炒土豆絲

        記得以前有次同媽咪上深圳推拿後，去咗一間新疆菜館度食嘢，個大廚都係新疆人嚟 o架！所以啲菜式都非常正宗。

        媽咪叫咗個炒土豆絲試吓，當時我都唔知係咩嚟，後來佢話俾我聽原來土豆即係薯仔，所以炒土豆絲其實即係炒薯絲。果陣我都係第一次知道薯仔原來可以用嚟咁樣炒，因為平時多數都係用嚟炆或煮番茄。

材料：
薯仔
辣椒乾

調味料：
鹽
糖
雞粉
麻油
鎮江醋
孜然粉

        薯仔洗乾淨，去皮後切成薯絲，之後要將薯絲浸水，一來等佢唔駛變色，二來可以將部份澱粉質浸咗出嚟，咁炒出嚟嘅薯絲就會更加爽口，炒之前記得先瀝乾水；辣椒乾切粒備用。

        先將辣椒乾爆香，然後加入薯絲，炒至軟身後就加調味料，鎮江醋只係落少少嚟吊味，最後灑上少少麻油，拌勻後就可以上碟。