新年假期時，Ernest 一家人去咗日本過年，除咗吃喝玩樂之外，Ernest 媽咪亦趁機入貨，講緊嘅當然係烘焙用品及食材啦！我都有幸可以分享到呢！
全部都係日文，真係全靠看圖辨認哦！
呢兩包係薑粉同南瓜粉，可以用嚟整麵包同餅乾。
呢盒就係傳說中嘅白神山酵母喇！真係要好好咁利用佢，唔係就嘥料喇！
用咗仙姐喺《頭條日報》個白麵包多士食譜嚟試吓個酵母威力，
你哋覺得點呢？
摵開個包包俾大家欣賞吓啦！
仲要多謝 Ernest 指定要買俾我嘅薑糖呀！
與 blog 友交流煮食心得，分享生活點滴。
2013年2月26日星期二
法式貝殼蛋糕 (蜂蜜綠茶味) Madeleine (Honey & Green Tea Flavor)
跟住到蜂蜜綠茶貝殼蛋糕出場。
材料：
低筋麵粉 50 克
綠茶粉 1 茶匙
泡打粉 1/2 茶匙
雞蛋 1 隻
糖霜 30 克
蜂蜜 20 克
橄欖油 50 克
- 麵粉、綠茶粉與泡打粉混合過篩 3 次；雞蛋拂打成蛋液。
- 將糖霜加入蛋液內，用打蛋器拂打至糖完全溶解後再拌入蜂蜜。
- 粉類加入蛋液內攪拌均勻，跟住加入橄欖油，攪拌成柔滑麵糊。
- 用保鮮紙包好，放入雪櫃雪至稠身。
- 蛋糕模搽油，然後篩入高筋麵粉直至完全覆蓋整個模，之後將多餘嘅麵粉倒出。
- 將蛋糕模放入雪櫃雪凍 10 分鐘；等候時將麵糊放入已放 1 厘米唧嘴嘅唧袋內。
- 將麵糊唧入模內至 8 分滿，放入已預熱至 200 ℃ 嘅焗爐內，焗 7 分鐘。
- 將爐溫降至 170 ℃，再焗多 8 分鐘即可。
- 出爐後趁熱脫模，放涼後即可享用。
以上材料份量可做 4 厘米 X 7厘米蛋糕 10 個。
如果齋睇外表顏色，真係唔會知道係綠茶味囉！
Winnie 仲以為係朱古力味呢！
切開裡面就睇到好靚嘅綠色喇，而且綠茶味仲好香濃㖭，
Miss Cheng 都讚好味呀！
法式貝殼蛋糕 (咖啡味) Madeleine (Coffee Flavor)
趁出門前有小小時間，打番咖啡貝殼蛋糕個食譜先。
材料：
低筋麵粉 50 克
咖啡粉 1 茶匙
泡打粉 1/2 茶匙
雞蛋 1 隻
糖霜 50 克
咖啡濃縮液 1 茶匙
橄欖油 50 克
- 麵粉、咖啡粉與泡打粉混合過篩 3 次；雞蛋拂打成蛋液。
- 將糖霜加入蛋液內，用打蛋器拂打至糖完全溶解，之後拌入咖啡濃縮液。
- 粉類加入蛋液內攪拌均勻，再將橄欖油加入，攪拌成柔滑麵糊。
- 用保鮮紙包好，放入雪櫃雪至稠身。
- 蛋糕模搽油，然後篩入高筋麵粉直至完全覆蓋整個模，之後將多餘嘅麵粉倒出。
- 將蛋糕模放入雪櫃雪凍 10 分鐘；等候時將麵糊放入已放 1 厘米唧嘴嘅唧袋內。
- 將麵糊唧入模內至 8 分滿，放入已預熱至 200 ℃ 嘅焗爐內，焗 7 分鐘。
- 將爐溫降至 170 ℃，再焗多 8 分鐘即可。
- 出爐後趁熱脫模，放涼後即可享用。
以上材料份量可做 4 厘米 X 7厘米蛋糕 10 個。
唉，始終都有一、兩件整得唔靚仔，可能搽得太多油，
聚集喺個模最深位置，再整時要多多留意至得！
自從用咗濃縮咖啡液之後，整嚫咖啡味嘅嘢都香濃好多，
咖啡味出好多喇！
Notes：
- 咖啡粉宜選用 espresso，否則咖啡味唔會太出。
