2010年8月31日星期二

莎樂美鮮白菌薄餅 Salami & Mushroom Pizza

        已經有好一段時間無整 pizza 喇,上次 Louisa 送意大利 salami 俾我時,我第一時間就諗到用嚟整 pizza 喇!咁今日 dayoff 喺屋企,大把時間俾我慢慢玩搓粉、發酵,咁就一於整 pizza 啦!我仲跟食譜自製埋番茄醬呀,所以我呢個 pizza 完完全全係自家 home made


2010年8月30日星期一

鈣思寶原來都真係有效 o架!

        今朝喺屋企食早餐時,一邊食、一邊睇報紙,睇到「百佳」啲鈣思寶呢兩日做特價,$30.8 兩排之餘,仲送多盒 1 公升裝嘅燕麥鈣思寶,真係抵到爆呀!有飲開嘅朋友都應該知道,最近已經賣到成 $17.9 一排。因為我都有飲開,所以明明今日唔駛落街買餸,我都為咗佢而專登落街,對於我呢個懶落街嘅人真係 "俾足面" 呀!( 其實係睇錢份上囉! ) 有好嘢,當然要同朋友一齊分享啦!所以我都即刻 call Winnie 話俾佢聽,因為佢都有飲開呢! 



        其實我落街時都仲未夠 12:00pm,但係去到「百佳」時,發覺已經被人掃得七七八八,剩番果都係凹凹凸凸,"岩岩慚慚",有啲簡直係揀唔落手囉!我成日都諗,究竟係咪所有地方都係有咁嘅情況呢?一有嚫減價就第一時間俾人掃哂貨?我諗,高尚住宅區啲超市應該唔會有咁嘅情況啩!



        我揀到呢兩排已經算係較為好 o架啦,但係都唔係 "四正" 囉!原味果隻就有好多,仲排排都好 "靚仔" o添!梗係啦,原味果隻最少人買。不過唔緊要啦,無穿無爛就算,反正都唔影響飲用。


        其實我係想同大家分享一下 Wnnie 嘅經驗。佢話俾我聽,佢平時身體嘅含鈣量係 below standard,但係最近去完做 body check,份 report 顯示今次佢身體嘅含鈣量已經去番 normal range 入面,所以佢估計應該係同佢長期飲鈣思寶有關。一直以嚟,我都覺得呢類加鈣飲品效果唔會太大,不過叫做好過唔飲咁啫,點知原來真係有效 o架喎,所以如果有邊位 blogger 都係身體比較缺鈣,或者流失鈣質嚴重的話,不防試飲一段時間,睇吓會唔會有改善。當然,效果因人而異之餘,亦未必個個都會有咁明顯改善。


        點呀 Wnnie,妳掃唔掃到貨呀?買到的話,仲有冇 1 公升裝送呢?


香辣肉碎芋頭粒炒飯

        呢排唔知點解突然間好想食炒飯,但係又有少少驚驚哋,因為我驚勁黐鑊,洗餐死之餘,仲驚黐到無得幾多剩,到時就真係 "無啖好食"!


        又唔知點解,個腦又即刻閃出用芋頭嚟炒飯,仲要係辣辣哋果隻,好似係曾幾何時食過咁,但老實講,我真係無乜印象有食過囉!不過唔理咁多喇,既然想食,就憑想像力去試炒啦,咪當係又一次做實驗囉!




材料:
白飯
芋頭
免治豬肉
蝦乾
蒜茸
辣椒乾
金不換


醃料:



紹酒
生抽
粟粉


調味料:


魚露
老抽


- 芋頭去皮、切粒,然後炸至金黃色;豬肉用醃料醃好


- 蝦乾洗乾淨,用暖水浸軟,之後切粒;辣椒乾切粒;金不換洗淨備用。


- 燒熱油,先放豬肉落鑊兜炒成肉碎,炒至八成熟之後盛起。


- 放茸蒜、蝦乾及辣椒乾落鑊爆香,灒酒之後加入白飯,不斷兜炒。


- 當白飯炒番熱及乾爽後,就將芋頭粒及肉碎回鑊,加入調味料兜勻。


- 最後加入金不換,略炒數吓即可熄火,上碟。



 


Notes
- 煮飯時,用水份量應該比平時略少,煮成較乾身嘅飯粒。


- 金不換唔好太早落鑊,否則香味消失。


- 如果唔食得辣的話,可以唔落辣椒乾。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2010年8月26日星期四

好心寒、好痛心!

