大家都知我好少食肉，主要都係以素食為主，其實要我長期食全齋都絕對無乜問題，記得當年媽咪走嘅時候，就由當日起食足七七四十九日全齋，為媽咪做功德，當時完全唔覺得有任何問題，反而仲覺得乜咁快就食完四十九日齋嗱，或者可能係太傷心，根本對其他事物已經無乜感覺啦！
只要有人煮埋俾我食的話，食全齋對我嚟講其實真係無乜難度，但係要自己買餸煮飯的話，咁就真係難啲喇！點解咁講呢？身為廚房 CEO嘅你，每日嘅難題係乜呢？當然就係 “今晚食乜餸” 啦！！加上我份人又好奇怪，短期內都唔想食番同一樣餸，要次次唔同款式，就算幾好食嘅餸，我都最快要幾個月後先會重覆一次。喺咁嘅情況之下，唔食肉兼唔食五辛的話，可以選擇嘅都真係少好多，所以我久唔久都會食肉，費事諗菜式諗到頭都爆！！
近排都比較少食豬肉，而且突然間又好想食糖醋排骨，所以就買咗啲一字排嚟整。對我嚟講，呢次個糖醋排骨都夠哂破格，事關平時煮濃味餸菜我都係用急凍肉類，唔會用新鮮肉咁大嘥，點知今次又懵吓懵吓走去買新鮮排骨嚟整；正常應該用紹酒，但係懶就隨手拎起枝玫瑰露用就算；見到玫瑰露前面枝魚露，貪得意又落少少落去試吓，攪到完全都唔正宗！煮緊嘅時候又老人癡呆病發，邊煮邊試味，咁就出事喇！
睇住仲有兩個零鐘就過埋今日，都係要打爛個齋缽，頂！！
參考食譜：糖醋排骨菜飯
我星期一至五，一定是多菜少肉。其實食素都可以有好多選擇，我最近都成日煲素湯，一樣好飲。
回覆刪除係呀，我多數都係煲齋湯，好少煲肉湯。
刪除其實您都係無心之失，唔好太執着啦！
回覆刪除係囉，都係怪自己做事大意，唔小心！
刪除