話梅涼瓜

        好耐都無整過冷盤或涼拌菜喇，今日就用涼瓜嚟整個冷盤，貪佢簡單又快手，功夫少，咁就可以慳啲時間整另一味餸，而且今朝晨咁早 5 點半就要起身，依家都仲係好攰、好眼瞓，真係無乜心機慢慢洗菜呢！

        近期好多時都聽到有唔少食肆都推出梅子涼瓜、話梅涼瓜之類嘅嘢，雖然我未食過，但聽見都好吸引，酸酸哋、甘甘哋，食完實好開胃，加上我由細到大都好鍾意食涼瓜，完全唔怕苦，所以今日就整呢個話梅涼瓜做餸。我自己就參考咗 Jacky Yu 個梅子涼瓜食譜嚟整，不過材料有少少唔同，但味道應該唔會差太遠啩！

材料：
涼瓜
話梅粉
鹽
糖
紹酒

- 先加適量話梅粉落滾水度，然後冚蓋將味道焗出，攤凍備用。

- 涼瓜洗乾淨，去頭去尾後對半切開，去瓤後斜切片。

- 話梅水加入紹酒、適量鹽及糖調味，之後倒入涼瓜片內。

 

- 加入凍滾水直至蓋過涼瓜表面。

- 放入雪櫃，醃約 6 個鐘即可食用。

 

Notes：
- 如果無話梅粉的話，可以用原粒話梅代替，但需要較長時間焗出味。

之前媽咪喺台灣買返嚟嘅話梅粉。

- 涼瓜洗淨後可用凍滾水過水，咁就更加乾淨衛生。

-  涼瓜勿切得太厚，否則醃入味嘅時間就會增長。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！