米粉麵包

        今日又幫 Ernest 媽咪整麵包，咪睇見個樣平平無奇，但用料就一啲都唔平凡，因為呢次溝咗啲米粉入去整。Ernest 媽咪話食過用米粉整嘅麵包，質地煙煙韌韌，覺得好好食，叫我試吓整，但係我之前從未整過，所以開工之前都要做番少少功課！

 

        做完一輪 research，知道基本上米粉含量越高，麵包個 size 就越細，高度就越矮，最理想就係用約 20 – 30% 米粉去代替小麥麵粉就最理想。另外，用米粉整嘅麵包係比一般麵包較乾身，所以最好就係用湯種法去做，提高保濕能力。

 

        好喇，知道哂要注意嘅要點，咁就可以開工喇！

 

 

 

湯種

材料：
高筋麵粉      15 克
水                 75 毫升

- 將麵粉同水放入細煲內，用中慢火邊加熱、邊攪拌直至達 65 ℃ 並變得稠身。

- 熄火後攤凍，待用。

主麵糰

材料：
高筋麵粉      195 克
米粉             70 克
即用酵母      2 茶匙
糖                 2 1/2茶匙
鹽                 1茶匙
水                 約 100 毫升
橄欖油          10 克

- 將麵粉、米粉、酵母、湯種、鹽同糖混合，逐少加水搓至起筋，再加油，繼續搓成麵
  糰。

- 將麵糰拎出，放上已灑粉嘅枱面，繼續搓揉及摔打成光滑麵糰。

- 將麵糰滾圓，放入已灑粉嘅兜內，用保鮮紙封好，發酵 45 分鐘。

- 麵糰排氣後平均分割成 9 份，分別滾圓，靜置鬆弛 10 分鐘。

- 烤盤上鋪上入爐防黏蓆，放上方形慕斯圈，再用已裁好尺寸嘅牛油紙圍好內圈。

- 麵糰再次排氣、滾圓，捏緊收口後逐個放入慕斯圈內，發酵約 45 分鐘至高出慕斯
  圈。

- 喺麵糰表面灑上少量米粉，放入已預熱至 190 ℃ 嘅焗爐內，焗約 20 分鐘。

- 出爐後立即脫模，並移至架上攤凍。

以上材料份量可做 6 吋 X 6 吋麵包 1 底。

Ernest 媽咪提供埋包日本米粉俾我整麵包呢！

 

同我喺網上見到網友分享一樣，個包明明已經發酵高過個

慕斯圈，但焗完出嚟就座低哂，我估可能係

因為米粉無乜筋性，唔能夠好好咁將啲

空氣困住喺個麵包裡面所致。