紅豆雪糕 Azuki Ice-cream

        又到清貨時間喇，今次目標係要清埋啲淡忌廉同冷宮內嘅紅豆餡。要大量清 cream 的話，我自己就會整雪糕，整一次都最少唔見咗 200 克喇！

材料：

蛋黃                      2 隻
糖                         80 克
豆漿                     160 毫升
雲呢嗱濃縮液       少許
淡忌廉                  200 克
紅豆餡                   100克 

- 蛋黃加糖混合，用打蛋器拂打直至變成淡黃色。

- 豆漿加熱至將滾起狀態，然後逐少倒入蛋糖混合物內，邊倒邊攪拌。

- 將材料倒回煲內，加入雲呢嗱濃縮液攪拌，加熱至變得濃稠厚身為止。

- 座冰水散熱，完全攤凍後就放入雪櫃雪最少 3 個鐘頭。

- 淡忌廉打至七成企身，之後與雪凍嘅材料攪拌混合。

- 拌入紅豆餡後，將材料倒入容器內，然後放上冰格。

- 當材料快將結冰時，用叉或電動打蛋器將材料翻鬆，將空氣混入。

- 再次放回冰格，重覆以上步驟 3 – 4 次即可。

- 放入冰格雪至硬身即成。

之前次次都係用電動打蛋器嚟翻鬆雪糕，今次偷懶，

唔想洗多件嘢，試吓人手用叉翻鬆，

估唔到效果都唔差喎！

Notes：
- 紅豆餡做法，請參閱《日式紅豆餡》。

- 豆漿必須逐少加入蛋糖混合物內，否則蛋黃容易過熱凝固。

- 煮材料時必須不停攪拌，以免煮熟蛋黃結成顆粒及黐底。

- 如果用雪糕機整的話，將淡忌廉直接倒入雪凍材料內混合，再倒入雪糕機製作即可。