沙茶黑椒芋頭栗子燜麵筋

        一向都鍾意食薯仔、芋頭、南瓜、番薯、麵條等高澱粉質食物，所以幾乎每個禮拜都梗有其中一樣坐陣我三餐之中。今晚就整咗我好耐無煮嘅芋頭，又試攪攪新意思，試吓用黑椒醬同沙茶醬嚟燜。

 

 

 

材料：
芋頭
栗子
炸麵筋
乾蔥頭
蒜頭
月桂葉

調味料：
黑椒醬
沙茶醬
香菇粉
紹酒

- 芋頭去皮後切件，加適量油拌勻，放上烤盤上。

- 放入已預熱至 200 ℃ 嘅焗爐內，用烤焗模式 (grill) 焗 15 分鐘。

- 將芋頭反轉另一面再焗多 10 分鐘至表面金黃。

- 栗子去殼、去衣；炸麵筋汆水後瀝乾。

- 乾蔥頭去衣後開邊；蒜頭去衣後用刀略拍散。

- 燒熱油，放蔥頭、蒜頭及月桂葉爆香，之後加入黑椒醬及沙茶醬。

- 加入芋頭同栗子兜炒，灒酒，加適量水及香菇粉，煮滾後轉中慢火繼續燜。

 

- 當芋頭同栗子都燜腍之後，就加埋炸麵筋入內燜至入味及汁料收乾

 

 

 

呢碟燜芋頭除咗用上惹味醬料之外，仲落咗勁多

乾蔥頭同蒜頭，想唔好食都難囉！

 

栗子同芋頭好食就唔使講啦，但其實

最正係啲麵筋，因為索哂味嘛！

 

 

 

 

Notes：
- 如果無焗爐的話，可以直接用油炸方法將芋頭炸至金黃，可避免煮成芋泥。

- 栗子去殼、去衣方法，可參考《栗子去殼及去衣方法》。

- 若乾蔥頭並非太大粒的話，可原粒燜煮而毋須開邊。