2009年3月31日星期二

甜酸雞柳

        今日煮呢個餸酸酸哋、甜甜哋,特別醒胃。




材料:
雞柳
甜酸青瓜
紅蘿蔔
罐頭菠蘿
青椒 (燈籠椒)


醃料:


生抽
紹酒
雞粉
粟粉


調味料:
雞粉


芡汁料:
粟粉
菠蘿糖水


        雞柳洗淨後用抹手紙索乾水,用醃料醃好備用;紅蘿蔔去皮切薄片備用;青瓜、菠蘿同青椒一齊切成細塊。


         燒熱油,先將青椒炒至半熟後盛起,跟住炒雞柳,轉色後就同樣盛起備用。之後炒紅蘿蔔,加少少菠蘿糖水,冚鑊蓋煮至稍腍後,就將青瓜、菠蘿、青椒同雞柳回鑊,加入調味料,煮多一陣至略為收汁就完成喇。如果覺得水太多,就可以用番菠蘿糖水加粟粉嚟埋個薄芡,效果都幾好。


香芹番茄豆腐魚湯


材料:
剝皮魚 (大眼雞)
硬豆腐
番茄
中芹
薑片


        將魚先洗乾淨,然後燒熱油鑊,落薑片,再放魚落鑊,煎至兩邊金黃色;豆腐洗淨、切大粒;番茄洗乾淨後去蒂、切件備用;中芹洗淨、切細段。


        煲滾水,先將已煎過嘅魚放落煲內,滾到湯變奶白色時,就加入豆腐同番茄,再煲一陣,最後加入中芹,滾多幾分鐘就有得飲,可加鹽調味。


        魚湯特別鮮甜,加埋番茄嘅少少酸味及中芹獨有嘅清香非常好飲。


2009年3月28日星期六

炒土豆絲

        記得以前有次同媽咪上深圳推拿後,去咗一間新疆菜館度食嘢,個大廚都係新疆人嚟 o架!所以啲菜式都非常正宗。


        媽咪叫咗個炒土豆絲,當時我都唔知係咩嚟,後來佢話俾我聽原來土豆即係薯仔,所以炒土豆絲其實即係炒薯絲。果陣我都係第一次知道薯仔原來可以用嚟咁樣炒,因為平時多數都係用嚟炆或煮番茄。



材料:
薯仔
辣椒乾


調味料:


雞粉
麻油
鎮江醋
孜然粉


        薯仔洗乾淨,去皮後切成薯絲,之後要將薯絲浸水,一來等佢唔駛變色,二來可以將部份澱粉質浸咗出嚟,咁炒出嘅薯絲就會更加爽口,炒之前記得先瀝乾水;辣椒乾切粒備用。


        先將辣椒乾爆香,然後加入薯絲,炒至軟身後就加調味料,鎮江醋只係落少少嚟吊味,最後灑上少少麻油,拌勻後就可以上碟。


香橙燕麥法包

        好耐都無Market Place by Jason度買麵包食 lu,星期四喺大角嘴上堂前,專登行過去朗豪坊間Market Place by Jason 買麵包,今次就揀咗呢個香橙燕麥法包嚟試。



        麵包好重手,知道裡面一定足料,而且聞到都好香,但係就唔知係乜嘢香料味。除咗面頭舖滿燕麥片之外,切開裡面仲見到有果肉。



        裡面除有提子同橙皮乾之外,仲有啲果仁 o添!所以食落除咗有果香之外,仲有果仁嘅香味同 "口感"。


        麵包本身果 texture幾好,軟硬度適中,唔會太軟、又唔會太硬,個皮又唔會好似 baguette 咁硬。之但係有一種好特別嘅味道我唔識點去形容,就好似食緊咸占餅咁嘅鹹香感覺,幾特別,有果甜又有鹹香,唔通佢好似咸占餅咁落咗南乳?


2009年3月27日星期五

木瓜素煙鵝


材料:
木瓜
素煙鵝
薑茸


調味料:

鮮醬油



        素煙鵝其實係豆類製品,類似腐皮,內裡加入冬菇同調味。


 


        木瓜去皮、去瓤,然後切件備用。素煙鵝放油鑊內略煎香,盛起備用。



        煎到兩面都金黃色嘅素煙鵝幾靚!


