蔬菜煙三文魚蛋糕 Veggie Smoked Salmon Cake

最近喺圖書館度又俾我搵到本法式鹹蛋糕食譜，今次呢本食譜好正，唔使用牛油同芝士，仲用咗淡忌廉去代替部份油脂，合哂我合尺。

噚日卒至試整咗喇，好成功，味道仲好正㖭呀！我綜合咗裡面幾個食譜嘅做法，然後將牛奶改成豆漿，繼而再減油及淡忌廉用量，食落一啲都唔覺膩，唔想食飯時，用佢嚟當成正餐都唔錯呀！

 

材料：

本菇   25 克

雞髀菇    
25 克

西蘭花    
50 克

煙三文魚  
100 克

高筋麵粉  
120 克

低筋麵粉  
60 克

泡打粉    
1 茶匙

雞蛋   1 隻

橄欖油    
30 克

糖     1 湯匙

鹽     1/4 茶匙

豆漿   100 毫升

淡忌廉    
80 克

蒜蓉  適量

黑椒粉    
適量

羅勒   少許

百里香    
少許

 

- 菇類洗乾淨後汆水數秒鐘，盛起瀝乾後再用手略為榨乾水份。

- 西蘭花切成細朵、洗淨，放鹽水內煮至半腍，盛起瀝乾後同樣用手略為榨乾水份。

- 煙三文魚切細件；粉類過篩 3 次；雞蛋拂打成蛋液，備用。

- 蛋液加油、糖及鹽用打蛋器拌勻，之後加入豆漿同淡忌廉混合。

- 將蔬菜料及三文魚倒入蛋液混合物內攪拌均勻。

- 粉類分次加入，用膠刮拌勻後倒入已鋪牛油紙嘅焗模內。

- 放入已預熱至 180 ℃ 嘅焗爐內，焗約 50 分鐘至熟透。

- 出爐後放架上攤凍即可切件享用。 

 

以上材料份量可做 9
厘米 X 18 厘米 X 6 厘米蛋糕 1 條。

 

食譜參考自林幸子嘅《6 步驟學會法式鹹蛋糕》。

近排街市有好多款包裝菇菌賣，而且價錢又唔貴，$12 已經有 3 包，
我見到呢包小型雞髀菇好 cute、好得意，而且我又
勁鍾意食，所以就買返嚟煮餸兼整蛋糕。

平時第一次試整嘅食譜我都會先做半份量作為實驗，萬一失敗都唔使浪費
咁多食材嘛！但今次唔知點解對個食譜好有信心，第一次整就已經
做 double 份量，可能我真係太愛食鹹蛋糕喇！











未食之前，淨係睇到佢個外形都已經覺得好吸引喇！

真係好好食，有煙三文魚嘅鹹香、西蘭花嘅清甜，而且菇菌仲保持到
爽脆口感，最重要係食完都唔會覺得好滯先係最重要呀！

Notes：

- 豆漿可用牛奶代替。

- 菇類汆過水之後，放入焗爐烘焗時可減少出水情況。

- 記得曾經睇過有食譜話整鹹蛋糕要溝入部份高筋粉，係因為會加入大量蔬菜、肉類等比較
  重身嘅食材，如果全用低筋粉的話，會因為筋性較低而撐唔起材料，導致麵糊唔可以完全
  發起。

- 由於高筋麵粉筋性比較強，所以攪拌麵糊時會比較黏。

豆渣燕麥條 Soybean Dreg Oat Bar

        整一次豆漿之後，就可以利用佢變化出唔到嘅食法，配蔥油餅食啦，做成 panna cotta，煮完豆漿剩低落嚟嘅豆渣都唔好浪費，營養豐富，用佢嚟整燕麥條就最好不過喇！

        其實燕麥條都已經整過好多次，不過今次又試試另一種方法，用糖膠代替蜜糖之餘，仲加入咗麵粉一齊整，效果都唔錯呢。

紅豆抹茶鬆餅 Azuki Maccha Muffin

        寫番個紅豆抹茶鬆餅食譜同大家分享先！

老表日本手信

老表 Lily 早前又去旅行，呢次目的地係日本，知道佢去日本，我就搭佢買抹茶粉，諗住喺日本當地梗係周圍都買得到兼比香港平啦！點知原來唔係，佢話去過好多地方都無得賣，即使有得賣都選擇唔多，一款起、兩款止，真係估佢唔到！

