涼瓜蘿蔔煮麵筋

        今個月居然有成四日要食齋，印象中好似係首次出現呢個情況。今日係觀音誕，我當然會食全齋啦！

 

        因為我習慣比較夜先食第三餐，通常都係夜晚十一、二點先食，無辦法啦，工作時間係咁，加上自己又住得遠，返到屋企先整嘢食，無可能會早囉！噚晚餐飯都係過咗子時先食，所以就要煮齋喇！

 

 

材料：
鹹酸菜
昆布
白蘿蔔
苦瓜
麵筋 (水筋)

香料：
桂皮
花椒
八角
月桂葉
辣椒乾
薑片

調味料：
鹽
糖
香菇粉

- 鹹酸菜用清水浸半個鐘，之後洗乾淨，瀝乾水份；昆布洗乾淨備用。

- 蘿蔔去頭尾，刨皮；苦瓜去蒂，開邊後去瓤；麵筋略沖洗。

- 將以上材料全部切件。

- 煲滾少量水，加少許白醋，將麵筋放入汆水，然後過冷河。

- 鍋內注入適量清水，加入蘿蔔、鹹酸菜、昆布，香料同香菇粉，煲滾後轉中慢火。

- 當蘿蔔煮至半腍後，加入苦瓜同麵筋。

- 苦瓜煮至適合腍度之後，就可以加適量糖及鹽調味。

 

 

大家想唔想像到個味道係點呢？係有少少鹹菜胡椒豬肚嘅風味哦！

因為有鹹酸菜、昆布同香菇粉嘅關係，所以特別鮮味，

如果唔講的話，真係估唔到原來係無落肉去煮呢！