        燒熱油鑊,先爆香薑茸,然後落木瓜炒兩炒,加入調味料後,將素煙鵝回鑊與木瓜同煮,由於兩樣材料都已經係熟食,所以唔駛煮太耐,否則木瓜會煮得過熟而變成木瓜蓉。


甜酸青瓜

        星期一果日因為要準備整他他汁嘅關係,所以醃啲甜酸青瓜,今晚就唔駛煮就即刻有得食。



材料:
溫室青瓜


醃料:
白醋
砂糖
凍滾水


        青瓜洗乾淨後開邊去瓤、切成細段,灑上鹽醃數分鐘,迫出多餘水份,之後立即沖水,洗去所有鹽,最後用凍滾水沖一沖 ( 咁樣會衛生啲,食得安心啲 ),搾乾水份備用;將砂糖同白醋混合,直至所有糖完全溶解 (可加入少少熱水幫助溶糖 ),之後加入適量凍滾水拌勻,就可以放青瓜落去醃。


        最好醃多幾日,等佢可以入味啲。醃料嘅用量,可因應自己口味而調整,所以最好喺加入凍滾水後先試一試味,然後調出最合適自己口味嘅甜酸度。食用時可伴以英式芥辣,另有一番風味。


        青瓜記緊要去瓤,之後用鹽醃幾分鐘,過水後一定要搾乾水份,咁就一定會又爽又脆,今晚我食條條青瓜都脆到 "卜卜" 聲。


        記得細個果陣,去嚫舅母屋企食飯,好多時都會有碟酸青瓜炒雞柳,唔知點解,我由細到大都好記得果隻味道,好想再食番一模一樣嘅酸青瓜。記憶當中媽咪又好少煮呢個餸,所以今次反而有機會自己炮製,都好開心呀,因為果味道都好接近舅母整果啲呀!


台北自遊行 (手信篇)

        收人哋手信就收得多喇,今次去台灣輪到我買番俾人啦。



        呢個係西門町一間滷水專門店,叫做「老天祿」,因為我即時買過嚟食,覺得味道唔錯,所以我同 Winnie 都買咗滷水海帶返嚟俾屋企人食,佢哋仲有滷水鴨舌、豆腐等等


 



        我諗你哋都認得呢兩樣嘢係喺邊度買啦!無錯,咪就係西門町果間「果風小舖」囉!呢,仲有安全套朱古力賣果間呢!


 



        呢包衛生巾綿花糖係買俾 Lily 嘅,因為佢係女仔嘛,實用啦!


 



        樽假「曼秀雷敦」就自己食嘅。我打開過嚟睇,聞到好香濃嘅榛子朱古力味,正!



        慢慢研究吓佢個說明同用法,勁抵死攪笑。     




        請留意第 5點「用法」,以我嘅經濟狀況,我就實唔可以用嚟敷面囉!


 



        胡椒餅咁好食,梗要買兩個返嚟做手信啦!一個俾阿馳同阿瑩試;一個就俾我老豆食。



        胡椒餅未切開時個 outlook


 



        呢包烏龍茶就係阿珊嘅指定手信,我同 Winnie其實係見佢價錢抵先買,港紙約$25,點知 Li Kien同阿珊都話「天仁」茶葉原來係屬於當地名牌,真係誤打誤撞 o架咋!


        跟住落嚟果四樣嘢都係喺南門市場買嘅。



        知唔知係咩嘅呢?係九層塔呀,即係泰國嘅金不換。喺香港都幾難買到,因為少人買,又易變壞,所以好多賣東南亞食品嘅舖頭都唔入貨。我知道喺台灣一定買到,因為台灣人好鍾意用佢嚟煮餸。


 



        大果個係芭樂,即係番石榴;而細果兩個就係棗子,係 Winnie 個台灣 friend請我哋食嘅。



        喺切件芭樂上灑上話梅粉寧捨好味,情況同灑鹽落西瓜一樣,吊起咗佢嘅清甜,呢招係喺士林夜市一個專賣水果街邊檔度學番嚟。


       



        唔好以為呢包係啲 "拆家" 帶嘅 "粉" 呀,我係正人君子,唔販毒 o架! 其實係包純杏仁粉,可以要嚟沖飲或者整蛋糕餅乾,維起港紙都係大約 $45,已經有一斤 (600g) 重喇,平過香港好多,勁抵!