早幾年前我買開嗰罐抹茶粉 $5X / 40g，都唔係平㗎啦，依家差不多用哂，早前去咗「AEON」超市𥄫過，依家賣成 $90 罐，即係 $2.X / 1g，嘩，癲㗎！！！！ 

老表話呢包抹茶粉賣約港紙 $4X / 30g，真係超平呀！佢話唔收我錢，
當係手信喎，咁就真係萬個多謝喇！佢喺超市見到個草餅好似
好吸引，原本買嚟自己醫肚，點知佢同行朋友話去食飯喇，
於是佢就無食到，留番帶返香港俾埋我食。

好彩佢自己無食到咋，嘩，裡面嗰 "pat" 白色物體，都唔知係乜嚟嘅，
甜到呢 …… ，我已經叫做好食得甜㗎啦，都頂佢唔順，俾著
Winnie 食的話，我諗佢咬一啖之後即刻甜到休克都似！！ 

咁難得先搵到嘅抹茶粉，當然要趁 "新鮮" 用咗佢啦！我就用佢嚟整咗
紅豆抹茶 muffin，你哋睇，係咪顏色好綠呢！125 克麵粉，
只係用咗 1 茶匙抹茶粉咋，顏色已經非常之靚，不過
亦因為用得少嘅關係，所以味道就差少少囉！

粗粒小麥麵包多士 Semolina Bread Toast

早前 Ernest 媽咪去日本玩，順道入貨，佢送咗包粗粒小麥粉同 Panettone Mother Yeast 俾我，仲 share 埋個食譜俾我整麵包㖭！但由於食譜中有好多材料我手頭上都無，所以個食譜都俾我改得七七八八！！

所謂粗粒小麥粉，即係專用嚟整意粉嘅 durum wheat，亦即係意文嘅 semolina。意大利人用佢嚟整 pasta，可以做到 al dente 口感，所以呢個麵包做完出嚟同樣都會係煙煙韌韌，咬一啖之後，不其然都會講一聲：al dente！！

至於 Panettone Mother Yeast，其實係已經混合咗少量麵粉嘅酵母混合物，所以用之前一定要加水混合溶解哦！

 

中種

材料：
粗粒小麥粉 225 克
水 160 毫升
Panettone Mother Yeast 12 克

- 先將酵母溶於水中，拌勻後倒入麵粉內攪拌成糰。

- 麵糰於室溫發酵 30 分鐘。

- 將麵糰放入雪櫃內雪 15 – 24 個鐘即可。

 

主麵糰

材料：
高筋麵粉 75 克
蜜糖 15 克
乳酪 15 克
海鹽 6 克
水 約 40 克
橄欖油 2 茶匙
蛋液 少許

- 所有材料放入麵糰攪拌機內攪拌均勻，之後將中種切成細塊加入攪拌。

- 當材料攪拌成糰後，加入油，繼續攪拌至光滑麵糰。

- 將麵糰滾圓，放入已灑粉嘅兜內，用保鮮紙封好，發酵 45 分鐘。

- 麵糰排氣後平均分割成 2 份，分別滾圓，靜置鬆弛 25 分鐘。

- 麵糰再次排氣，用已灑粉嘅擀麵棍擀薄成長方形。

- 捲起麵糰捏緊收口，放入多士模內發酵至八成滿。

- 喺麵糰表面掃上適量蛋液。

- 將多士模放入已預熱至 180 °C 嘅焗爐內焗約 30 分鐘。

- 出爐後將麵糰放上架上攤凍即成。

以上材料份量可做麵包多士 1 條。

呢包就係 semolina 同 Panettone Mother Yeast 喇！

雪咗 16 個鐘後嘅中種麵糰，發到幾乎成盒滿咁滯，
發酵能力好強勁呀！

由於我自己無麵糰攪拌機及麵包機，只能用 food processor 攪打麵糰，
所以唔可以大量加水，否則會將麵糰捲入機內！呢次我只係用咗
食譜中用水量嘅一半，仲未加油都已經濕成咁，根本
無法成糰，所以個麵糰其實都無乜點搓過！！

