屯門都有沙律菜賣

        呢個禮拜比較忙，無乜時間靜靜坐低寫 blog，嚟緊有空檔先慢慢出番啦！先講番上個禮拜六嘅事。

 

        做我哋呢行，星期六應該係最忙嘅一日，因為啲學生唔使返學，所以理應全日都會有學生，唔會好似平日咁成四、五點先開工。教咗足足廿年，居然呢段時間禮拜六可以全日專心量地同拍烏蠅，真係夠哂折墮！！不過折墮還折墮，我都唔會浪費咗啲時間，喺屋企做清潔、整包餅、買餸煮飯等，總之次次放嚫假都一定攰過返工，除非當日狀態唔好啦，咁就會用嚟休息攤抖囉！上個禮拜六就去咗 Winnie 屋企交收，之後順道去補充物資。去得到新墟，當然要去幫嚫吓 Facebook 網友早前介紹過嘅沙律菜檔啦！

 

 

呢檔沙律菜都有好多款式揀，不過咁就梗係無「華記」選擇

咁多啦！不過佢平過「華記」，只係 $21 磅，仲係乾水

菜，所以買一磅都超多，而且檔主仲會將外圍
唔靚嘅菜葉摘走哂先秤，真係夠哂貼心。

 
 

火箭菜聽就聽得多，食都真係第一次食，卒之都知道點解

佢又叫做芝麻菜，入口真係有種好香濃嘅芝麻味，

不過價錢唔平，呢度 1 安士盛惠 $9。

 

仲有買到 basil，不過呢樣就「華記」靚好多同抵好多喇！

同樣買 $9 / 1oz，但係枝莖又粗又硬，都好重秤，之前

去「華記」買 $10 一紮，多好多又靚好多呢！

 

 

 

 

 

當日已經食咗一餐油醋汁沙律伴煙三文魚，

之後禮拜一就用咗嚟整三文治。

 

 

 

 

 

禮拜二就用日式芝麻醬同 wasabi 嚟整咗個和風沙律。