 



        迷你鳳梨酥。原本係 Li Kien買嚟做手信先嘅,不過佢話即刻拆嚟大家試吓,食完覺得幾 OK,唔會太甜,又夠鬆,所以我哋每個人都有買嚟做手信。


       



        師大夜市時買嘅貼紙,原本係俾你貼喺台北地鐵嘅「悠遊通」上面,但原來 size同香港嘅「八達通」,甚至英國鐵路車票相同,所以咪買返嚟囉!一張送俾我學生軒軒嘅,另一張就俾我老豆。


 



        呢兩包麻糬就喺淡水老街買嘅,連埋迷你鳳梨酥一齊分俾媽咪幾個最熟嘅晨運 friends


 



        呢盒「台北犁記」鳳梨酥就係今次手信中嘅主打。之前其實 Winnie已經做哂 research,佢睇果本雜誌話,「犁記」鳳梨酥係最重果味、最少牛油味同價錢最合理嘅一隻,所以我試過之後就買咗兩盒,一盒就自己食啦,另一盒就梗係送俾乖學生 Louisa 啦!呢兩盒鳳梨酥應該係全場所有手信中最貴 o架喇,不過我覺得都物有所值。




        有興趣嘅朋友,有機會去台北玩果陣就跟住個地址去買啦!


        今次嘅台北自遊行能夠咁順利完成,實在要勞動到唔少人力,所以我想喺度多謝幾位重要人物:


        首先係 Louisa,雖然佢無份去玩,但佢就幫咗我4個最多,不但做中間人幫我哋接洽佢個做旅行社friend訂酒店、book 機票、買 package,仲私下以超荀價錢讓咗張 Asia Miles換機票俾我,臨出發前仲專登打電話俾我,問我 print好機票未、攪好證件未、駛唔駛幫我哋 "唱" 台幣等等,呢個學生真係唔話得,做我哋呢行其實都識到唔少 "大粒"、"猛料" 之人,但係一個咁好、咁無架子CEO就真係未見過囉!


        第 2個要多謝嘅就梗係老死 Winnie啦!佢唔單只做好哂 research、幫我plan好哂行程,仲幫我聯絡 Louisa攪酒店、機票,因為佢知我係個 "出門白癡",乜鬼都唔知,今次去旅行仲調番轉做我枝盲公竹 o添!


        跟住要多謝就係阿聰媽咪,因為原本佢淨係幫個仔 "唱" 台幣就得 o架喇,點知發現原來台幣唔係周圍都有得 "唱",我搵咗好幾間都無,於是我就搭阿聰叫佢媽咪幫我 "唱" 埋,點知後尾又要走多轉去幫 Winnie"唱"錢,累到伯母無端端走多幾轉去幫我哋 "唱" 台幣,真係唔好意思,所以我哋都夾份買番嘢送俾佢。


        第 4個就係 Gordon喇,佢原來喺我哋出發之前係好唔舒服,仲攪到去咗醫院急症室 o添 (我都係返到嚟香港佢話番俾我知我先知咋!佢話唔話俾我聽係唔想掃我哋興喎 ),但佢知道我哋第二日就出發去台灣,就算佢幾唔舒服都專登打電話俾我,叫我萬一喺台灣發生乜嘢突發事件需要人幫忙的話,就打電話 call佢個台灣 friend求救,佢都算唔話得喇。


        最後就係要多謝 Winnie個侄仔洛洛,慷慨咁借出佢嘅用餐較剪,有咗呢把較剪,我哋就可以試多好多唔同嘅小食 ( 特別係掃街果陣時 )。點解?因為無論食物大小,大至一塊大雞扒,細至一舊鳳梨酥,我哋都將佢剪開 4嚟 "分享",咁就每樣嘢都可以只係食少少,唔會食到飽哂,可以試多啲唔同款式嘛!