好耐都未試過整包要用咁多手粉，你哋睇吓呢個打完杖過後嘅戰場，
成枱都係頹桓敗瓦，就知我當時打緊嘅係一場硬杖，要
勁落手粉先夾硬可以叫做打完場杖咋！！

因為其實個麵糰無乜點搓過嘅關係，所以個麵糰筋性及組織自然唔會好，
加上根本都唔可以滾圓咁滯，所以我只能夠將成個軟綿綿嘅麵糰
一嚿過放入模內發酵，出爐後個麵包表面更加塌落嚟㖭呀！

試過呢次整一個無乜點搓過嘅麵糰，就知道點解整法包係唔可以搓得太耐，
更加唔可以搓到有薄膜，因為只有咁樣先可以做到組織
無咁密嘅大窿窿，你睇我呢個包就可知一二喇！

仲有豆漿剩，又玩吓打泡泡先！

Notes：
- Panettone Mother Yeast 可改用即用酵母代替，用量 4 克，並將水減至 150 毫升。

豆漿意式奶凍 Soymilk Panna Cotta

        上星期睇番《西廚教室》搵食譜時，無意中發現原來有幾個我一直都想整嘅甜品食譜喺裡邊，睇吓睇吓，就見到呢個用豆漿整嘅 panna cotta，反正都整咗豆漿，順手整埋佢嚟試啦！

港式咖喱

提起港式咖喱，你哋會諗起咩呢？我就即刻諗起豬皮、蘿蔔、魚蛋喇！

 

呢排天氣好濕，身體勁唔舒服，前日仲頭痛到要食藥，喺時候要要煮個勁辣咖喱祛一祛濕至得喇！

今次咖喱落得好重手，真係好刺激，好過癮呀！！

大大碗咖喱撈麵，夠哂滿足哦！！

 

要食譜的話就睇番《咖喱魚蛋豬皮蘿蔔》喇！

北方小吃

        見好耐都無整豆漿，星期日教完琴之後又好得閒，於是就即刻開工整吧！咁啱雪櫃又儲咗好多蔥喺度，今日又突然 dayoff，跟手整埋個蔥油餅啦！ 

豆漿南瓜英式烤餅 Soymilk Pumpkin Scone

南瓜 scone 食譜都見過唔少，全部都係用南瓜蓉做材料。今次我就用咗 Ernest 媽咪送俾我嘅南瓜粉嚟整，再加埋烤香咗嘅南瓜籽仁，你哋有冇俾佢嘅金黃外表吸引到呀？

材料：
南瓜籽仁 20 克
低筋麵粉 140 克
泡打粉 1 1/2茶匙
南瓜粉 20 克
牛油 50 克
糖 10 克
鹽 少許
豆漿 56 毫升

- 南瓜籽仁放入焗爐，用 140 ℃ 焗約 15 分鐘至香味出；麵粉、泡打粉同南瓜粉混合好。

- 將凍牛油放入粉料內，用手指將牛油捽入麵粉內成麵包糠狀，再加入糖及鹽混合。

- 之後喺粉料中間撥開一個窿，將豆漿倒入，先用膠刮大致拌勻。

- 輕手將材料堆成粉糰，然後放上保鮮紙上，對摺保鮮紙後，用手輕輕壓扁至約 2 厘米厚。

- 用模 "吸" 出粉糰，放上已鋪牛油紙嘅烤盤上。

- 餘下粉糰輕手重新堆成糰，之後重覆以上步驟直至 "吸" 完所有粉糰。

- 喺麵糰表面掃上豆漿，然後放入已預熱至 200°C 嘅焗爐內焗 15 分鐘。

- 出爐後將烤餅放上架上放涼。

以上材料份量可做直徑 6 1/ 2 厘米烤餅約 5 個。

整緊個粉糰時已經聞到有少少南瓜味，而且顏色超靚，
真係好期待成品出爐呢！

出爐喇！焗到個面有少少金黃，更加吸引哦！

再試白神山酵母

首先喺度要多謝 blog 友 michelle 之前提供咗一啲關於白神山酵母嘅資料俾我，相當有用，如果唔係我都唔知自己原來用錯咗方法呢！

 

我之前以為白神山酵母都係好似即用酵母咁直接加入麵粉內就得，點知原來係要預先用溫水溶解，之後先可以用，所以就趁星期一仲係放緊假比較得閒，用埋剩底嗰半包酵母再試多次。

