2014年7月30日星期三

雪耳栗子姬松茸湯

        近排加入咗 Facebook「素食青年」群組,原來有好多後生仔女都係食素嘅,當中自然有啲係因為宗教原因而食齋啦!有啲就係為咗個人健康而食素,有啲就更加無私,係為咗呢個地球環境而成為素食者,真係值得敬佩同加許!

        喺群組裡面,大家都會分享一下自己嘅素食心得同 傑作,又會分享自己到過嘅素食餐廳,介紹菜式、環境及水準,真係知多好多嘢。

        今晚又煲齋湯喇,呢次用料好豐富,細食嘅朋友淨係飲湯同食湯渣都已經夠哂飽!!
 
 

2014年7月27日星期日

麥芽糖清貨第四擊

        啲麥芽糖每次都只係用好少份量,好似用極都用唔完!

        整完紅豆雪糕之後都仲有啲 cream 剩,咁就不如索性整個 Pavé au chocolat,一次過幫手清兩樣嘢啦!

紅豆雪糕 Azuki Ice-cream

        又到清貨時間喇,今次目標係要清埋啲淡忌廉同冷宮內嘅紅豆餡。要大量清 cream 的話,我自己就會整雪糕,整一次都最少唔見咗 200 喇!


2014年7月24日星期四

試做甘酒

        有無聽過甘酒呢樣嘢?我之前都唔知有呢樣嘢,都係睇《不使用砂糖的自然派 sweet 甜點》一書介紹先知!書內所有食譜都唔用雞蛋同奶類製品之外,就連精製糖同蜂蜜都唔會用,甘酒就係其中一種書中推介天然甜味料。

        其實書中都有教到點樣自製甘酒,但我一直都無整到,係因為呢本食譜內的材料份量,好多時都用容量而唔用重量去做單位,例如一杯麵粉、半杯油、1/4 杯糖等,我自己就好唔鍾意呢種計算用料方法,覺得準成度唔夠準確,而且我自己又無 ,所以一直都無諗過試整。

        直到最近, Youtube 度睇番日本型仔廚師啲舊片,發覺原來佢都有分享點整甘酒,不單只有 video 跟住學,清楚睇到整過製作過程同成品樣貌之外,最重要係用「克」去表達用量,對我嚟講就 user friendly 好多,所以我都起心去試整喇!


自家製意大利蛋麵 Homemade Egg Pasta

        其實今次唔係第一次整 pasta,之前已經試整過一次,不過嗰次整時仲未買麵包機,所以用人手去搓麵糰。原來整 pasta 個麵糰係要相對整麵包麵糰乾身好多,上次因為無經驗,見個麵糰咁硬,好難搓,所以就一路整一路加水,雖然個麵糰都係整得成功,但到要切條時就即刻知衰喇,因為濕到好黐刀,就算切得到都鬆散唔到,total loss!!

        依家有部麵包機,當然又心郁郁想再試多次啦!將所有材料倒入攪拌桶內,按 烏冬及意粉麵糰模式就攪掂,卒之都成功做到喇!


消暑袪濕冬瓜粥

            今日係大暑,即係一年之中最熱嘅一日,好彩我今日唔使出街,避免中暑。不過,匿喺間西斜屋度幾乎由朝做到晚,都唔好得去邊!唔係講笑,件衫濕到透就當然㗎啦,條底褲都一樣扭得水出,連面褲都濕埋!

        大暑當日通常都會買包袪濕料煲冬瓜水,但我就對呢樣嘢無乜好感,由細飲到大都仲係覺得味道怪怪,媽咪可能都知道我唔多鍾意飲,所以間中都會用同樣材料煲成甜粥,咁就即刻唔同講法喇,好食好多!之前我都會買包袪濕料嚟煲呢個甜粥,但今年就偷懶喇,淨係用咗幾款豆加薏米去煲咋!


2014年7月22日星期二

沙茶黑椒芋頭栗子燜麵筋

        一向都鍾意食薯仔、芋頭、南瓜、番薯、麵條等高澱粉質食物,所以幾乎每個禮拜都梗有其中一樣坐陣我三餐之中。今晚就整咗我好耐無煮嘅芋頭,又試攪攪新意思,試吓用黑椒醬同沙茶醬嚟燜。
 
 

2014年7月21日星期一

米粉麵包

        今日又幫 Ernest 媽咪整麵包,咪睇見個樣平平無奇,但用料就一啲都唔平凡,因為呢次溝啲米粉入去整。Ernest 媽咪話食過用米粉整嘅麵包,質地煙煙韌韌,覺得好好食,叫我試吓整,但係我之前從未整過,所以開工之前都要做番少少功課!
 
        做完一輪 research,知道基本上米粉含量越高,麵包個 size 就越細,高度就越矮,最理想就係用約 20 – 30% 米粉去代替小麥麵粉就最理想。另外,用米粉整嘅麵包係比一般麵包較乾身,所以最好就係用湯種法去做,提高保濕能力。
 
        好喇,知道哂要注意嘅要點,咁就可以開工喇!
 
