肉醬意粉 Radiatori alla Bolognese

        今晚煮咗一樣我好鍾意食，但又好難有得食嘅嘢，就係肉醬意粉喇！對一般人嚟講，呢個意粉真係好 common，喺一般西餐廳、茶餐廳，甚至係 "大快樂" 之類嘅快餐店都可以食到，但係多數餐廳都係用免治牛肉嚟整，所以我就食唔到喇，因為我係唔食牛肉嘅！

        都係個句：「想食咩？咪自己郁手整囉！」所以我就參考咗 Margaret 本 《美味意大利粉》裡面個 Bolognese 肉醬做法，再加埋早前 Louisa 送俾我果包 Radiatori 意粉，做咗呢個咁有特色嘅肉醬意粉。

材料：
免治豬肉                           約 300 克 (即半斤)
細洋蔥                             1 個
蒜頭                                 2 粒
紅蘿蔔                             1/3 條
西芹                                 1 條
月桂葉 ( Bay Leave )       2 片
百里香 ( Thyme )             1 茶匙
紅酒                                 100 毫升
黑椒粉                              1 茶匙
茄膏                                 1 湯匙
罐頭番茄                          200 克 ( 約半罐)
各式意大利粉                   適量

調味料：
鹽                                      適量
糖                                      適量
喼汁                                  少許
 

- 洋蔥、蒜頭去衣後略沖洗；紅蘿蔔刨皮；西芹洗乾淨。

- 將以上全部材料切細粒，備用。

- 燒熱油，放豬肉落鑊炒至乾身及微焦黃色，盛起。

- 之後原鑊爆香蒜頭，依次加入洋蔥、西芹及紅蘿蔔炒香。

- 肉碎回鑊，加入月桂葉、百里香同黑椒粉，拌勻。

- 加紅酒煮至半乾後，加入罐頭番茄，壓爛成番茄蓉。

- 拌入茄膏，再加適量水份至冚過所有材料，用大火煮滾。

- 煮滾後，轉慢火將材料燴約 45 分鐘至肉碎腍透，加入調味料拌勻。

- 當肉醬差不多煮到汁乾時，另煲滾水，落少少鹽，加入意粉，根據包裝袋上說
  明將意粉煮熟。

- 將意粉舀入肉醬料內，拌勻，即可上碟。

所有要用嘅材料。
 
 
 
 
 
 

好好食呀！真係有十幾年無食肉醬意粉喇，今晚好滿足呀！

  

 

Notes：
- 食牛肉嘅朋友，可將 2/3 免治豬肉用免治牛肉代替。

- 用鮮番茄代替罐頭番茄時，記得先將番茄去皮。

- 燴肉醬時，記得間中將材料攪拌，可令材料均勻入味及防止黐底。

- 煮多咗嘅肉醬，可以放入冰格保存，到要用時將肉醬解凍，之後煮番熱即可。