今次都係跟番仙姐個直接法白麵包多士食譜整，不過就將當中 30 克高粉改成全麥粉。

呢次唔整山形多士喇，改為做方包。

Ernest 媽咪教咗我一個麵包保濕方法，就係等到麵包完全攤凍後，用保鮮紙將佢包到實一實，雖然呢個係直接法整嘅麵包，但係因為用咗白神山酵母去整，而且又做好保鮮工作，即使今日已經係第三日，包質依然非常軟熟，撳扁個麵包之後仍然可以快速彈回原狀，掂呀！！

玉子燒 Tamagoyaki

仲記得我早前去「JUSCO Living Plaza」度買個貝殼蛋糕模同玉子燒煎 pan 嗎？( 都真係好早前喇，依家人哋都唔再叫做 「JUSCO」，改咗做「AEON」喇！) 個蛋糕模就已經用過啦，而個煎 pan 就今日剪彩喇！

木魚花水

 

材料：
木魚花 3 克
水 100 毫升

 

- 將材料放入煲內煮滾，之後轉慢火煲 5 分鐘。

- 熄火後冚蓋焗5 分鐘。

- 攤凍後過篩隔走木魚花即成。

 

 

玉子燒

 

材料：
雞蛋 4 隻
糖 15 克
鹽 1.5 克
味醂 1/2 茶匙
清酒 1/2 茶匙
木魚花水 90 毫升

 

- 除木魚花水之外，將所有材料放入碗內拂打成蛋液。

- 加入木魚花水，再輕輕拂打至完全混合。

- 燒熱煎 pan，用索滿油嘅廚紙薄薄塗上一層油。

- 將適量蛋液倒入煎 pan 內，煎成薄薄一塊半生熟蛋皮。

- 之後用筷子兼配合拋鑊動作，將蛋皮捲成長形，然後推至煎 pan 斜面的一邊。

- 再次用廚紙塗油，倒入適量蛋液，煎至半生熟時就以相同手法將原先煎好的蛋向後捲起。

- 重覆以上步驟直至蛋餅捲到適合厚度即可。

大家明唔明我講咩呢？唔明唔緊要，睇片啦，我都係咁樣學番嚟㗎咋！

呢個係餐廳大師傅示範片段。

而呢個就係靚仔廚師示範家庭式小份量做法。

原來煎玉子燒最難係用筷子將蛋皮捲起，可能呢個方法係有經驗師傅
先會咁做，我呢個新丁都唔識死，照樣跟住做，所以整到個蛋餅
爛爛哋，下次再整時都係用番鑊鏟會比較好啲，
起碼力度可以比較平均。

第一次整兼用隻 cheap cheap 煎 pan 嚟整，都可以整到
呢個樣，我自己覺得收貨㗎喇！

將玉子燒切件後就可以用嚟包壽司喇！

Notes：
- 煎蛋皮時用筷子將氣泡 “篤” 穿，咁就可以煎出平滑蛋皮。

- 第二次及其後再倒入蛋液時，記得將原先煎好嘅蛋餅稍為抬高，等到蛋液可以流入蛋餅
  底部。

再煮 Paella

今日 dayoff，完全唔使教琴，唔單只瞓到自然醒為止，起咗身之後仲乜都唔做，hea 足成日，不過你哋唔好即刻話我懶，浪費時間呀！對我嚟講，可以咁 hea 嘅日子真係唔多，好難得㗎！

 

Hea 咗成日，唞夠哂喇，咁夜晚嗰餐就做番多少少功夫啦，整 Paella 呀！！

煮一個人份量，一嘜米就夠哂，你睇，已經可以煮到成鑊喇！

今次煮嘅 paella 夠哂豪呀！咁少料都話豪？係呀，因為用咗比黃金仲要貴
嘅番紅花去煮嘛！多謝老友 Louisa 俾咗啲番紅花我過吓癮啦，
不過顏色真係靚好多，仲有種好特別嘅香味㖭！

其實以一個人嘅份量嚟講，已經算係好多料喇，
你哋數唔數得出我用咗邊幾樣嘢去煮呢？

要食譜的話就睇番《西班牙海鮮飯》啦！