泰式青咖喱

        我同 Li Kien 喺台灣買咗啲九層塔 ( 即金不換 ) 返嚟，真係抵到爛，約HK$2.5 已經有一大包，有排食，可惜唔擺得耐，好易變，所以今日就用佢嚟煮泰式青咖喱。

材料：
雞胸肉
青口
番茄
茄子
金不換

醃料：
糖
魚露
胡椒粉
粟粉

調味料：
青咖喱醬
魚露
椰醬
糖

        先洗淨雞胸肉、切件，然後用醃料醃好；青口同金不換洗乾淨備用；番茄同茄子洗淨後切件。

        先放雞肉落鑊炒至半熟，盛起備用；之後落青咖喱醬落鑊爆香，加入部份椰漿同水煮到出油為止，跟住加入茄子，慢火煮腍。當茄子煮腍後，就加埋青口落去煮幾分鐘，並將雞肉回鑊一齊煮，最後加埋番茄、金不換、魚露、糖同剩餘嘅椰醬，兜兩兜就可以熄火上碟。

        味道好正，辣得啱啱好，唔會太刺激，加埋金不換嘅獨特香味，真係非常醒胃，所以今晚餐飯都不停撈汁。雞肉仲好嫩滑，加咗番茄後帶有少少酸味，寧捨開胃！

P.S.    呢個青咖喱係參考咗網友 "Olga廚房" 嘅正宗泰國青咖喱而煮 o架！