        我一向都好少睇電視,所以今次菲律賓呢單嘢我都唔係知道得咁詳細,只係從網上新聞得知一二。


        噚日搭火車去 Louisa 屋企時,一路不停咁睇住有線新聞重複嘅報道,真係覺得好心痛、好唔舒服,全程一直喺度喊!所以今朝食早餐,睇番噚日份報紙時,我刻意避開哂所有關於呢嘅篇幅,唔想睇到個人唔開心,影響情緒。呢兩日做早、晚課時,我都有將功德回向俾果幾位受害者,希望佢哋可以安息,往生靜土,早登極樂!


        因為自己嘅信仰關係,我會信因果。


        今天所受嘅果,皆因昨天所種嘅因;
       
今世所種嘅因,將會係下世嘅果。


        如果今世得到善果,皆因前世種下嘅善因;
        同樣,今世得到惡果,亦係前世種下嘅惡因所致。


        所以,如果發現自己今世事事未能如意,就有生之年盡量多做好事,種下善因;如果想下世事事如意,就請今世及時行樂,為下世種下善因,下世必得善果。


        阿彌陀佛!


2010年8月25日星期三

送俾 Miss Cheng 嘅雪球

        今朝一早就出門口去 Miss Cheng 屋企,同 Aaron 上完 theory 之後就一齊去又一城食 lunch,當然要帶埋星期一果日專登為 Miss 而整嘅三色雪球啦!




送得俾 Miss,梗係要包裝得似樣啲 o架嘛!


 



Miss 都讚好食,覺得好鬆化,而 Winnie 一食就食到好香濃嘅杏仁味。


       
        喂 Winnie,吓下次整咩俾 Miss呀!



P.S.  今日我同 Winnie 又爭輸咗俾 Miss Cheng 喇!講緊嘅咪就係俾 Miss 爭贏咗出錢請食 lunch 囉!我同 Miss 講,話呢餐應該係我同 Winnie 請佢食飯,點知佢話我窮,啲錢留番自己洗喎!真係俾佢激死!!


2010年8月23日星期一

南瓜牛肝菌意大利燴飯

        都已經有一段日子無整 risotto 喇,之前曾經整過雜菌 risotto 南瓜 risotto,兩款都勁好味,真係各有千秋。所以上個星期整粉蒸肉南瓜時,特意留起少少南瓜,要今晚煮 risotto,今次我就將兩者合併埋一齊,做成南瓜牛肝菌意大利燴飯,同樣咁滋味,真係百吃不厭!



        有興趣嘅朋友就 click 入下面兩條 link,參考一吓食譜材料及做法啦!


1. 雜菌意大利飯


2. 南瓜意大利燴飯


三色雪球 Snow Ball Trio

        之前曾經問過 Miss Cheng 食唔食用綠茶整嘢,佢話乜綠茶除咗要嚟飲之外,仲可以嚟整嘢食咩!於是我就應承用綠茶整嘢食俾佢試,不過直到依家都未整。因為我同 WinnieMiss 今個禮拜三食 lunch,所以我就整咗呢個雪球俾佢試吓。


        其實之前都咗好耐,用綠茶整乜好,後尾睇到櫻井老師有教整綠茶雪球,就即刻決定咗要整呢款。另一方面,我會睇中呢個食譜,係因為佢個整法同平時果啲唔同,並唔係將綠茶粉直接加入乾粉內混合再搓成糰,而係焗好出爐之後再沾上綠茶粉,咁就啱哂喇,因為 Winnie 係唔飲綠茶嘅,咁我就可以參考食譜,做一款麵糰,焗好之後再滾上綠茶粉、黃豆粉同朱古力粉,咁咪唔駛每隻味都做一個麵糰囉,慳番唔少功夫!




