烤雜菜沙律

        老友 Louisa 送咗隻「Le Creuset」grill pan 俾我咁耐，用過幾多次都真係十隻手指數得出，皆因隻 pan 雖然細細隻，但真係好重，而且因為我少食香口煎炸食物，所以好少用佢嚟煎烤食物，惡性循環之下，到依家隻 pan 都仲未完全 “油潤”，煎嘢食都仲係會黐，之後洗又艱辛、又重、又煩，所以已經好耐不見天日喇！

 

        直到上星期見到 blog 友芹菜整咗個烤茄子沙律，我自己就從來都未試個呢種食法，覺得好吸引，更重要嘅係，原來唔使落油都可以烤到茄子兼唔黐底，真係咁神奇！？一如要拎番隻 pan 出嚟試吓至得。

 

哈，果然真係唔黐喎！烤好哂茄子、翠玉瓜同雞髀菇之後，

加啲 balsamic vinegar、芥末籽醬同日式芝麻醬，

再加埋黑橄欖同粟米粒，撈勻就食得喇！

烤緊嗰陣時都幾好玩，揸住個不鏽鋼鉗將雜菜翻轉時，

好有戶外花園 BBQ feel 哦，呵呵！！ ^^

我仲整埋紅莓鄉村包伴食㖭！