自家製五香鹹蛋

        之前喺 Jacky Yu 個 blog 度睇到佢教整鹹蛋，但係並非一般鹹蛋，而係有五香味嘅鹹蛋，我睇完之後就即刻心思思想整，好想試吓有五香味嘅鹹蛋係點，但最重要、最吸引我嘅反而係 Jacky 標榜嘅 "保證零失敗"，睇到呢幾個字，我就好放心去試做！

果然真係零失敗喎！左邊果隻係雞蛋，右邊果隻係鴨蛋，個蛋黃勁流油、勁起沙呢！

 
 

材料：
鴨蛋      2 隻

雞蛋      2 隻
粗鹽      100 克
花椒      2 克
八角      2 克
草果      2 克
丁香      2 克
桂皮      2 克
水         400 毫升

食譜嚟自 Jacky Yu 嘅自家製作私房五香鹹蛋。

- 將鴨蛋同雞蛋洗乾淨，之後抹乾，備用。

- 鹽同所有香料放入水內、煲滾，當香料煲出味後就可以熄火，攤凍備用。

- 預備一個玻璃密氣樽，用滾水沖洗樽內。

- 將五香鹽水倒入樽內，放入鴨蛋同雞蛋，冚好蓋，放喺陰涼地方醃四個禮拜即
  成。

第一日浸起時個樣。

 

四個禮拜後，五香鹽水變得好深色。

 

今晚就用咗隻鹹蛋嚟整金銀蛋莧菜，連啲菜都有
淡淡嘅五香味，好特別呀！ 

 

 

 

Notes：

- 煲五香鹽水時，間中要攪拌一下，幫助粗鹽完全溶解。

- 由於蛋係會浮起，令部份蛋會露出水面，所以每星期要將蛋攪拌調位，令蛋能夠
  均勻入味。

- 四個禮拜後，所有鹹蛋必須拎出，否則會醃到過鹹。