材料:
低筋麵粉      75 克
糖霜              20 克
鹽                  少許
牛油              45 克
杏仁粉          25 克
防潮糖霜      適量
綠茶粉          適量
黃豆粉          適量
朱古力粉      適量


以上材料份量可做每個重 10 克嘅雪球 16 個。


食譜參考自櫻井景子嘅《和菓子‧和甘味 (秋冬篇) 》。





- 牛油切粒,之後放入雪櫃冷凍;麵粉過篩 3 次。


- 麵粉、糖同鹽一齊放入食物處理器內,以低速混合好





- 跟住加入杏仁粉同冰凍牛油粒,攪拌成麵包糠狀。


- 之後用手搓成每個重 10嘅小麵糰,放上已鋪入爐紙嘅烤盤上。



- 放入已預熱至 180 °C 嘅焗爐內焗約 18 - 20 分鐘。


- 將綠茶粉、黃豆粉及朱古力粉分別與少量防潮糖霜拌勻。


- 雪球出爐後,分別滾上綠茶粉、黃豆粉同朱古力粉即成。



三隻顏色都好 sharp、好靚!


 



雪球好鬆化,仲有好香杏仁味,無得彈!



Notes
- 牛油喺雪櫃拎出嚟後即切即用的話,可以唔駛再放番入雪櫃度雪凍。


- 搓麵糰時切忌搓得太耐,避免牛油因遇熱而溶化。


- 如果無食物處理器的話,可直接用手將牛油摔入麵粉內成麵包糠狀。


- 綠茶粉、黃豆粉同朱古力粉加入防潮糖霜可以防止粉類受潮。



        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2010年8月21日星期六

粉蒸肉南瓜

        今晚偷懶,求求其其整一碟餸就算數,連鑊都唔駛開,煲好水將碟餸蒸熟就算,不過味道唔差 o架,仲好惹味 o添!



材料:
免治豬肉
南瓜
五香蒸粉


醃料:


生抽
紹酒
粟粉
麻油


- 先用醃料將豬肉醃好;南瓜去皮、去瓤,之後切粒。


- 南瓜粒放上碟,之後將豬肉鋪上南瓜面,再喺豬肉面灑上蒸粉。


- 煲滾水,隔水蒸至豬肉熟透即可。



南瓜非常清甜,加埋鮮肉汁同五香蒸粉嘅味道,非常誘人!
係咪好簡單呢?所以呢碟又係 "懶人餸" 一道!



        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans 啦!


五香蒸粉

        以前成日都聽到有粉蒸乜乜、粉蒸物物嘅菜式,其實都唔知係咩嚟,只知道應該係外省餸,直到早前睇番《米香美饌》呢本書,先至發現原來即係用五香蒸粉做嘅菜式,仲有教埋點整蒸粉呢!
 
        材料勁簡單,只得三樣,做法都唔難,咁貪玩嘅我,梗係即刻整啦!


榛子咖啡慕斯 Hazel Nut Coffee Mousse

        Margaret 呢個榛子咖啡 mousse 想整好耐㗎啦,因為有我鍾意嘅咖啡同榛子,兩樣材料擺埋一齊,真係香到震!!
 
         今朝 Lily 嚟上堂時,我俾咗個佢食,佢食第一啖已經勁嗌 "好正",梗係啦,佢係一隻 "咖啡精",我知佢實鍾意食!原本佢叫我整咖啡雪糕,不過我諗住啱啱整完雪糕,況且我又想整呢個好耐,咁咪順理成章整咖啡 mousse 囉!
 
 
 

2010年8月19日星期四

自家製五香鹹蛋

        之前Jacky Yu 個 blog 度睇到佢教整鹹蛋,但係並非一般鹹蛋,而係有五香味鹹蛋,我睇完之後就即刻心思思想整,好想試吓有五香味鹹蛋係點,但最重要、最吸引我嘅反而係 Jacky 標榜嘅 "保證零失敗",睇到呢幾個字,我就好放心去試做!



2010年8月18日星期三

Aceto Balsamico di Modena

        睇見 topic 個幾個意大利文,估唔估到點解呢? Aceto 即係 vinegar;Balsamico 即係 balsamic;di 即係 of;Modena 係意大利一其中一個地方,咁所以 Aceto Balsamico di Modena 嘅意思係 Balsamic vinegar of Modena,即係 Modena 出產嘅意大利陳醋囉!

        因為一直都有諗住買 Balsamic vinegar,所以都有喺 「Taste」留意過。其實有平有貴,價錢真係可以相差好遠,由三十零蚊到三百幾蚊支都有!不過我留意到一樣嘢,不論價錢平貴,原來好多時 Balsamic vinegar 都會落色素,一睇到個 ingredient 有用到色素,我就即刻放低!由細到大,我都好怕有色素嘅食物。

        千挑萬選,最終我就睇中咗呢隻牌子: 


意大利 Salami & 海鹽黑椒磨

        早兩個禮拜,Louisa 去咗英國出差,之後就同 Genevieve 一齊去羅馬玩咗幾日,我知道佢又再去意大利,就即刻搭佢幫我買番條地道意大利 salami,因為感覺上應該會正宗啲,同埋一定平過香港好多!

