雪耳栗子姬松茸湯

        近排加入咗 Facebook「素食青年」群組，原來有好多後生仔女都係食素嘅，當中自然有啲係因為宗教原因而食齋啦！有啲就係為咗個人健康而食素，有啲就更加無私，係為咗呢個地球環境而成為素食者，真係值得敬佩同加許！

        喺群組裡面，大家都會分享一下自己嘅素食心得同 “傑作”，又會分享自己到過嘅素食餐廳，介紹菜式、環境及水準，真係知多好多嘢。

        今晚又煲齋湯喇，呢次用料好豐富，細食嘅朋友淨係飲湯同食湯渣都已經夠哂飽！！

 

 

材料：
紅蘿蔔
栗子
雪耳
姬松茸
紅棗
杞子
淮山
茨實
百合

- 紅蘿蔔刨皮後用滾刀切件；栗子去殼、去衣後略沖洗。

- 雪耳用清水浸發後洗淨，剪去硬蒂，之後汆水；姬松茸洗淨，備用。

- 紅棗用暖水浸軟、去核；杞子用水略洗；其餘藥材用暖水浸一個鐘後洗淨。

- 所有材料凍水落煲，依照一般煲湯方法煲好後加鹽調味。

有栗子、紅蘿蔔同紅棗，啖湯一定夠哂甜啦！

 

 

 

 

Notes：
- 紅蘿蔔同栗子凍水落煲，可以釋出更多甜味。

- 姬松茸洗淨後直接放入用嚟煲湯嘅凍水內浸軟，令到湯水更加香濃。

- 可參考《栗子去殼及去衣方法》。