試做甘酒

        有無聽過甘酒呢樣嘢？我之前都唔知有呢樣嘢，都係睇《不使用砂糖的自然派 sweet 甜點》一書介紹先知！書內所有食譜都唔用雞蛋同奶類製品之外，就連精製糖同蜂蜜都唔會用，甘酒就係其中一種書中推介嘅天然甜味料。

        其實書中都有教到點樣自製甘酒，但我一直都無整到，係因為呢本食譜內的材料份量，好多時都用容量而唔用重量去做單位，例如一杯麵粉、半杯油、1/4 杯糖等，我自己就好唔鍾意呢種計算用料嘅方法，覺得準成度唔夠準確，而且我自己又無 “杯”，所以一直都無諗過試整。

        直到最近，喺 Youtube 度睇番日本型仔廚師啲舊片，發覺原來佢都有分享點整甘酒，不單只有 video 跟住學，清楚睇到整過製作過程同成品樣貌之外，最重要係用「克」去表達用量，對我嚟講就 user friendly 好多，所以我都起心去試整喇！

甘酒原本係用米麴發酵而成，但係米麴唔易買到，就問

型仔廚師用紅麴代替得唔得，佢話佢自己未試過，

不過照計都應該得，因為都係麴菌，所以我就

買咗包紅麴嚟整，結果係 …… 成功！！

呢個係將剛煮好嘅飯混入紅麴，未發酵之前嘅狀態。

發酵好嘅成品其實同中國傳統釀造糯米酒時剩底嘅紅糟都差唔多，

原本味道都應該唔錯，唔會太甜，不過最衰就係紅麴用得

多時就會有啲苦澀味囉！等我搵到米麴時再整多次，

到時先再同大家分享食譜啦。

朝早食第一餐時，加一大羹紅麴甘酒落麥皮度

一齊食，真係可以完全唔使落糖呀！

我仲用咗佢嚟代替糖去整麵㖭！麵包一樣發酵得到，

食落口又唔覺有明顯甜味。用紅麴去整甘酒另一

唔好處，就係乜鬼都會變成紅色囉！！