迷你猶太麵包 Mini Bagel

        早前發覺原來好耐之前買落一本簡體字嘅麵包書，一直都無跟佢啲 recipe 做過，前幾日拎番起嚟睇，發覺原來裡面唔單只教整歐陸麵包，仲有教整一啲同麵包相關嘅食品，包括麵包抹醬、餐湯、布甸等，都幾吸引。揭吓揭吓，發覺仲有教整 bagel ( 貝果 )，呢個亦都係喺我個 "To Do List" 內。


        一直以嚟，我對呢個包包嘅製作過程都好好奇，點解焗之前個麵糰會先放滾水內煮一煮呢？究竟煮過之後，個包嘅 texture 係點嘅呢？今日卒之可以知道喇！

 

材料：
高筋麵粉      200 克
低筋麵粉      50 克
即用酵母      5 克
糖                 5 克
鹽                 5 克
固體菜油      5 克
水                 150 毫升
蛋白              適量

- 將麵粉、酵母、鹽同糖倒入食物處理器內混合，加水搓至起筋。

- 將麵糰拎出，包入固體菜油，之後再放番入食物處理器內搓成光滑麵糰。

- 拎出麵糰，放上已灑粉嘅枱面上，搓揉及摔打麵糰，直至拉開時出現薄膜。

- 將麵糰滾圓並黏緊收口，放喺已灑粉嘅兜內，然後用保鮮紙冚住，發酵 40
  分鐘。

 

- 當麵糰發酵完成後，將麵糰排氣並分割成 8 份，分別滾圓後，冚上保鮮紙鬆弛
  10 分鐘。

- 用手指插入麵糰中央，然後不斷旋轉劃圈，將中央嘅洞擴大。

- 煲滾一煲糖水，逐一將麵糰放入煮 10 秒鐘，翻轉麵糰再煮多10 秒鐘，之後立即
  撈起，瀝乾水份。

- 將麵糰放上已鋪入爐防黏蓆嘅烤盤上，然後掃上蛋白。

- 放入已預熱至 200 °C 嘅焗爐內焗 15 - 20 分鐘即成。

以上材料份量可做麵包 4 個或迷你麵包 8 個。

食譜出自辜惠雪嘅《百變麵包 DIY》。

覺唔覺有少少似細個食果啲水泡餅呢！

 

麵包細細個、脹卜卜，好 cute 呀！

 

原來 bagel 個外皮係好煙韌，但內裡就同普通麵包一樣咁軟熟。

 

搽埋三文魚醬一齊食，又煙韌、又甘香呀！

Notes：
- 將麵糰放入糖水內煮，其實係代替咗第二次發酵嘅步驟，所以千祈唔好煮多過
  10 秒，因為煮過龍即代表麵糰發酵過度。

- 糖水嘅份量比例為：每 500 毫升水就加 25 克糖。
 

- 麵糰掃上蛋白係為咗方便焗上色，所以唔掃蛋白亦可。