2013年2月17日星期日

法式貝殼蛋糕 Madeleine

        今日算係好得閒,的起心肝試吓用個貝殼模整蛋糕,原來整貝殼蛋糕都好簡單、好好玩哦!

        因為怕失敗,所以噚晚已經睇定哂手頭上所有 madeleine 食譜,原本已經敲定用其中一個食譜,但係到實戰時真係有差池,當然要即刻急謀對策啦!即刻諗番哂噚晚睇過嘅食譜,之後剩低落嗰份麵糊就立刻有改善喇,仲做到外脆內軟㖭呀! 所以最終都係集合咗幾個食譜做出嚟呢!

       心水清嘅朋友都應該會留意到,凡嚫用溶牛油整嘢我都一定會用液體油代替,慳功夫之餘,之後清潔工作都易好多,仲可以無咗我唔鍾意嘅臊味㖭!一般食譜都會用到檸檬皮茸,但係我唔想為嗰少少檸檬皮又走去買個檸檬,反正屋企有橙,就用橙皮茸代替算數,焗出嚟有勁香橙味,一樣咁正呀!



材料:
低筋麵粉      50
泡打粉         1/2 茶匙
雞蛋             1
糖霜             50
橙皮茸         1 個橙份量
橄欖油         50
 
- 麵粉與泡打粉混合過篩 3 次;雞蛋拂打成蛋液。

- 將糖霜加入蛋液內,用打蛋器拂打至糖完全溶解。

- 橙皮茸加入粉類拌勻,之後加入蛋液內攪拌均勻。

-
最後加油,攪拌成柔滑麵糊。

-
用保鮮紙包好,放入雪櫃雪至稠身。

-
蛋糕模搽油,然後篩入高筋麵粉直至完全覆蓋整個模,之後將多餘嘅麵粉倒出。

-
將蛋糕模放入雪櫃雪凍 10 分鐘;等候時將麵糊放入已放 1 厘米唧嘴嘅唧袋內。

-
將麵糊唧入模內至 8 分滿,放入已預熱至 200 嘅焗爐內,焗 7 分鐘。

-
將爐溫降至 170 ,再焗多 8 分鐘即可。

-
出爐後趁熱脫模,放涼後即可享用。

以上材料份量可做 4 X 7 10 個。
 

後面嗰幾個蛋糕係第一批出品,發得唔係咁好,背面較平,

前面第二批焗時即刻加大火力,當焗到有肚臍後
立即降低爐火繼續焗至熟,效果好好多哦!


 
右邊蛋糕係第一批,蛋糕模上粉時貪方便,就咁用匙羹將麵粉
勺入模內,結果分佈得唔平均,攪到件件蛋糕表面都有
一小堆粉喺度!之後唔敢懶喇,即刻用番個篩灑粉,
問題即刻有改善,係咪靚仔好多呢!





Notes
- 麵糊雪凍至方便用唧袋唧出嘅稠度即可,我自己就雪咗 3 個鐘。
 
- 雪過嘅麵糊除可以方便使用唧袋外,入爐焗時亦會發得更加好。

-
若用牛油整的話,需預先用熱水座溶,然後加入麵糊內,而搽模用
嘅牛油則室溫放軟

  即可。
 
 
 

5 則留言:

  1. 好靚靚瑪達蓮~~~
    [版主回覆02/18/2013 14:35:29]第一次整就已經整到咁上下,我已經好開心㗎喇!

    回覆刪除
  2. Madeleine通常都係用牛油整,
    吃時充滿牛油香...
    好正呢! 哈!
    [版主回覆02/18/2013 16:18:04]係呀,但我懶兼唔好牛油嘛!
    但係唔知點解,到夜晚食時已經完全唔係嗰回事,好乾爭爭呀!

    回覆刪除
  3. 緊張大師-小女人2013年2月18日 下午7:09

    你整得好靚添起碼無豆皮,我整咁多次都香香公主,即係失敗呀,係好容易無難度但出來就豆皮,點算
    [版主回覆02/22/2013 16:21:30]又放唔入!?做乜買個爐咁細呀!?
    [緊張大師-小女人回覆02/21/2013 16:55:30]要等一下先可以了,我買了新焗爐比早前那個細,個貝殼模放唔入
    [版主回覆02/18/2013 19:54:35]咁妳又試試我呢個方法,睇睇有冇改善啦!

    回覆刪除
  4. 呢隻蛋糕真係易整,不過我好多時都無雪就焗
    [版主回覆02/20/2013 18:21:03]我又唔敢冒險唔雪喎,送禮嘛,萬一出事就弊喇!
    咁就用番唧袋整啦!
    [Mrs. Benz 班太回覆02/20/2013 17:11:40]我通常都係即日食, 未試過隔夜喎. 不過好肯定用唧袋係方便同易控制
    [版主回覆02/20/2013 16:08:31]咁有冇問題呢?嚟緊我想一次過整好多件送禮,本身個模已經一次只可焗 5 個,之後仲要仲要雪,會好嘥時間呀!同埋係咪一定要用唧袋呢?就咁將麵糊勺入模會唔會有影響呢?

    回覆刪除
  5. 我未整個呢個...真係咁易?????????
    [版主回覆02/22/2013 16:20:55]易呀,妳睇我第一次實驗都似模似樣就知啦!妳買咗咁多模,應該實有佢份啩,快啲整啦!

    回覆刪除