- 咖啡濃縮液製法，請參閱《自製咖啡濃縮液》。
2013年2月25日星期一
2013年2月24日星期日
無蛋朱古力蛋糕 No Egg Chocolate Cake
材料：
低筋麵粉 100 克
可可粉 15 克
梳打粉 1 克
泡打粉 3 克
橄欖油 50 克
糖 80 克
鹽 2 克
椰漿 160 克
入爐朱古力粒 30 克
- 所有粉類混合過篩 3 次。
- 橄欖油、糖同鹽攪拌均勻，之後將粉類篩入，用膠刮邊切邊混合。
- 拌入椰漿，徹底攪拌均勻後再加入朱古力粒，拌勻。
- 將麵糊倒入已墊牛油紙嘅蛋糕模內，放入已預熱至 180 ℃ 嘅焗爐內，焗約 30 – 35 分鐘。
- 出爐後脫模放架上攤凍，切件享用。
以上材料份量可做直徑 14 厘米蛋糕 1 個。
食譜參考自陳明裡嘅《無奶蛋素西點》。
因為蛋糕本身個面都有少少裂，所以脫模時手快快整爛咗個面都唔知！！
咪睇只係用得咁少可可粉呀，朱古力味都好濃呀，而且質地濕潤，
食落感覺特別香濃，但係椰子味就一啲都食唔到！
Notes：
- 原食譜材料及用量：高筋麵粉；葡萄籽油 70 克；糖 110 克；入爐朱古力粒 50 克。
與 blog 友飯聚
寫咗 blog 都已經有好幾年時間，噚日都係第一次約 blog 友出嚟見面食飯。
同 blog 友緊張大師-小女人都只係識咗大約半年度，但係大家就好似已經係好熟嘅老朋友咁，不但分享煮食烘焙，就連生活鎖事都會傾到，更重要嘅係，我哋大家都係佛教徒之餘，仲係主要以食素為主，所以噚日我哋就約埋一齊去食素食自助餐喇！
同 blog 友緊張大師-小女人都只係識咗大約半年度，但係大家就好似已經係好熟嘅老朋友咁，不但分享煮食烘焙，就連生活鎖事都會傾到，更重要嘅係，我哋大家都係佛教徒之餘，仲係主要以食素為主，所以噚日我哋就約埋一齊去食素食自助餐喇！
緊張大師-小女人真係客氣，專登整咗個芝麻雪芳蛋糕俾我，
蛋糕又靚又好食，手勢唔錯哦！
唔單只有蛋糕，仲有廚具㖭呀！佢話啱用就即管開聲，唔使怕唔好意思，
反正都係要送人喎。最後就揀咗呢個不銹鋼漏斗同小刀一把。好彩
我都一早準備定見面禮，如果唔係就真係唔好意思喇！
小女人，好多謝妳呀！！
香茅咖喱雞
上次整完冬蔭功之後，用剩咗啲香茅、檸檬葉同青檸放雪櫃，都要盡快用咗佢。呢個時候，我就走去揭吓本娘惹食譜，睇吓有邊個食譜會用得著呢幾樣嘢，俾我發現到有個椰汁咖喱雞真係會用到香茅、檸檬葉，就連青檸都加埋落咖喱，哈，真係天助我也！！於是就參考咗佢部份用料同煮法，用咗現成港式咖喱醬，/再結合自己嘅做法，就做出呢味香茅咖喱雞喇！
材料：
雞
薯仔
洋蔥
番茄
椰漿
椰絲
醃料：
紹酒
生抽
蠔油
香料：
芫荽籽粉
香茅
南薑
咖喱醬
檸檬葉
調味料：
鹽
糖
魚露
青檸汁
辣椒油
- 將雞洗乾淨，切件後用醃料醃好；薯仔刨皮後切件，小部份切碎，將大件薯仔略炸至金黃。
- 洋蔥去衣後切件，留起小部份切碎；番茄洗淨，去蒂後切件。
- 香茅洗淨後用刀拍鬆，然後切小段；南薑去皮後切片。
- 燒熱鑊，放入芫荽籽粉，白鑊烘香，盛起；椰絲用白鑊炒至金黃色。
- 燒熱油，除檸檬葉外，將其餘香料及洋蔥碎全部爆香。
