普羅旺斯燴雜菜 Ratatouille

        之前曾經同 blog 友 T&P 傾偈，佢知我有時會食齋，於是佢推介我整一個法國名菜 Ratatouille，我睇完個食譜之後都好吸引，一定會整一次，不過就絕對唔會喺食齋日整囉，因為有洋蔥呀！

        趁今日整咗 Foccacia，就順便整埋呢個 Ratatouille 一齊做晚餐啦！

材料：
茄子                          1 條
翠玉瓜                     1 隻
洋蔥                         1 個
番茄                         3 個
三色椒                     各 1 個
蒜頭                         4 粒
茄膏                         1 罐
白酒                         1/ 2 杯

牛至 ( Oregano )      適量
黑椒粉                       適量
鹽                               適量

- 所有蔬菜洗乾淨，茄子同翠玉瓜切粗粒，洋蔥切細粒。

- 番茄去皮後切粒；三色椒切條；蒜頭剁成茸。

- 燒熱油，先爆香洋蔥及蒜茸，之後加入三色椒一齊炒。

- 加埋其他蔬菜粒入鑊兜炒，跟住加入茄膏同白酒兜勻。

- 用中慢火炆煮約 15 分鐘至汁略為收乾濃稠。

- 最後加入黑椒粉、香草同鹽調味，即可上碟。

今晚嘅晚餐：Foccacia & Ratatouille。

 

 

Notes：
- 番茄喺底部用刀輕割十字，放入滾水內煮幾分鐘，拎出後就可以輕易撕去外皮。

- 炆煮時記得間中兜一兜材料，以防黐底。

- Ratatouille 可跟飯、意粉或麵包伴食。