        不過,Louisa 又當係手信送俾我,唔肯收番錢,仲另外送多一個海鹽黑椒磨俾我 o添!



2010年8月17日星期二

普羅旺斯燴雜菜 Ratatouille

        之前曾經同 blog 友 T&P 傾偈,佢知我有時會食齋,於是佢推介我整一個法國名菜 Ratatouille,我睇完個食譜之後都好吸引,一定會整一次,不過就絕對唔會喺食齋日整囉,因為有洋蔥呀!

        趁今日整Foccacia,就順便整埋呢個 Ratatouille 一齊做晚餐啦!



2010年8月16日星期一

意大利香草麵包 Foccacia

        有無發覺近排我成日都整麵包呢!自從買咗部 food processor 返嚟之後,發覺用佢嚟搓麵糰真係可以慳番唔少力,之後自己再用手搓多陣就攪掂,非常方便,所以咪成日都整包包囉!部 food processor 已經化身成一部麵包機喇!

        記得以前媽咪好鍾意食「Délifrance嘅香草包,對於應慳則慳嘅媽咪嚟講就算之前買成 $7 件 ( 已經好耐無買過,唔知依家賣幾錢 ),佢都會簡唔中買返嚟一齊食,見佢咁鍾意食,我當然都好識做,有機會行經「Délifrance」我都會帶件 "手信" 返屋企送俾佢。

        當時我對麵包無乜認識,依家諗番轉頭,果個香草包應該係 foccacia。上次 Louisa 請我去 Amaronie's Little Italy 食晚餐,果個麵包又係勁好食,我問 Louisa 果個係咩包,佢話就係 foccacia!咁好食嘅麵包,我當然都想自己試吓整啦,所以今日又開爐試整呢個包。其實我有好多個 foccacia recipe,都唔識得揀邊個係好,於是就參考Rachel 個食譜嚟試整,因為覺得好似較為簡單兼成功率較高,不過材料及做法就有少少改變。





材料:
高筋麵粉
                        250 克
即用酵母                        1 1/ 2 茶匙
糖                                   1 茶匙
鹽                                   1/ 2 茶匙
水                                   150 毫升
初榨橄欖油                     1 1/ 2 湯匙
迷迭香 ( Rosemary )      1 茶匙
去核黑橄欖                     5 粒

海鹽                                  少許
 
- 將麵粉、酵母、香草、鹽同糖倒入食物處理器內混合,加水搓至起筋。

- 將麵糰稍為攤薄拉長,將橄欖油倒喺麵糰上面,之後再次開機搓成光滑麵糰。

- 拎出麵糰,放上已灑粉枱面上,搓揉及摔打麵糰,直至拉開時出現薄膜。


- 將麵糰滾圓並黏緊收口,放喺已灑粉嘅兜內,然後用保鮮紙冚住,發酵 45
 
分鐘。

- 麵糰排氣、再滾圓,同樣冚上保鮮紙發酵 45 分鐘。

- 將麵糰放上烤盤上,用手將麵糰向四面推展,包好保鮮紙再發酵多 45 分鐘。

- 倒少量橄欖油喺麵糰上面,搽勻整個表面後,灑上適量迷迭香。


- 用手指喺麵糰上面插入做成洞,然後放入切半嘅黑橄欖,並灑上少許海鹽。

- 放入已預熱至 210 °C 嘅焗爐內焗 15 - 20 分鐘至表面金黃即可。
 
以上材料份量可做 28 cm X 28 cm 麵包一個

食譜參考自 Rachel Yau 嘅《知廚之樂》。



 

唔知係咪橄欖油搽得太少,所以無乜金黃色,
不過個面都已經焗得比較乾。

 

 
 
 
連埋油醋汁一齊食,正!

 






Notes
- 原食譜係無落到乾迷迭香,只係喺插入黑橄欖同時插入新鮮迷迭香枝。


- 麵糰向烤盤四面推開時,切勿過度大力而將麵糰壓得太扁。

- 食譜係教用乾布冚住發酵而唔係用保鮮紙。