- 加入雞件兜炒至完全沾上香料後，將薯仔及洋蔥落鑊繼續兜抄一陣間。
- 倒入椰漿及適量水，兜炒均勻後，轉中慢火燜至材料全熟，其間不時兜炒。
- 將番茄、椰絲及調味料落鑊，不斷兜炒至咖喱汁變得濃稠即可上碟。
加咗香茅、南薑同檸檬葉一齊煮咖喱，味道帶點東南亞風味。
上碟後再加多少少辣椒油，更加香濃惹味哦！！
Notes：
- 切碎薯仔會比較容易煮至溶化，可令咖喱更加濃稠；而炸過嘅薯仔則比較硬身，無咁易煮爛。
- 洋蔥碎除作為香料用之外，亦因為比較容易煮溶，可令咖喱更加香甜。
- 炒椰絲時必須用慢火，否則好易炒燶。
- 番茄最好最後加入，否則會煮得過腍而且煮爛。
2013年2月17日星期日
法式貝殼蛋糕 Madeleine
今日算係好得閒，的起心肝試吓用個貝殼模整蛋糕，原來整貝殼蛋糕都好簡單、好好玩哦！
因為怕失敗，所以噚晚已經睇定哂手頭上所有 madeleine 食譜，原本已經敲定用其中一個食譜，但係到實戰時真係有差池，當然要即刻急謀對策啦！即刻諗番哂噚晚睇過嘅食譜，之後剩低落嚟嗰份麵糊就立刻有改善喇，仲做到外脆內軟㖭呀！ 所以最終都係集合咗幾個食譜做出嚟呢！
心水清嘅朋友都應該會留意到，凡嚫用溶牛油整嘅嘢我都一定會用液體油代替，慳功夫之餘，之後清潔工作都易好多，仲可以無咗我唔鍾意嘅臊味㖭！一般食譜都會用到檸檬皮茸，但係我唔想為咗嗰少少檸檬皮又走去買個檸檬，反正屋企有橙，就用橙皮茸代替算數，焗出嚟有勁香橙味，一樣咁正呀！
心水清嘅朋友都應該會留意到，凡嚫用溶牛油整嘅嘢我都一定會用液體油代替，慳功夫之餘，之後清潔工作都易好多，仲可以無咗我唔鍾意嘅臊味㖭！一般食譜都會用到檸檬皮茸，但係我唔想為咗嗰少少檸檬皮又走去買個檸檬，反正屋企有橙，就用橙皮茸代替算數，焗出嚟有勁香橙味，一樣咁正呀！
2013年2月15日星期五
2013年2月13日星期三
玻璃曲奇 Stained Glass Cookie
上年新年時我整咗燕麥紅莓朱古力曲奇帶返去中心度請 Miss Cheng、同事及學生食，當係新春見面禮，點知原來我唔記得咗我其中一個學生係對朱古力敏感，所以佢無得食呀！
我應承佢再整曲奇時就唔會落朱古力，等佢都可以一齊分享，佢仲話不如下次整個星形曲奇呀！嗱，Daryl，雖然我成日都老人癡呆，但我記得你講過呢句㗎，所以今年就為你而整星形曲奇呀！！
之前同 Winnie 整開嗰個食譜唔係咁掂，油脂份量大多，麵糰超軟身，即使已經放入冰格雪硬，到拎出嚟整時都會好快軟身，勁難處理，所以今次就用自己嘅方法去整，效果當然好好多啦，起碼無咁 "哩 hea" 先啦！！
我應承佢再整曲奇時就唔會落朱古力，等佢都可以一齊分享，佢仲話不如下次整個星形曲奇呀！嗱，Daryl，雖然我成日都老人癡呆，但我記得你講過呢句㗎，所以今年就為你而整星形曲奇呀！！之前同 Winnie 整開嗰個食譜唔係咁掂，油脂份量大多，麵糰超軟身，即使已經放入冰格雪硬，到拎出嚟整時都會好快軟身，勁難處理，所以今次就用自己嘅方法去整，效果當然好好多啦，起碼無咁 "哩 hea" 先啦！！
材料：
低筋麵粉 350 克
泡打粉 2 茶匙
牛油 100 克
糖 80 克
糖膠 3 湯匙
