面嘅相。

 

        呢張相係咪影得 Miss 靚啲呢？不過就唔夠光，同埋 Winnie 做乜 "吼" 人哋 "咪" 埋咗眼先影 o架，激死人呀！！

 

        我哋 order 嘅食物陸續上枱喇。首先係我同 Miss 杯熱青檸薑蜜。

 

        呢杯係 Winnie 嘅凍青檸梳打 (好似係啩，唔記得喇 )。

 

        佢兩個要即刻碰杯影相。

 

        越南牛肉湯河，河粉都幾滑，牛肉哩，我當然唔知咩味啦！

 

        呢個係乜乜炒飯，老人癡呆嘅我又發作喇！等 Winnie 遲啲 post 番個名啦！我覺得呢個炒飯無乜特別，但就唔覺得好似佢兩個講到咁唔好食，所以我都話我唔識食 o架啦！到最後當然由我呢個唔鍾意嘥嘢嘅人包底清埋佢啦！

        寫到呢度，先發覺漏咗唔記得同碟炒金邊粉影相 o添！難得佢兩個都讚好食。可能因為咁我哋就好快手食哂，無影到相。

   

        呢個素菜米卷小食都 OK，好清新。

 

        不過呢個柚子沙律就強差人意喇！味道麻麻，買相又唔靚，連搣碎佢都懶，連 Miss 都話 $20 好唔值，我自己整嘅日式豆腐柚子沙律仲靚過佢、好食過佢啦！

 

        食完嘢之後，我哋坐多一陣，繼續傾謁，傾傾吓，有個 waitress 行埋嚟擺低盒嘢，個盒都好靚 o架，你哋估唔估到裡面裝住啲咩呢？

：
：
：
：
：
：
：
：
：
：
：
：
：
：
：
：

        其實係牙簽嚟 o架咋！

       

        我覺得今次餐飯無乜驚喜，同集團其下嘅美心 MX 唔相差太遠，可能係因為我哋 order 嘅 lunch set 比較 cheap o架！

        雖然每次同 Miss "犯罪" ( 唔係，係 "飯聚" 啫！ ) 嘅時間都好短，因為佢真係好忙，成日都要趕下場，但係都好開心 o架，所以 Miss 已經約定我哋暑假再聚，仲話會上佢屋企整嘢食 o添！ ( 嗯，好似又話去佢屋企樓下 Element 果度啲高級食肆食喎。) Anyway，下次記得要同 Winnie 爭贏俾錢埋單呀，今次我哋就第一次失敗咗喇！

P.S.  我留意到 Miss 同我哋講一樣嘢時，佢係特別開心，睇得出係由心笑出嚟，之唔係佢之前喺北京國家大劇院演奏 Beethoven Piano Concerto No.4 囉！佢真係好開心 o架，成副 proud of peforming in the National Centre for Performing Arts 咁嘅樣。我呢世都無可能做到 o架啦，但係我都好戥 Miss 開心呀！