 

2014年7月15日星期二

打爛齋缽的糖醋排骨

        大家都知我好少食肉,主要都係以素食為主,其實要我長期食全齋都絕對無乜問題,記得當年媽咪走嘅時候,就由當日起食足七七四十九日全齋,為媽咪做功德,當時完全唔覺得有任何問題,反而仲覺得乜咁快就食完四十九日齋嗱,或者可能係太傷心,根本對其他事物已經無乜感覺啦!
 
        只要有人煮埋俾我食的話,食全齋對我嚟講其實真係無乜難度,但係要自己買餸煮飯的話,咁就真係難啲喇!點解咁講呢?身為廚房 CEO嘅你,每日嘅難題係乜呢?當然就係 今晚食乜餸啦!!加上我份人又好奇怪,短期內都唔想食番同一樣餸,要次次唔同款式,就算幾好食嘅餸,我都最快要幾個月後先會重覆一次。喺咁嘅情況之下,唔食肉兼唔食五辛的話,可以選擇嘅都真係少好多,所以我久唔久都會食肉,費事諗菜式諗到頭都爆!!
  
        近排都比較少食豬肉,而且突然間又好想食糖醋排骨,所以就買咗啲一字排嚟整。對我嚟講,呢次個糖醋排骨都夠哂破格,事關平時煮濃味餸菜我都係用急凍肉類,唔會用新鮮肉咁大嘥,點知今次又懵吓走去買新鮮排骨嚟整;正常應該用紹酒,但係懶就隨手拎起枝玫瑰露用就算;見到玫瑰露前面枝魚露,貪得意又落少少落去試吓,攪到完全都唔正宗!煮緊嘅時候又老人癡呆病發,邊煮邊試味,咁就出事喇!
 

涼瓜蘿蔔煮麵筋

        今個月居然有成四日要食齋,印象中好似係首次出現呢個情況。今日係觀音誕,我當然會食全齋啦!
 
        因為我習慣比較夜先食第三餐,通常都係夜晚十一、二點先食,無辦法啦,工作時間係咁,加上自己又住得遠,返到屋企先整嘢食,無可能會早囉!噚晚餐飯都係過咗子時先食,所以就要煮齋喇!
 
 

烤雜菜沙律

        老友 Louisa 送咗隻「Le Creusetgrill pan 俾我咁耐,用過幾多次都真係十隻手指數得出,皆因隻 pan 雖然細細隻,但真係好重,而且因為我少食香口煎炸食物,所以好少用佢嚟煎烤食物,惡性循環之下,到依家隻 pan 都仲未完全 油潤,煎嘢食都仲係會黐,之後洗又艱辛、又重、又煩,所以已經好耐不見天日喇!
 
        直到上星期見到 blog 友芹菜整咗個烤茄子沙律,我自己就從來都未試個呢種食法,覺得好吸引,更重要嘅係,原來唔使落油都可以烤到茄子兼唔黐底,真係咁神奇!?一如要拎番隻 pan 嚟試吓至得。
 

2014年7月12日星期六

洋蔥雲耳炒絲瓜

        又一追尋兒時味道之作,以前媽咪間唔中都會煮呢個餸,唔知點解我勁鍾意食,可能有我至愛嘅絲瓜同洋蔥啩!
 
 
 

2014年7月11日星期五

沙嗲荔枝菠蘿雞柳

        上個禮拜去教 Ryan 時,Ada 話佢姑姐自己種咗荔枝樹,所以佢哋摘咗好多荔枝,仲送咗啲俾我㖭!除咗就咁食之外,我都鍾意用佢嚟入饌,因為就咁食覺得甜過頭,唔多似水果。今次就用嚟整沙嗲雞柳,超惹味呀!
 
 

2014年7月10日星期四

屯門都有沙律菜賣

        呢個禮拜比較忙,無乜時間靜靜坐低寫 blog,嚟緊有空檔先慢慢出番啦!先講番上個禮拜六嘅事。
 
        做我哋呢行,星期六應該係最忙嘅一日,因為啲學生唔使返學,所以理應全日都會有學生,唔會好似平日咁成四、五點先開工。教咗足足廿年,居然呢段時間禮拜六可以全日專心量地同拍烏蠅,真係夠哂折墮!!不過折墮還折墮,我都唔會浪費咗啲時間,喺屋企做清潔、整包餅、買餸煮飯等,總之次次放嚫假都一定過返工,除非當日狀態唔好啦,咁就會用嚟休息攤抖囉!上個禮拜六就去 Winnie 屋企交收,之後順道去補充物資。去得到新墟,當然要去幫嚫Facebook 網友早前介紹過嘅沙律菜檔啦!
 
 

2014年7月1日星期二

雜菜炒粉絲

        整好咗新嘅泡菜,要快快手清埋啲舊泡菜,費事阻住雪櫃寶貴空間。
 

老友 order 的 marmalade

        Order 蛋糕、曲奇就聽得多,但 Ernest 媽咪居然要 order 果醬,佢話上次我同 Ernest 婆婆一齊整 marmalade 越食越覺好味,越放得耐就越香甜,依家差唔多食哂,所以要補充番喎!老友開到聲,我又點會托手踭呢!今日即刻開工整,聽日就可以交貨喇。