炒牛蒡

材料：
牛蒡
雞脾菇
九層塔
紅燈籠椒
黃燈籠椒
紅椒粒

調味料：
花椒粉
素鮑汁
糖
鹽

        牛蒡先用錫紙去 "省" 走表面啲泥 ( 我係參考咗「蔡瀾歎名菜」其中一集，裡面有個日本女師傅教咁樣做 o架 )，然後用水洗乾淨，切薄片備用；雞脾菇同樣洗淨後切薄片；燈籠椒洗淨後切條；九層塔洗乾淨備用。

        燒熱油鑊後，先將燈籠椒炒一炒，盛起後就加入雞脾菇炒一陣，同樣盛起備用；之後就將牛蒡放落鑊炒，兜炒一陣後就可以將燈籠椒同雞脾菇回鑊，加入調味料同紅椒粒，最後加埋九層塔，炒兩三吓就即刻熄火，可以上碟。

        我都係第一次食牛蒡，好爽脆，好有嚼勁。近排啲營養師成日都話最好每餐都要食齊五種唔同顏色嘅蔬果，本來我都覺得有少少難度，一餐點可能食咁多嘢呢？但係不知不覺間今晚就成功做到喇！

綠色：九層塔
黃色：黃燈籠椒
紅色：紅燈籠椒
白色：牛蒡同雞脾菇

再加埋另外果碟紫色嘅蒸茄子，咁就啱啱好一餐食齊五種不同顏色嘅蔬果喇。