2009年3月26日星期四

台北自遊行 (第三天) II

        去完「中正紀念堂」之後,買完鳳梨酥,Winnie 就離我哋而去喇!皆因佢約咗佢個台灣 friend食飯呀。所以我哋三個就係無 "領隊兼導遊" 嘅情況下自己行街,自己搵食喇!哼,呢個領隊兼導遊真係失職啦,自己走咗去被人 "餵豬" 咁食!!(佢自己用個咁嘅形容詞咋 ) 



        嚟到台北,就梗係要去「台北 101」啦,就好似去大馬一定要影雙子塔咁囉!叫做到此一遊兼影張相留念嘛。



        「台北 101」個門口。


        3日時間話咁快就過喇,係時候去機場 check-in,準備飛返香港喇。



        由於機場客運新大樓果邊有個 Hello Kitty候機室,身為佢忠實 fans Winnie就梗係唔會錯過呢個機會啦!所以我哋就搭程無人駕駛嘅接駁電車過去新客運大樓。



        接駁電車個車廂。


 



        新客運大樓呢邊果然新好多、靚好多!




        大樓內都有好多綠化嘅裝飾。


 



        大樓樓上二樓食肆。


 



        仲有間老牌台灣店舖o添!


 



        依,點解無端端有個林柿人坐喺度上網嘅?哦,原來佢係機場內提供 FREE Wi-Fi service 公司嘅代言人嘅!林柿係佢哋品牌個 logo



        呢張大合照就結束咗我喺台北3日自遊行喇!但最終 Winnie 都無去到 Hello Kitty 候機室參觀,點解?等佢自己親自解釋啦,之前我都講過,我喺台灣係個 "癈人" 嘛,都唔知佢哋同啲職員喺度講緊乜,聽唔聽啲,淨係聽到一堆「@!%$#&*#」咋!( 你哋唔好以為佢喺度互相問候對方呀!)


        唏,仲未大結局 o架!仲有少少幕後花絮俾你哋睇,睇埋呢個 series最後一篇 blog啦!


台北自遊行 (第三天) I

        第三日嘅行程,就由「金峰魯肉飯」嘅早餐開始。


        餐廳裝修唔算好,仲可以話有"up dup",但嘢食都 OK喎!唔係淨係我話 o架,連最嘴尖Winnie 都話好食就真係好食 o架喇!



        哋叫咗魯肉飯、肉焿冬粉、[金鼎] 邊趖同排骨酥。


        食完早餐,我哋又去番台北車站,準備搭地鐵去中正紀念堂。



        呢間係台北車站裡面專賣紀念品嘅舖頭,Winnie話全線車站係得呢個站先至有 o架咋!


 



        呢個係「中正紀念堂站」。


 



        嗱,呢個牌坊就一定要影喇!點解?因為幾個月後,「中正廣場」又回朝喇嘛,阿扁個「自由廣場」將會成為歷史 o架喇,仲唔影低佢做歷史見證?呢啲機會唔係人人有 o架!



 



        喺「國家歌劇院」前留影。


 



        對面就係「國家音樂廳」,個牌匾同啲斗拱都好靚。



        音樂人當然要喺音樂廳前影番張相啦!阿聰仲問 Li Kien 幾時會喺度演出 o添!





        睇到呢幅相,我覺得好恐怖,因為天色非常差,好有當年掛天安門「阿爺」幅相被人潑油後,即刻風雲變色果隻 feel!好驚呀!!!!



        行上呢段樓梯都唔覺有乜嘢,到行番落嚟先至 "甘" 呀!嘩,個小腿勁痛呀!(唉,係自己對腳有問題啫!)


 



        行到上去,望番轉頭,影吓「國家歌劇院」同「國家音樂廳」呢對 "twins" 先!


 



        遲啲又變番「中正紀念堂」,「台灣民主紀念館」又同「自由廣場」遭受同一命運!


 



        蔣介石像。


 



        紀念堂內嘅天花。


 


 



        我喺側門走時影嘅。