雞蛋 1 隻
果汁硬糖 適量
- 麵粉與泡打粉均勻混合，放入凍牛油，用手指將牛油捽入麵粉內成麵包糠狀。
- 加糖拌勻，之後將雞蛋拂打成蛋液，連同糖膠一齊加入，用刀切拌混合。
- 然後輕手將之搓成麵糰，平均分割成 4 份，分別用保鮮紙包好，放入雪櫃內雪 1 個鐘。
- 拎出一個麵糰，攤開保鮮紙，再喺上面鋪多張保鮮紙，之後用擀麵棍將麵糰擀薄成餅皮。
- 先用一個較大嘅模將餅皮 cut 出，放上已墊入爐防黏蓆嘅烤盤上。
- 之後再用一個較細嘅模放喺餅皮中央 cut 出形狀，將中間塊麵皮移走，做成中空狀。
- 將剩出嚟嘅麵皮重新搓成糰，包好後放入雪櫃雪凍，拎出另一嚿麵糰重覆以上步驟。
- 放入已預熱至 170 ℃ 嘅焗爐內焗 6 分鐘，拎出烤盤，將已略切碎嘅硬糖放入中空位置。
- 再次入爐，用150 ℃ 焗多 6 分鐘即可，出爐後曲奇直接於烤盤上放涼數分鐘。
- 當糖完全變硬時就可以移至架上攤凍。
老實講，其實我係好憎整呢款曲奇，超多功夫兼勁麻煩，今次仲無咗 Winnie
幫手一齊整㖭！不過為咗氹小朋友同學生開心，無所謂啦！
橙味嘅心形曲奇係送俾女仔嘅，而提子味星形就送俾男仔，
圓形檸檬味就個個都有份！
Notes：
- 想方便的話，可以將製作麵糰步驟用食物處理器代勞。
- 麵糰雪凍時間需視乎天氣氣溫而增加，確保麵糰保持冰凍，不易軟化。
- 將麵糰分割成多份分別使用，好處係唔使將全部麵糰同時置於室溫而被軟化。
- 由於已成中空狀嘅麵皮非常容易變形，所以最好將麵皮移至烤盤後再 cut 成中空。
- 切忌用牛油紙代替入爐防黏蓆，因為當硬糖溶化後再凝固變硬時會黐實牛油紙。
- 放入糖之後必須將爐溫調低，以免溶糖過熱產生氣泡。
- 出爐後若發覺有溶糖唔均勻分佈的話，可趁熱用竹簽將糖推開，之後再入爐焗多 1 - 2 分鐘，
表面就可以再次變得平滑。
2013年2月12日星期二
冬蔭功 Tom Yum Khon
今晚自己一個食，而且又難得唔使教琴，所以完全無 mood 整呢樣整嗰樣，加上早幾日又要返工、又要預備過年嘅嘢，兩日夾埋都瞓唔夠十個鐘，今日都係疊埋心水休息罷喇！
晚餐除咗蒸臘味糯米飯外，仲想整番個簡單兼少功夫嘅湯，煮冬蔭功就最好不過喇！
材料：
蝦 2 隻
草菇 適量
番茄 1 個
指天椒 3 隻
南薑 1 小塊
香茅 3 枝
青檸 4 個
檸檬葉 數片
清雞湯 500 毫升
水 500 毫升
魚露 適量
糖 適量
- 蝦洗乾淨，剪去腳及觸鬚、挑腸；草菇洗淨後開邊汆水；番茄洗淨，去蒂、切件。
- 指天椒洗乾淨、去蒂切粗粒；南薑去皮；香茅根部用刀略拍鬆；青檸榨汁；檸檬葉洗淨備用。
- 先煲滾水及清雞湯，之後加入香茅、南薑同指天椒煲一陣間至出味，再加入青檸汁、魚露及糖
調味。
- 草菇、番茄放入湯內，翻滾後將蝦放入煮熟。
- 最後加入檸檬葉煲多一陣就完成。
完全根據自己口味而調味，當然各種味道都配合得啱啱好啦！
食糯米飯時滯滯哋，飲啖酸酸辣辣嘅湯就最啱喇！
Notes：
- 所有材料份量可根據自己口味而調整。
- 可用淨雞湯或清水，甚至可以自行調節兩者比例。
- 如果唔食得太辣嘅朋友，1 隻指天椒已經足夠。
訂閱：
文章 (Atom)