法式貝殼蛋糕 Madeleine

        今日算係好得閒，的起心肝試吓用個貝殼模整蛋糕，原來整貝殼蛋糕都好簡單、好好玩哦！

        因為怕失敗，所以噚晚已經睇定哂手頭上所有 madeleine 食譜，原本已經敲定用其中一個食譜，但係到實戰時真係有差池，當然要即刻急謀對策啦！即刻諗番哂噚晚睇過嘅食譜，之後剩低落嚟嗰份麵糊就立刻有改善喇，仲做到外脆內軟㖭呀！ 所以最終都係集合咗幾個食譜做出嚟呢！

       心水清嘅朋友都應該會留意到，凡嚫用溶牛油整嘅嘢我都一定會用液體油代替，慳功夫之餘，之後清潔工作都易好多，仲可以無咗我唔鍾意嘅臊味㖭！一般食譜都會用到檸檬皮茸，但係我唔想為咗嗰少少檸檬皮又走去買個檸檬，反正屋企有橙，就用橙皮茸代替算數，焗出嚟有勁香橙味，一樣咁正呀！

材料：
低筋麵粉      50 克
泡打粉         1/2 茶匙
雞蛋             1 隻
糖霜             50 克
橙皮茸         1 個橙份量
橄欖油         50 克

 

- 麵粉與泡打粉混合過篩 3 次；雞蛋拂打成蛋液。

- 將糖霜加入蛋液內，用打蛋器拂打至糖完全溶解。

- 橙皮茸加入粉類拌勻，之後加入蛋液內攪拌均勻。

- 最後加油，攪拌成柔滑麵糊。

- 用保鮮紙包好，放入雪櫃雪至稠身。

- 蛋糕模搽油，然後篩入高筋麵粉直至完全覆蓋整個模，之後將多餘嘅麵粉倒出。

- 將蛋糕模放入雪櫃雪凍 10 分鐘；等候時將麵糊放入已放 1 厘米唧嘴嘅唧袋內。

- 將麵糊唧入模內至 8 分滿，放入已預熱至 200 ℃ 嘅焗爐內，焗 7 分鐘。

- 將爐溫降至 170 ℃，再焗多 8 分鐘即可。

- 出爐後趁熱脫模，放涼後即可享用。

以上材料份量可做 4 厘米 X 7厘米蛋糕 10 個。
 

後面嗰幾個蛋糕係第一批出品，發得唔係咁好，背面較平，

前面第二批焗時即刻加大火力，當焗到有肚臍後就

立即降低爐火繼續焗至熟，效果好好多哦！

 

右邊蛋糕係第一批，蛋糕模上粉時貪方便，就咁用匙羹將麵粉

勺入模內，結果分佈得唔平均，攪到件件蛋糕表面都有

一小堆粉喺度！之後唔敢懶喇，即刻用番個篩灑粉，

問題即刻有改善，係咪靚仔好多呢！

Notes：

- 麵糊雪凍至方便用唧袋唧出嘅稠度即可，我自己就雪咗 3 個鐘。

 

- 雪過嘅麵糊除可以方便使用唧袋外，入爐焗時亦會發得更加好。

- 若用牛油整的話，需預先用熱水座溶，然後加入麵糊內，而搽模用嘅牛油則室溫放軟
  即可。